ຫລາຍພາກສ່ວນຮ່ວມຫາລື ແກ້ໄຂບັນຫາລາຄານໍ້າມັນເຊື້ອໄຟ

ກອງປະຊຸມປຶກສາຫາລືແກ້ໄຂບັນຫານໍ້າມັນເຊື້ອໄຟໃນປັດຈຸບັນ ແລະການຜັນຂະຫຍາຍມະຕິຄະນະປະຈໍາສະພາແຫ່ງຊາດວ່າດ້ວຍການຮັບຮອງມາດຕະການຮັກສາສະຖຽນລະພາບຂອງລາຄານໍ້າມັນເຊື້ອໄຟໃນສະພາບລາຄານໍ້າມັນເຊື້ອໄຟເໜັງຕີງຂຶ້ນສູງໄດ້ຈັດຂຶ້ນໃນວັນທີ 11 ພຶດສະພາ 2022 ໂດຍການເປັນປະທານຂອງທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ, ມີຕາງໜ້າບໍລິສັດນໍ້າມັນເຊື້ອໄຟ ແລະສະມາຄົມນໍ້າມັນເຊື້ອໄຟ ແລະອາຍແກັດລາວ ເຂົ້າຮ່ວມ.

ໂອກາດນີ້, ທ່ານ ຄໍາແພງ ໄຊສົມແພງ ໄດ້ສະເໜີບາງບັນຫາສຳຄັນທີ່ຕິດພັນກັບການແກ້ໄຂບັນຫານໍ້າມັນເຊື້ອໄຟໃນປັດຈຸບັນໂດຍສະເພາະການຮັກສາສະຖຽນລະພາບຂອງລາຄານໍ້າມັນເຊື້ອໄຟ, ການກຳນົດນະໂຍບາຍ, ຍຸດທະສາດ,ແຜນງານໃນແຕ່ລະໄລຍະ,ລວມໄປເຖິງການປະຕິບັດນະໂຍບາຍຫລຸດອາກອນຊົມໃຊ້,ຄວາມຫຍຸ້ງຍາກລະຫວ່າງການກຳນົດໂຄງສ້າງລາຄານໍ້າມັນ, ໂຄງສ້າງລາຄາ ເຊັ່ນ: ອັດຕາແລກປ່ຽນເງິນຕາ, ອັດຕາຄ່າບໍລິການ ແລະຄ້າສິ້ນເປືອງຕ່າງໆເພື່ອພ້ອມກັນຊອກວິທີແກ້ໄຂ ໃນແຕ່ລະຈຸດ ແລະໃຫ້ການຊ່ວຍເຫລືອໃຫ້ທັນເວລາເພື່ອເຮັດໃຫ້ນໍ້າມັນພຽງພໍກັບຄວາມຕ້ອງການ ແລະເຮັດໃຫ້ການເໜັງຕີງຂຶ້ນ-ລົງຂອງລາຄານໍ້າມັນຢູ່ໃນເກນປົກກະຕິ.

ທ່ານ ຄໍາແພງ ໄຊສົມແພງ ຍັງໄດ້ກ່າວອີກວ່າ: ບັນດາບໍລິສັດກໍຊ່ວຍພິຈາລະນາຄົ້ນຄວ້າ ຮັບຄວາມສ່ຽງຂອງການດຳເນີນທຸລະກິດເຊິ່ງປາສະຈາກບໍ່ໄດ້ຍາມມີກຳໄລ ແລະຍາມຂາດທຶນແຕ່ໃນສະພາບວິກິດການ ກໍຕ້ອງໄດ້ປຶກສາຫາລືກັນຢ່າງເອົາຈິງເອົາຈັງເພື່ອບໍ່ໃຫ້ບັນຫາການຂາດນໍ້າມັນເກີດຂຶ້ນອີກ. ພ້ອມກັນນັ້ນ, ກະຊວງອຸດສາຫະກໍາ ແລະການຄ້າທີ່ເປັນອົງການຄຸ້ມຄອງບັນດາທຸລະກິດນໍ້າມັນເຊື້ອໄຟຈະຕ້ອງຍົກສູງຄວາມຮັບຜິດຊອບ, ຕິດຕາມ, ກວດກາ ແລະສືບຕໍ່ດັດສົມການດຳເນີນທຸລະກິດນໍ້າມັນເຊື້ອໄຟຕາມທິດຊີ້ນໍາຂອງຂັ້ນເທິງ ແລະນິຕິກຳທີ່ວາງອອກເພື່ອສະຫຼຸບປະເມີນຜົນການດຳເນີນງານຂອງບັນດາບໍລິສັດພາຍໃນຕົ້ນເດືອນມິຖຸນາ 2022 ນີ້, ພ້ອມທັງຈະຄົ້ນຄວ້າກົນໄກການນໍາເຂົ້ານໍ້າມັນເຊື້ອໄຟເພື່ອໃຫ້ມີກຳລັງແຮງໃນການເຈລະຈາຕໍ່ລອງຊື້ນໍ້າມັນເຊື້ອໄຟ, ໃຫ້ສາມາດລວມສູນໃນການນໍາເຂົ້າ ແລະ ແຈກຢາຍນໍ້າມັນເຊື້ອໄຟເພື່ອຫລຸດຜ່ອນຂອດຂັ້ນ ແລະສຳຄັນແມ່ນຫລຸດຜ່ອນຕົ້ນທຶນຕ່າງໆ ໂດຍມີເປົ້າໝາຍໃຫ້ລາຄານໍ້າມັນຖືກລົງ ສົມທຽບກັບປັດຈຸບັນທີ່ມີຫລາຍບໍລິສັດເຮັດພໍໃຜພໍລາວນັ້ນຈະສາມາດຄົ້ນຄວ້າເປັນເອກະພາບກັນຄືແນວໃດຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ສະບັບເລກທີ 621/ຫສນຍ ໃຫ້ມີການຄົ້ນຄວ້າກົນໄກດັ່ງກ່າວຊຶ່ງໃຫ້ທິດທາງວ່າລັດວິສາຫະກິດນໍ້າມັນເຊື້ອໄຟລາວຮ່ວມກັບບໍລິສັດນໍ້າມັນເຊື້ອໄຟເອກະຊົນຈໍານວນໜຶ່ງຕັ້ງເປັນບໍລິສັດນໍ້າມັນເຊື້ອໄຟແຫ່ງຊາດ; ຖ້າຫາກມີການຮ່ວມກັນ ຫຼືເຕົ້າໂຮມກັນເປັນບໍລິສັດໃຫຍ່ເພື່ອໃຫ້ມີກຳລັງໃນເຈລະຈາຈັດຊື້ນໍ້າມັນເຊື້ອໄຟ ຈາກຫຼາຍແຫຼ່ງ ຫລືຈາກປະເທດລັດເຊຍ ຫຼືຈາກປະເທດຜູ້ຜະລິດ ແລະສົ່ງອອກນໍ້າມັນ ໃຫ້ມີລາຄາຖືກລົງເພື່ອເປັນທາງເລືອກໃນການສະໜອງນໍ້າມັນເຊື້ອໄຟໃນສະເພາະໜ້າ ແລະຍາວນານ.

แชร์