ຄຳມ່ວນ ເປັນເຈົ້າພາບຈັດງານ ເວທີເດັກລາວ ປະຈຳປີ 2022

ເພື່ອເປັນການເສີມສ້າງຄວາມອາດສາມາດ ແລະທັງເປີດໂອກາດພັດທະນາທ່າແຮງຂອງເດັກລາວໃນການບັນລຸເປົ້າໝາຍການພັດທະນາແບບຢືນຍົງ ແລະມີສ່ວນຮ່ວມໃນຂະບວນການຕັດສິນ ແລະແກ້ໄຂຜົນກະທົບຕໍ່ການພັດທະນາຂອງເດັກລາວບັນດາເຜົ່າທົ່ວປະເທດລາວ, ໃນວັນທີ 10 ພຶດສະພາ 2022 ສະຫະພັນແມ່ຍິງແຂວງຄໍາມ່ວນ ໄດ້ຮັບກຽດເປັນເຈົ້າພາບໃນງານເວທີເດັກລາວປະຈຳປີ 2022 ຄັ້ງທີ 4 ພາຍໃຕ້ຄໍາຂວັນທີ່ວ່າ “ຄວາມຄືບໜ້າການສົ່ງເສີມສິດທິເດັກໃນ ສປປ ລາວ”

ໂດຍໄດ້ຮັບການສະໜັບສະໜູນດ້ານທຶນຮອນ ແລະວິຊາການຈາກອົງການຊາຍຟັນ ປະຈໍາ ສປປ ລາວ ໃຫ້ກຽດເຂົ້າຮ່ວມພິທີເປີດກອງປະຊຸມເວທີເດັກຂອງທ່ານ ນາງ ຈົງຈິດ ຈັນທະລານົນ ຮອງຫົວໜ້າກອງເລຂາຄະນະກຳມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ, ທ່ານ ນາງ ກຽນຕາ ວັນມະນາ ປະທານຄະນະບໍລິຫານງານສະຫະພັນແມ່ຍິງແຂວງຄຳມ່ວນ, ຮອງປະທານຄະນະກຳມະທິການເພື່ອແມ່ຍິງ ແລະແມ່-ເດັກແຂວງ, ທ່ານ ວິລະໄຊ ທຳມະວົງ ຮັກສາການຫົວໜ້າອົງການຊາຍຟັນ ປະຈຳລາວ, ມີບັນດາທ່ານຮອງປະທານຄະນະກຳມະທິການເພື່ອແມ່ຍິງ ແລະແມ່-ເດັກ ພ້ອມດ້ວຍຄະນະຄູອາຈານ,ຜູ້ນຳພາເດັກ ແລະ ໄວໜຸ່ມທັງ 18 ແຂວງ, ລວມທັງກອງເລຂາຄະນະກຳມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ອາສາສະມັກຈາກຫ້ອງການກອງເລຂາຄະນະກຳມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ ແລະ ອົງການຊາຍຟັນ ປະຈຳ ສປປ ລາວ ເຂົ້າຮ່ວມທັງໝົດ 151 ຄົນ, ຍິງ 75 ຄົນ.

ຈຸດປະສົງຂອງກອງປະຊຸມເວທີເດັກໃນຄັ້ງນີ້ແມ່ນເພື່ອເປັນເວທີເປີດໂອກາດ ແລະສົ່ງເສີມຕົວແທນເດັກ ແລະໄວໜຸ່ມມີສ່ວນຮ່ວມໃນຂະບວນການສົນທະນາ ແລະ ສະແດງຄວາມຄິດເຫັນຕັດສິນແກ້ໄຂບັນຫາທີ່ອາດສົ່ງຜົນກະທົບຕໍ່ການພັດທະນາເດັກ ແລະ ໄວໜຸ່ມ, ເພື່ອສ້າງຄວາມອາດສາມາດເດັກ ແລະໄວໜຸ່ມມີໂອກາດກ້າສະແດງອອກ, ປະກອບຄຳຄິດເຫັນ ແລະນຳສະເໜີແຜນພັດທະນາເດັກທີ່ສ້າງສັນ ແລະກ້າວໄປສູ່ການພັດທະນາແບບຍືນຍົງ, ເພື່ອສະໜັບສະໜູນສົ່ງເສີມຕົວແທນເດັກ ແລະໄວໜຸ່ມມີຄວາມພ້ອມດ້ານຕ່າງໆ ໃນການພັດທະນາ ແລະ ກຽມຄວາມພ້ອມໃນການເຂົ້າຮ່ວມເວທີເດັກອາຊຽນ, ເວທີພາກພຶ້ນ ແລະສາກົນແຕ່ລະປີ ແລະ ຕາມແຕ່ລະວາລະ ຈາກນັ້ນກໍ່ໄດ້ມີການແບ່ງກຸ່ມຄົ້ນຄວ້າສົນທະນາ (ກຸ່ມເດັກຍິງ-ເດັກຊາຍ) ໃຊ້ເຄື່ອງມືກ້າງປາ ເພື່ອຄົ້ນຄວ້າກ່ຽວກັບສິ່ງທີ່ທ້າທາຍ, ສິ່ງທີ່ພົ້ນເດັ່ນ ແລະວິທີແກ້ໄຂໂດຍເດັກເອງຕາມ  4 ຫົວຂໍ້ຄື: ການແຕ່ງດອງກ່ອນໄວ, ການນຳໃຊ້ສື່ສັງຄົມອອນລາຍທີ່ບໍ່ປອດໄພ, ອຸປະຕິເຫດຕາມທ້ອງຖະໜົນ ແລະ ການແຜ່ລະບາດຂອງພະຍາດໂຄວິດ 19 ນອກນັ້ນຍັງໄດ້ແບ່ງກຸ່ມອອກເປັນ 8 ກຸ່ມຄື: ກຸ່ມພິທີກອນ, ກຸ່ມແຕ້ມຮູບ ແລະ ພັດທະນາເດັກ, ກຸ່ມສະແດງລະຄອນ, ກຸ່ມສ້າງ ແລະຕັດຕໍ່ວີດີໂອ, ກຸ່ມນຳສະເໜີໂຄງການຂະນາດນ້ອຍຂອງເດັກ, ກຸ່ມສະແດງສິນລະປະ (ຟ້ອນ), ກຸ່ມຮ້ອງເພງ ແລະກຸ່ມເດີນແບບຊຸດວັດທະນະທຳແຕ່ລະແຂວງ.

ໃນພິທີ ທ່ານ ນາງ ຈົງຈິດ ຈັນທະລານົນ ຮອງຫົວໜ້າກອງເລຂາຄະນະກໍາມະທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ກໍ່ໄດ້ກ່າວເປີດກອງປະຊຸມເວທີເດັກຢ່າງເປັນທາງການ ແລະ ທ່ານ ນາງ ກຽນຕາ ວັນມະນາ ປະທານຄະນະບໍລິຫານງານສະຫະພັນແມ່ຍິງແຂວງຄຳມ່ວນ, ຮອງປະທານຄະນະກຳມະທິການເພື່ອແມ່ຍິງ ແລະແມ່-ເດັກ ແຂວງຄຳມ່ວນ ກໍ່ໄດ້ມີຄຳເຫັນກ່າວຕ້ອນຮັບໃນນາມທີ່ເປັນເຈົ້າພາບ ແລະທ່ານຍັງໄດ້ຮຽກຮ້ອງໃຫ້ບັນດາຕົວແທນເດັກທີ່ເຂົ້າຮ່ວມຈົ່ງເກັບກ່ຽວເອົາຄວາມຮູ້ ແລະບົດຮຽນທີ່ຄູຝຶກໄດ້ນຳມາສິດສອນໃນຄັ້ງນີ້ ໃຫ້ນຳເອົາຄວາມຮູ້ຄວາມສາມາດເພື່ອໄປພັດທະນາເດັກນ້ອຍໃນແຂວງຂອງຕົນໃຫ້ມີຄວາມກ້າວໜ້າຢ່າງບໍ່ຢຸດຢັ້ງກອງປະຊຸມເວທີເດັກປະຈຳປີ 2022 ນີ້ຈະດຳເນີນນັບແຕ່ວັນທີ 10-13 ພຶດສະພາ 2022 ຈຶ່ງໄດ້ສໍາເລັດລົງ.

แชร์