ຫວຽດນາມ ມອບເງິນຊຸກຍູ້ທັບນັກກີລາລາວ 100 ລ້ານດົງ ລ່າເປົ້າໝາຍ 5 ຫຼຽນຄໍາ ຊີເກມ

ສະມາຄົມສູນກາງມິດຕະພາບ ລາວ-ຫວຽດນາມ ໃຫ້ການສະໜັບສະໜູນທັບນັກກິລາລາວ ຈໍານວນ ເງິນສົດ 100 ລ້ານດົງ ຫຼືປະມານ 60 ລ້ານກວ່າກີບ ເພື່ອເປັນກໍາລັງໃຈໃຫ້ທັບນັກກິລາລາວ 28 ປະເພດລ່າຫຼຽນເປົ້າໝາຍ 5 ຫຼຽນຄຳ ໃນງານມະຫະກຳກິລາຊີເກມ ຄັ້ງທີ 31 ຫຼື “ຮ່າໂນ້ຍ ເກມ 2021” ທີ່ນະຄອນຫຼວງຮ່າໂນ້ຍ ສສ ຫວຽດນາມ ຮັບກຽດເປັນເຈົ້າພາບ.

ໃນວັນທີ 10 ພຶດສະພາ ທີ່ຜ່ານມາ ພາຍຫຼັງທີ່ ທ່ານ ຮສ.ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກີລາພ້ອມດ້ວຍຄະນະໄດ້ເດີນທາງມາເຖິງ ນະຄອນຫຼວງຮ່າໂນ້ຍ ສສ ຫວຽດນາມ ເພື່ອເຂົ້າຮ່ວມພິທີເປີດງານກິລາຊີເກມ ຄັ້ງທີ 31 ຊຶ່ງຈະເປີດຂຶ້ນເປັນທາງການໃນວັນທີ 12 ພຶດສະພາ 2022 ກໍໄດ້ເຂົ້າພົບປະສະມາຄົມສູນກາງມິດຕະພາບ ຫວຽດນາມ-ລາວ ໂດຍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ເຈີນ ວັນຕຸ້ຍ ປະທານສະມາຄົມສູນກາງມິດຕະພາບ ຫວຽດນາມ-ລາວ ພ້ອມດ້ວຍຄະນະ.

ໂອກາດນີ້, ທ່ານ ເຈີນ ວັນຕຸ້ຍ ກ່າວວ່າ: ຕະຫຼອດໄລຍະຜ່ານມາສະມາຄົມສູນກາງມິດຕະພາບຫວຽດນາມ-ລາວ ຍາມໃດກໍໄດ້ເອົາໃຈໃສ່ເພີ່ມທະວີຄວາມສາມັກຄີສາຍພົວພັນຮັກແພງລະຫວ່າງຫວຽດນາມ-ລາວ ແລະ ລາວ-ຫວຽດນາມ ໂດຍສະເພາະແມ່ນການສົ່ງເສີມໃຫ້ນັກຮຽນນັກສຶກລາວທີ່ຮຽນຢູ່ ສສ ຫວຽດນາມ, ໃນນັ້ນກໍໄດ້ເນັ້ນໜັກໃຫ້ສະຖານທູດລາວ ສືບຕໍ່ຈັດກິດຈະກຳຢ່າງເປັນປົກກະຕິ ເວົ້າສະເພາະການສອບເສັງນັກນຽນເກັ່ງຫວັງວ່າທ່ານຈະເດີນທາງກັບມາຮ່ວມງານສຳຄັນນີ້ອີກຄັ້ງ. ແນວໃດກໍດີ, ສຳລັບການມາຮ່ວມງານກິລາຊີເກມ ຄັ້ງນີ້ ຂອງທັບນັກກິລາລາວທາງສະມາຄົມພວກເຮົາກໍໄດ້ມີການປຸກລະດົມຮູບແບບທີ່ເໝາະສົມໃຫ້ບັນດາສະມາຄົມຢູ່ເຂດທ້ອງຖິ່ນໄປເຊຍນັກກິລາລາວເປັນພິເສດເໝືອນກັບເຊຍທີມຊາດຫວຽດນາມເພື່ອສົ່ງເສີມໃຫ້ສາມາດສ້າງຜົນງານໃຫ້ໄດ້ດີທີ່ສຸດ ແລະກໍເຊື່ວ່າການມາຄັ້ງນີ້ຂອງທ່ານລັດຖະມົນຕີ ສສກ ຈະເປັນກຳລັງໃຈດີໆ ໃຫ້ທັບນັກກິລາລາວຍາດເອົາໄຊຊະນະຕາມຈຸດປະສົງ ແລະເປົ້າໝາຍທີ່ວາງໄວ້.

ໃນໂອກາດດຽວກັນ, ທ່ານ ຮສ.ປອ ພຸດ ສິມມາລາວົງ ກໍໄດ້ກ່າວສະແດງຄວາມຂອບໃຈມາຍັງສະມາຄົມສູນກາງມິດຕະພາບ ຫວຽດນາມ-ລາວ ທີ່ໃຫ້ການຕ້ອນຮັບຢ່າງອົບອຸ່ນການພົບປະຄັ້ງນີ້ຖືເປັນຂີດໝາຍອັນສຳຄັນອັນໜຶ່ງໃນໂອກາດທີ່ຂ້າພະເຈົ້າໄດ້ມາເຄື່ອນໄຫວຮ່ວມການກິລາຊີເກມໃນນາມກະຊວງ ສສກ ກໍຂໍສະແດງຄວາມຊົມເຊີຍຢ່າງສຸດໃຈມາຍັງບັນດາສະຫາຍທີ່ໄດ້ເປັນຫ່ວງເປັນໃຍເພີ່ມທະວີຄວາມຮັກແພງສາມັກຄີສາຍພົວພັນຂອງສອງຊາດຢ່າງແໜ້ນແຟ້ນເຖິງວ່າປັດຈຸບັນຈະມີສະພາບຂອງພະຍາດໂຄວິດ-19 ແຕ່ກໍຂໍໃຫ້ ສສ ຫວຽດນາມເຮົາຈົ່ງທີຄວາມປອດໄພ ແລະ ສາມາດເປີດງານກິລາຊີເກມ ໄປດ້ວຍຜົນສຳເລັດ. ພິເສດປີນີ້ທັງສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ແລະຫວຽດນາມ-ລາວ ໄດ້ເສີມຂະຫຍາຍສາຍພົວພັນແຫ່ງຄວາມສາມັກຄີຮັກແພງ ຄົບຮອບ 60 ປີແຫ່ງສາຍພົວພັນທາງການທູດ ແລະຄົບຮອບ 45 ປີ ແຫ່ງວັນເຊັນສົນທິສັນຍາມິດຕະພາບ ແລະການຮ່ວມມື ລາວ-ຫວຽດນາມ ສະນັ້ນ,ຢູ່ ສປປ ລາວ ກໍໄດ້ຈັດກິດຈະກຳຕ່າງໆຢ່າງຟົດຟື້ນເພື່ອເສີມຂະຫຍາຍມູນເຊື້ອອັນດີງາມຂອງສອງຊາດເຮົາທີ່ມີມາຢ່າງຍາວນານ ແລະ ທາງກະຊວງ ສສກ ກໍຈະໄດ້ຈົດບັນທຶກເພື່ອຈະຂຽນເປັນປຶ້ມກ່ຽວກັບຄວາມສາມັກຄີແບບພິເສດຂອງສອງຊາດລາວ-ຫວຽດນາມ ແລະຫວຽດນາມ-ລາວ ອີກເທື່ອໜຶ່ງຂໍສະແດງຄວາມຂອບໃຈ ແລະຮູ້ບຸນຄຸນຢ່າງສູງທີ່ ສສ ຫວຽດນາມ ໄດ້ໃຫ້ການຊ່ວຍເຫຼືອສະໜັບສະໜູນທັບນັກກິລາລາວໄດ້ມາຝຶກແອບຝຶກຊ້ອມ ແລະເຂົ້າຮ່ວມງານກິລາຊີເກມໃນຄັ້ງນີ້ໄປດ້ວຍດີ.

ຢ່າງໃດກໍຕາມ,ໃນໂອກາດທີ່ມາ ສສ ຫວຽດນາມ ເພື່ອຮ່ວມງານກິລາຊີເກມຄັ້ງນີ້ທ່ານລັດຖະມົນຕີກະຊວງສຶກສາທິການ ແລະກີລາ ພ້ອມດ້ວຍຄະນະຍັງຈະເຄື່ອນໄຫວເຮັດວຽກນຳບັນດາພາກສ່ວນທີ່ນອນໃນຂະແໜງການສຶກສາ ແລະກິລາ ໂດຍສະເພາະເຂົ້າພົບປະກັບກະຊວງສຶກສາທິການ ແລະກໍ່ສ້າງ ສສ ຫວຽດນາມ ອີກດ້ວຍ.

แชร์