ລັດຖະບານລາວ ຮ່ວມມືກັບອົງການສາກົນເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ

ກະຊວງແຮງງານ ແລະສະຫວັດດີການສັງຄົມຮ່ວມມືກັບອົງການສະຫະປະຊາຊາດເພື່ອການພັດທະນາປະຈຳ ສປປ ລາວ,ອົງການຮ່ວມມືສາກົນ ສ.ເກົາຫຼີ. ໄດ້ລົງນາມບົດບັນທຶກການປືກສາຫາລື ແລະຂໍ້ຕົກລົງກ່ຽວກັບໂຄງການສະໜັບສະໜູນເພື່ອສ້າງຄວາມຍືນຍົງໃຫ້ແກ່ວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ. ໃນວັນທີ 9 ພຶດສະພາ 2022 ທີ່ເຮືອນຮັບແຂກ ກະຊວງແຮງງານ ແລະສະຫວັດດີການສັງຄົມ, ຕາງໜ້າກະຊວງແຮງງານ ແລະສະຫວັດດີການສັງຄົມ ເຊັນໂດຍທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ,ຮອງປະທານ, ຜູ້ປະຈຳການ ຄຊກລ, ທ່ານ ນ. Myungjin KIM ຜູ້ຕາງໜ້າອົງການ KOICA ປະຈໍາ ສປປ ລາວ ແລະ ທ່ານ. Ricarda Rieger ຜູ້ຕາງໜ້າອົງການສະຫະປະຊາຊາດເພື່ອການພັດທະນາ ປະຈຳ ສປປ ລາວ, ກຽດເຂົ້າຮວ່ມຂອງ ທ່ານ Im Moo-Hong ເອກອັກຄະລັດຖະທູດ ແຫ່ງ ສາທາລະນະລັດເກົາຫຼີ ປະຈຳ ສປປ ລາວ ແລະບັນດາທ່ານຫົວໜ້າກົມ, ຮອງຫົວໜ້າກົມ, ແຂກຜູ້ມີກຽດທັງພາຍໃນແລະຕ່າງປະເທດເຂົ້າຮວ່ມເປັນສັກຂີພິຍານ.

ໂຄງການດັ່ງກ່າວ, ແມ່ນໄດ້ຮັບການສະໜັບສະໜູນຈາກລັດຖະບານ ສ. ເກົາຫຼີ ໂດຍຜ່ານອົງການຮ່ວມມືສາກົນ ສ.ເກົາຫຼີ (KOICA) ເປັນໄລຍະທີ , ມີມູນຄ່າສູງເຖິງ 11 ລ້ານໂດລາສະຫະລັດ, ເພື່ອສະໜັບສະໜູນຂະແໜງການແກ້ບັນຫາລະເບີດບໍ່ທັນແຕກເພື່ອຊ່ວຍເຫຼືອດ້ານມະນຸດສະທໍາໃຫ້ແກ່ປະຊາຊົນລາວທີ່ດໍາລົງຊີວີດໃນພື້ນທີ່ທີ່ໄດ້ຮັບຜົນກະທົບຈາກລະເບີດບໍ່ທັນແຕກທີ່ຕົກຄ້າງ, ຜ່ານການປະຕິບັດໂຄງການໃນໄລຍະຜ່ານມາແມ່ນໄດ້ຮັບປະສິດຕິພາບສູງ ແລະຮັບຜົນສຳເລັດເປັນຢ່າງດີ, ຈຶ່ງເຮັດໃຫ້ລັດຖະບານ ສ. ເກົາຫຼີ ພິຈາລະນາອະນຸມັດເພີ່ມງົບປະມານເຂົ້າໃນວຽກງານດັ່ງກ່າວຫຼາຍຂຶ້ນ.

ເປົ້າໝາຍຕົ້ນຕໍຂອງໂຄງການເພື່ອສ້າງຄວາມຍືນຍົງໃຫ້ແກ່ວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ (2022-2026)ນີ້, ຈະໄດ້ຮັບການກວດກູ້ດິນທີ່ເປັນບຸລິມະສິດຫຼາຍກວ່າເກົ່າເຂົ້າໃນການພັດທະນາເສດຖະກິດ-ສັງຄົມ, ການຮັບມືກັບໄພຂົ່ມຂູ່ຈາກລະເບີດບໍ່ທັນແຕກຂອງຊຸມຊົນຖືກຫຼຸດລົງ ແລະສິດຂອງຜູ້ປະສົບເຄາະຮ້າຍກໍ່ໄດ້ຮັບຜົນດີ. ໂຄງການດັ່ງກ່າວຈະຖືກຈັດຕັ້ງປະຕິບັດນີ້ເປັນສ່ວນໜຶ່ງຂອງລັດຖະບານແຫ່ງ ສປປ ລາວ ແລະວຽກງານການແກ້ໄຂບັນຫາ ລບຕ ຂອງ ອົງການສະຫະປະຊາຊາດເພື່ອການພັດທະນາປະຈຳ ສປປ ລາວ, ສະໜັບສະໜູນວຽກງານ ລບຕ ໃຫ້ມີປະສິດທິພາບ ແລະ ປະສິດທິຜົນ ເພື່ອປະກອບສ່ວນເຂົ້າໃນການບັນລຸເປົ້າໝາຍພັດທະນາແບບຍືນຍົງທີ 18 ແລະ ແຜນຍຸດທະສາດແຫ່ງຊາດ "ເສັ້ນທາງກ້າວສູ່ຄວາມປອດໄພ III"(2022-2026) ໂດຍຜ່ານການສະໜັບສະໜູນດ້ານແຜນງານ ແລະເຕັກນິກວິຊາການຈາກອົງການສະຫະປະຊາຊາດເພື່ອການພັດທະນາປະຈຳ ສປປ ລາວ.ໂຄງການດັ່ງກ່າວຈະປະຕິບັດແຜນການສຳຫຼວດ ແລະເກັບກູ້ໂດຍກອງກວດກູ້ເພື່ອມະນຸດສະທຳ ກອງທັບ 58 ຈໍານວນ 20 ທີມ, ການຫຼຸດຜ່ອນຄວາມສ່ຽງໄພຈາກລະເບີດ, ການເພີ່ມຂີດຄວາມສາມາດຂອງ ຄຊກລ ແລະດ້ານນິຕິກໍາຂອງຂະແໜງການໃຫ້ເຂັ້ມແຂງ.

ໃນພິທີ ທ່ານ ປະເດີມພອນ ສົນທະນີ ກ່າວມີຄຳເຫັນວ່າ: ນັບແຕ່ປີ 2015 ຊຶ່ງໄດ້ເລີ່ມຈັດຕັ້ງປະຕິບັດໂຄງການໄລຍະທີ 1 ຈົນຮອດປະຈຸບັນ ເປັນໂຄງການໄລຍະທີ 3 ລັດຖະບານ ສ.ເກົາຫຼີ ໄດ້ສະໜອງທຶນການຊ່ວຍເຫຼືອລ້າເຂົ້າໃນວຽກງານແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໂດຍຜ່ານອົງການສະຫະປະຊາຊາດ ເພື່ອການພັດທະນາ. ໂຄງການດັ່ງກ່າວແມ່ນມີຜົນສຳເລັດອັນໃຫຍ່ຫຼວງໃນການປະກອບສ່ວນເຂົ້າໃນບັນດາໜ້າວຽກທີ່ສຳຄັນຂອງວຽກງານແກ້ໄຂບັນຫາລະເບີດບໍ່ທັນທີ່ຕົກຄ້າງຢູ່ ສປປ ລາວ.

ສໍາລັບໂຄງການ ໄລຍະທີ 3 ນີ້ແມ່ນຈະສຸມໃສສ້າງຄວາມເຂັ້ມແຂງ ແລະຄວາມຍືນຍົງ ໃຫ້ແກ່ວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວໃນໄລຍະ 5 ປີຕໍ່ໜ້າເປັນຕົ້ນແມ່ນ:

- ສະໜັບສະໜູນວຽກງານການວາງແຜນຈັດລຽງບຸລິມະສິດຂອງວຽກງານການສຳຫຼວດ ແລະເກັບກູ້ລະເບີດບໍ່ທັນແຕກເພື່ອປົດປ່ອຍເນື້ອທີ່ດິນ;

- ສະໜັບສະໜູນວຽກງານໂຄສະນາສຶກສາເພື່ອຫຼຸດຜ່ອນຄວາມສ່ຽງຈາກບັນຫາລະເບີດບໍ່ທັນແຕກທີ່ຕົກຄ້າງໃຫ້ບັນດາກຸ່ມເປົ້າໝາຍທີ່ມີຄວາມສ່ຽງ;

- ປັບປຸງຂີດຄວາມອາດສາມາດຂອງຫ້ອງການ ຄຊກລ ໃນການຈັດຕັ້ງປະຕິບັດຍຸດທະສາດຂອງຂະແໜງການ (ການຕິດຕາມຊຸກຍູ້, ໃຫ້ຄຳແນະນຳ ແລະການຄວບຄຸມຄຸນນະພາບ), ການນໍາໃຊ້ຂໍ້ມູນ ແລະການລະດົມຂົນຂວາຍທຶນ;

- ສ້າງຄວາມເຂັ້ມແຂງໃຫ້ແກ່ກອງກວດກູ້ລະເບີດເພື່ອມະນຸດສະທຳກອງທັບດ້ານວຽກງານການສຳຫຼວດ ແລະກວດກູ້ພ້ອມທັງສະໜອງອຸປະກອນພາກສະໜາມໃຫ້ແກ່ທີມດັ່ງກ່າວ;

- ສະໜັບສະໜູນການປະຕິບັດພັນທະຂອງສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ, ການປົດປ່ອຍເນື້ອທີ່ດິນ ແລະການສະໜອງການບໍລິການອື່ນກ່ຽວກັບວຽກງານແກ້ໄຂບັນຫາ ລບຕ ໃນຊຸມຊົນ.”

ຕອນທ້າຍ ທ່ານ ປະເດີມພອນ ສົນທະນີ ໃນນາມຕາງໜ້າລັດຖະບານ ສປປ ລາວ, ກໍຄື ກະຊວງແຮງງານ ແລະ ສະຫວັດດີການສັງຄົມ ແລະຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ຍັງໄດ້ກ່າວ ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງມາຍັງລັດຖະບານສາທາລະນະລັດເກົາຫຼີ ທີ່ໄດ້ໃຫ້ການຊ່ວຍເຫຼືອງົບປະມານໃນໄລຍະຜ່ານມາຈົນຮອດປະຈຸບັນໃນການປະກອບເຂົ້າໃນວຽກງານແກ້ໄຂບັນຫາລະເບີດບໍ່ທັນແຕກທີ່ຕົກຄ້າງ ຢູ່ ສປປ ລາວ ແລະ ຫວັງຢ່າງຍິ່ງວ່າ ລັດຖະບານ ສ. ເກົາຫຼີ ຈະສືບຕໍ່ໃຫ້ການຊ່ວຍເຫຼືອອີກຕໍ່ໄປ. ພ້ອມທັງສະແດງຄວາມຂອບໃຈມາຍັງອົງການ ສປຊ ເພື່ອການພັດທະນາ ປະຈຳ ສປປ ລາວ ທີ່ໄດ້ເອົາໃຈໃສ່ໃນການສະໜັບສະໜູນລະດົມຂົນຂວາຍທຶນເພື່ອມາຮັບໃຊ້ວຽກງານການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ນຳອີກ.

แชร์