ປະທານສະພາຫວຽດນາມ ຢ້ຽມຢາມທະນາຄານຮ່ວມທຸລະກິດ ລາວ-ຫວຽດ

ວັນທີ 15  ພຶດສະພາ ທີ່ຜ່ານມາ ທ່ານ ເວືອງ ດິງ ເຫວະ ກໍາມະການກົມການເມືອງ ສູນກາງພັກກອມມູນິດຫວຽດນາມ, ປະທານສະພາແຫ່ງຊາດຫວຽດນາມພ້ອມຄະນະ ໄດ້ໄປຢ້ຽມຢາມ ແລະ ເຮັດວຽກຮ່ວມກັບບັນດາຕົວແທນທຸລະກິດຂອງ ທະນາຄານຫຸ້ນສ່ວນການຄ້າການລົງທຶນ ແລະ ການພັດທະນາຫວຽດນາມ ຢູ່ທີ່ທະນາຄານຮ່ວມທຸລະກິດ ລາວ-ຫວຽດ ຈໍາກັດ ໃນໂອກາດເດີນທາງມາຢ້ຽມຢາມສັນຖະວະໄມຕີ ຢູ່ ສປປ ລາວ ລະຫວ່າງ ວັນທີ 15-17 ພຶດສະພາ ນີ້,

ທ່ານ ຫງວຽນ ດຶກ ຫວູ ຜູ້ອໍານວຍການໃຫຍ່ທະນາຄານຮ່ວມທຸລະກິດລາວ-ຫວຽດ ຈຳກັດ ໄດ້ຕາງໜ້າໃຫ້ການນໍາ ແລະ ພະນັກງານ ທີ່ເປັນຕົວແທນທຸລະກິດຂອງທະນາຄານຫຸ້ນສ່ວນການຄ້າການລົງທຶນ ແລະ ການພັດທະນາຫວຽດນາມຢູ່ລາວໄດ້ລາຍງານໃຫ້ຊາບ ກ່ຽວກັບການດໍາເນີນທຸລະກິດຂອງທະນາຄານ ຕະຫລອດໄລຍະ 23 ປີ ແຫ່ງການເຕີບໃຫຍ່ ແລະ ຂະຫຍາຍຕົວ ໄດ້ປະກອບສ່ວນເຂົ້າໃນການພັດທະນາພື້ນຖານເສດຖະກິດ ແລະ ສັງຄົມຂອງລາວ. ມາຮອດທ້າຍເດືອນເມສາ 2022 ທະນາຄານຮ່ວມທຸລະກິດລາວ-ຫວຽດ ມີຊັບສິນລວມທັງໝົດບັນລຸ 1,1  ຕື້ໂດລາສະຫະລັດ ແລະ ລວມຍອດລະດົມທຶນໄດ້ເກືອບ 1  ຕື້ໂດລາສະຫະລັດ, ສະໜອງແຫຼ່ງທຶນໃຫ້ບັນດາວິສາຫະກິດຫວຽດນາມ ທີ່ລົງທຶນຢູ່ລາວ ບັນລຸໄດ້ເກືອບ 600 ລ້ານໂດລາສະຫະລັດ. ສໍາລັບປີ 2021 ທະນາຄານ ໄດ້ປະກອບສ່ວນເຂົ້າງົບປະມານລັດຖະບານ ຫຼາຍກວ່າ 311 ຕື້ກີບ ແລະ ສ້າງວຽກເຮັດງານທໍາໄດ້ເກືອບ 500  ຕໍາແໜ່ງງານ.

ໃນໂອກາດນີ້, ສະຫາຍ ເວືອງ ດິງ ເຫວະ ໄດ້ສະແດງຄວາມຊົມເຊີຍ ທະນາຄານຮ່ວມທຸລະກິດ ລາວ-ຫວຽດ ຈຳກັດ ຜ່ານການໄດ້ຮັບລາງວັນ ແລະ ການຍ້ອງຍໍຂັ້ນຕ່າງໆ ຈາກພັກ-ລັດຖະບານລາວໃນໄລຍະຜ່ານມາ. ພ້ອມທັງໄດ້ຕີລາຄາສູງຕໍ່ຄວາມພະຍາຍາມຜ່າຜ່ານສິ່ງທ້າທາຍ ແລະ ຄວາມຫຍຸ້ງຍາກໃນໄລຍະ ທີ່ມີການລະບາດຂອງພະຍາດໂຄວິດ-19, ແຕ່ຫົວໜ່ວຍທຸລະກິດຫວຽດນາມທີ່ລົງທຶນຢູ່ລາວ ຍັງບັນລຸໄດ້ຜົນງານຫຼາຍດ້ານທີ່ການນໍາຂອງສອງພັກ, ສອງລັດວາງອອກ. ພ້ອມດຽວກັນ ຍັງໄດ້ຊີ້ນໍາໃຫ້ພະນັກງານ, ວິຊາການສືບຕໍ່ຮັກສາຕົວເລກການຂະຫຍາຍຕົວຢ່າງຕໍ່ເນື່ອງ ປະກອບສ່ວນເຂົ້າໃນການພັດທະນາເສດຖະກິດຂອງລາວ. ພິເສດ ແມ່ນເປັນຂົວຕໍ່ໃນການສົ່ງເສີມການລົງທຶນ, ໃຫ້ບັນດາຫົວໜ່ວຍທຸລະກິດຫວຽດນາມ ທີ່ມີ ຄວາມສົນໃຈເຂົ້າມາລົງທຶນ ແລະ ການຄ້າຢູ່ລາວ.

แชร์