ເຈົ້າແຂວງຫຼວງພະບາງ ຕ້ອນຮັບການເຂົ້າພົບປະລັດຖະມົນຕີກະຊວງຍຸຕິທໍາ

ໃນວັນທີ 10 ພຶດສະພາ 2022 ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ເປັນກຽດຮັບຕ້ອນການເຂົ້າຢ້ຽມຢາມພົບປະຂອງ ທ່ານ ໄພວີ ສີບົວລິພາ ລັດຖະມົນຕີກະຊວງ ຍຸຕິທໍາ ພ້ອມຄະນະທີ່ຫ້ອງຮັບແຂກຫ້ອງວ່າການແຂວງ. ເຊິ່ງທ່ານເຈົ້າແຂວງໄດ້ຕີລາຄາເຖິງຄວາມສໍາຄັນທີ່ທາງຄະນະລັດຖະມົນຕີກະຊວງຍຸຕິທໍາໄດ້ໃຫ້ຄວາມສໍາຄັນແລະລົງມາໃກ້ສິດຊີ້ນໍາວຽກງານເພື່ອແນໃສ່ໃຫ້ການຈັດຕັ້ງປະຕິບັດວຽກງານດັ່ງກ່າວບັນລຸຜົນສໍາເລັດຕາມເປົ້າໝາຍ.

ໂອກາດດັ່ງກ່າວທ່ານລັດຖະມົນຕີ ກະຊວງຍຸຕິທໍາກໍ່ໄດ້ແຈ້ງຈຸດປະສົງໃນການມາເຄື່ອນໄຫວຢ້ຽມຢາມ  ແລະເຮັດວຽກຢູ່ແຂວງຫຼວງພະບາງຄັ້ງນີ້ວ່າ: ເພື່ອເປັນການມາຊຸກຍູ້ຕິດຕາມ ແລະຮັບຟັງການລາຍງານສະພາບການຈັດຕັ້ງປະຕິບັດວຽກງານວຽກງານຂອງພະແນກຍຸຕິທໍາແຂວງຫຼວງພະບາງ ແລະເຂດເປັນຕົ້ນແມ່ນ: ວຽກງານການປະຕິບັດຄໍາຕັດສິນຂອງສານ, ການແກ້ໄຂຄະດີຕ່າງໆ ພ້ອມທັງລົງຕິດຕາມຮັບຟັງການລາຍງານສະພາບການຮຽນ-ການສອນ ຂອງສະຖາບັນຍຸຕິທໍາປະຈໍາພາກເໜືອລວມເຖິງວຽກງານປັບປຸງກົງຈັກການຈັດຕັ້ງຢູ່ພະແນກແນກຍຸຕິທໍາແຂວງ ແລະ ສະຖາບັນຍຸຕິທໍາພາກເໜືອໃຫ້ສອດຄອງກັບພະລະບົດບາດ ແລະ ໜ້າທີ່ວຽກງານ, ຮັບປະກັນໃຫ້ການເຄື່ອນໄຫວວຽກງານຢ່າງເປັນລະບົບ, ຖືກຕ້ອງຕາມລະບຽບກົດໝາຍ ແລະບັນລຸຜົນສໍາເລັດຕາມແຜນການທີ່ໄດ້ວາງໄວ້, ໂອກາດດັ່ງກ່າວ ທ່ານລັດຖະມົນຕີ ກະຊວງຍຸຕິທໍາ ໄດ້ສະແດງຄວາມຮູ້ບຸນຄຸນຕໍ່ການນໍາແຂວງ ທີ່ໄດ້ໃຫ້ການໃກ້ຊິດຕິດແທດ ແລະຊີ້ນໍາວຽກງານຂອງຂະແໜງຍຸຕິທໍາຕະຫຼອດໄລຍະຜ່ານມາ ແລະຫວັງຢ່າງຍິ່ງວ່າ: ການນໍາແຂວງ ແລະພາກສ່ວນທີ່ກ່ຽວຂ້ອງຈະສຶບຕໍ່ໃຫ້ການສະໜັບສະໜູນວຽກງານຍຸຕິທໍາຂັ້ນແຂວງ ແລະເຂດໄດ້ດໍາເນີນໄປຢ່າງເຂັ້ມແຂງ.

ຊຶ່ງສໍາລັບການມາຢ້ຽມຢາມ ແລະເຮັດວຽກຢູ່ແຂວງຫຼວງພະບາງຄັ້ງນີ້, ຍັງໄດ້ນໍາເອົາວັດຖຸປັດໃຈອຸປະກອນຮັບໃຊ້ຫ້ອງການຈໍານວນໜຶ່ງສະໜັບສະໜູນຊ່ວຍເຫຼືອພະແນກຍຸຕິທໍາ ແຂວງຫຼວງພະບາງ ເປັນຕົ້ນແມ່ນ ເງີນສົດ 15 ລ້ານກີບ, ຄອມພິມເຕີ ຕັ້ງໂຕະ 2 ຊຸດ ແລະເຄື່ອງຮັບໃຊ້ກອງປະຊຸມວີດີໂອທາງໄກ 1 ຊຸດ ຕື່ມອີກ.

แชร์