ບັນດາທູດຈາກສະຫະພາບເອີຣົບຢ້ຽມຢາມສູນຜະລິດຢາສັດຕະວະແພດ

ໃນວັນທີ 16 ພຶດສະພາ ທີ່ຜ່ານມາ, ບັນດາທູດຈາກ ສະຫະພາບເອີຣົບ (EU) ນໍາໂດຍ ທ່ານ ນາງ ອີນາ ມາຈູລີໂອນີແຕ (Ina Marciulionyte ) ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ ໄປຢ້ຽມຢາມໂຄງການຕ່າງໆຂອງທີມ EU ຢູ່ ນະຄອນຫລວງວຽງຈັນ, ແຂວງວຽງຈັນ ແລະແຂວງຫລວງພະບາງ ເພື່ອຕິດຕາມຄວາມກ້າວໜ້າ ແລະຍໍ້າຄືນຄວາມມຸ່ງໝັ້ນຂອງທີມອີຢູໃນການເຮັດວຽກຮ່ວມກັນພາຍໃຕ້ຂອບຍຸດທະສາດຂອງທີມອີຢູ ປີ 2021-2025 ໃນ ສປປ ລາວ ໂດຍເນັ້ນໃສ່ 3 ຂົງເຂດບູລິມະສິດ ຄື: ເສດຖະກິດສີຂຽວແບບມີສ່ວນຮ່ວມ, ຕົ້ນທຶນມະນຸດ ແລະການປົກຄອງທີ່ດີ.

ໂອກາດນີ້, ຄະນະຜູ້ແທນດັ່ງກ່າວ ໄດ້ໄປຢ້ຽມຢາມສູນຜະລິດຢາສັດຕະວະແພດ ພາຍໃຕ້ການສະໜັບສະໜູນຂອງໂຄງການຮ່ວມມື ລາວ-ຮົງກາລີ ໂດຍໄດ້ຮັບການຕ້ອນຮັບຈາກທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ ພ້ອມດ້ວຍພາກສ່ວນກ່ຽວຂ້ອງ.

ທ່ານ ນາງ ວິໄລພອນ ວໍລະພິມ ຫົວໜ້າກົມລ້ຽງສັດ ແລະ ການປະມົງ ໄດ້ໃຫ້ຮູ້ວ່າ: ສູນຜະລິດຢາສັດຕະວະແພດແມ່ນສູນໜຶ່ງທີ່ຂຶ້ນກັບກະຊວງກະສິກໍາ ແລະປ່າໄມ້ ມີເນື້ອທີ່ 20 ເຮັກຕາ ສ້າງຕັ້ງປີ 1979 ໂດຍທຶນຊ່ວຍເຫລືອຈາກ ອົງການສະຫະປະຊາຊາດເພື່ອການພັດທະນາ (UNDP) ຈາກນັ້ນໄດ້ຮັບການຖ່າຍທອດເຕັກໂນໂລຊີ ຈາກອົງການອາຫານ ແລະການກະເສດ (FAO) ໜ້າທີ່ຕົນຕໍຂອງສູນແມ່ນຜະລິດ ແລະ ສະໜອງຢາກັນພະຍາດສັດ ໃຫ້ກະສິກອນທົ່ວປະເທດ, ປັດຈຸບັນມີກໍາລັງການຜະລິດ 10 ລ້ານເຂັມຕໍ່ປີ, ສາມາດຜະລິດຢາກັນພະຍາດສັດໄດ້ 8 ຊະນິດ ຄື: ວັກຊິນກັນພະຍາດສັດປີກ 5 ຊະນິດ (ນິວຄາເຊິນ, ອະຫິວາເປັດ, ຫລອດລົມອັກເສບ, ໝາກສຸກສັດປີກ ແລະ ອະຫິວາສັດປີກ), ຢາກັນພະຍາດສັດໃຫຍ່ 2 ຊະນິດ (ເຕົ້າໂຮມເລືອດງົວ-ຄວາຍ ແລະ ໃຂ້ບວມ) ແລະ ຢາກັນພະຍາດໝູ 1 ຊະນິດ (ອະຫິວາໝູ), ປັດຈຸບັນສູນແຫ່ງນີ້ໄດ້ຜະລິດຢາກັນພະຍາດສັດຢ່າງຕໍ່ເນື່ອງ.

แชร์