ຫຼວງນໍ້າທາສະເຫຼີມສະຫຼອງວັນປົດປ່ອຍແຂວງ ແລະວັນສ້າງຕັ້ງກໍາລັງປ້ອງກັນຄວາມສະຫງົບແຂວງຄົບຮອບ 60 ປີ

ໃນວັນທີ 6 ພຶດສະພາ 2022 ຢູ່ທີ່ຫໍວັດທະນະທໍາແຂວງຫຼວງນໍ້າທາຈັດພິທີສະເຫຼີມສະຫຼອງວັນປົດປ່ອຍຫຼວງນໍ້າທາວັນທີ 6 ພຶດສະພາ ປີ 1962 ແລະ ວັນສ້າງຕັ້ງກໍາລັງປ້ອງກັນຄວາມສະຫງົບແຂວງຫຼວງນໍ້າທາ ທີ 24 ພຶດສະພາ ປີ 1962 ຄົບຮອບ 60 ປີ, ໂດຍການເປັນປະທານຂອງທ່ານ ຄໍາໄຫຼ ສີປະເສີດ ກຳມະການສູນກາງພັກ ເລຂາພັກແຂວງເຈົ້າແຂວງໆຫຼວງນໍ້າທາ, ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ເຂົ້າຮວ່ມມີທ່ານ ພົນຕີ ຈັນທອງ ສອນຕະອາດ ຄະນະປະຈໍາພັກ, ຮອງລັດຖະມົນຕີກະຊວງປ້ອງກັນປະເທດ, ທ່ານ ພົນຕີ ຈັນສະແຫວງ ທິບຄຸນທອງ ຄະນະພັກ, ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ, ສະຫາຍ ຫຽວນດັງຮຸງ ຫົວໜ້າກົງສູນໃຫ່ຍ ແຫ່ງ ສສ ຫວຽດນາມ ແລະ ຜູ້ຕາງໜ້າທູດການທະຫານ ແຫ່ງ ສສ ຫວຽດນາມ ປະຈໍານະຄອນຫຼວງພະບາງ, ມີຮອງເລຂາພັກແຂວງ, ກຳມະການປະຈໍາພັກແຂວງ, ກຳມະການພັກແຂວງ, ມີສະມາຊິກສະພາແຫ່ງຊາດ, ສະພາປະຊາຊົນ, ເລຂາພັກເມືອງ, ຫົວໜ້າພະແນກຮອງພະແນກ, ພະນັກງານປະຕິບັດອາວຸໂສບໍານານ, ວິລະຊົນແຫ່ງຊາດ, ນັກຮົບແຂ່ງຂັນ,ນາຍ ແລະພົນທະຫານ, ນາຍ ແລະພົນຕໍາຫຼວດ,ລັດວິສາຫະກິດ, ອົງການປົກຄອງບ້ານ 8 ບ້ານເທດສະບານແຂວງ, ຄູ-ອາຈານ ຕະຫຼອດຮອດນັກຮຽນນັກສຶກສາເຂົ້າຮວ່ມ.

ທ່ານ ຄໍາໄຫຼ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫຼວງນໍ້າທາ, ປະທານປ້ອງກັນຊາດ - ປ້ອງກັນຄວາມສະຫງົບແຂວງ, ຂື້ນຜ່ານບົດຫວນຄືນມູນເຊື້ອ ວັນປົດປ່ອຍແຂວງຫຼວງນໍ້າທາ ຕະຫຼອດໄລຍະ 60 ປີຜ່ານມາ. ຊາດລາວເປັນຊາດໜຶ່ງ ທີ່ມີປະຫວັດສາດອັນສະຫງ່າອົງອາດແຫ່ງການກໍ່ຕັ້ງ ແລະ ປົກປັກຮັກສາປະເທດຊາດ ເປັນເວລາຫຼາຍພັນປີ,  ມາຮອດທ້າຍສັດຕະວັດທີ 19 ພວກຈັກກະພັດລ່າເມືອງຂຶ້ນຝຣັ່ງ ໄດ້ເຂົ້າມາຍຶດຄອງ ເອົາປະເທດລາວເປັນຫົວ ເມືອງຂຶ້ນ; ພາຍໃຕ້ແອກປົກຄອງຂອງພວກລ່າເມືອງຂຶ້ນຝຣັ່ງ ປະຊາຊົນລາວ ກໍ່ຄືປະຊາຊົນບັນດາເຜົ່າພາຍໃນແຂວງຫຼວງນໍ້າທາ, ໃນໄລຍະນີ້ ຢູ່ເຂດເມືອງໄຊ, ເມືອງຮຸນ ໄດ້ຮັບການປົດປ່ອຍ, ຕໍ່ໜ້າສະພາບການດັ່ງກ່າວຈັກກະພັດອາເມລິກາ ແລະ ລູກແຫຼ່ງຕີນມືຂອງພວກມັນ ໄດ້ຂົນກໍາລັງ ເຂົ້າມາແຂວງຫຼວງນໍ້າທາ ໃນທຸກດ້ານ, ເພື່ອຈັ້ງທ່າສູ້ຢັນກັບກອງທັບ ແລະປະຊາຊົນພາກເໜືອຂອງລາວ, ເພື່ອຫວັງບຽດຍືດເອົາທົ່ງພຽງຫຼວງນໍ້າທາເປັນຖານທີ່ໝັ້ນ  ແລະ ເປັນແປ້ນຢັນທີ່ແຂງແກ່ນ ເພື່ອບຸກໂຈມຕີເຂົ້າທາງພາກເໜືອຂອງປະເທດຫວຽດນາມ ແລະ ຕັດຂາດເສັ້ນທາງລຳລຽງຂົນສົ່ງຈາກຫວຽດນາມ ແລະ ຈີນ ເຂົ້າມາພາກເໜືອຂອງປະເທດເຮົາ. ໂດຍເຫັນໄດ້ກົນ ອຸບາຍດັ່ງກ່າວມາຮອດ ເດືອນມັງກອນ ປີ 1962 ສູນກາງພັກປະຊາຊົນປະຕີວັດລາວ ຈິ່ງຕົກລົງເປີດບັ້ນຮົບປົດປ່ອຍຫຼວງນໍ້າທາຂຶ້ນຢ່າງເປັນທາງການ, ໂດຍປະຕິບັດຕາມການຕົກລົງຂອງສູນກາງພັກ, ກອງທັບ ແລະ ປະຊາຊົນລາວທົ່ວປະເທດ, ເວົ້າລວມ; ເວົ້າສະເພາະ ແມ່ນກອງທັບ ແລະ ປະຊາຊົນບັນດາແຂວງພາກເໜືອຂອງລາວຈິ່ງຮີບຮ້ອນເຕົ້າໂຮມກຳລັງ, ອາວຸດລູກກະສູນ, ວັດຖຸອຸປະກອນ, ສະບຽງອາຫານ, ຍານພາຫະນະ ແລະເງື່ອນໄຂດ້ານຕ່າງໆໃຫ້ແກ່ບັ້ນຮົບປົດປ່ອຍຫຼວງນໍ້າທາ; ມາຮອດວັນທີ 7  ເມສາ 1962 ກອງບັນຊາການດ້ານຮົບໄດ້ຮັບການສ້າງຕັ້ງຂຶ້ນ,ຝ່າຍປະເທດລາວແມ່ນສະຫາຍ ສີສະຫວາດ ແກ້ວບຸນພັນ ເປັນຫົວໜ້າ ເສນາທິການກອງທັບປະຊາຊົນລາວ, ສະຫາຍ ຫຸມແພງ ເປັນຫົວໜ້າກອງບັນຊາການທະຫານພາກເໜືອຂອງລາວ ແລະສະຫາຍອື່ນໆ; ຝ່າຍຫວຽດນາມ ຜູ້ບັນຊາການສູງສຸດ ແມ່ນສະຫາຍ ພົ.ວ ເຈີນໂດະ ກໍາມະການສູນກາງພັກ, ເປັນຫົວໜ້າການເມືອງ, ພົ.ວ ບັງຢາງ ຜູ້ບັນ ຊາການທະຫານເຂດໄຕບັກ ທັງເປັນຜູ້ບັນຊາການທະຫານອາສາສະໝັກຫວຽດນາມ ປະຈໍາພາກເໜືອຂອງລາວ,  ພັ.ອ ຫງຽນຫີວອານ ເປັນຫົວໜ້າເສນາທິການ, ພັ.ອ ເຍືອງກື້ເຕີມ ເປັນຮອງການເມືອງ ແລະ ສະຫາຍ ພັ.ທ ບຸ່ງຝຸ່ງ ຮັບຜິດຊອບພາລາ; ກໍາລັງປະ ກອບອາວຸດທີ່ເຂົ້າຮ່ວມໃນຍຸດ ທະບັ້ນຮົບໃນຄັງນີ້ຝ່າຍປະເທດລາວມີກອງພັນທີ 2, ກອງພັນນ້ອຍ 701 ແລະ ກອງຮ້ອຍເອ ກະລາດຂອງກໍາລັງທະຫານທ້ອງຖິ່ນຈໍານວນໜຶ່ງ ຊຶ່ງນໍາໂດຍ ສະຫາຍ ຄໍາແພງ, ສະຫາຍ ສະຫຼອງ, ສະຫາຍ ຄໍາວົງ ວັນຄໍາ, ສະຫາຍ ອຸດອນ ລາດສະຫວ່າງ ເປັນຜູ້ບັນຊາ. ສ່ວນກໍາລັງທະຫານອາ ສາສະໝັກຫວຽດນາມ ປະກອບມີກອງພົນນ້ອຍ 316, ກອງພົນນ້ອຍ 335, ກອງພົນນ້ອຍທີ 1, ທີ 3 ທີ 4 ແລະ ກອງພົນນ້ອຍ 330 ການຫ້າງຫາກະກຽມດ້ານຕ່າງໆ ໄດ້ສໍາເລັດລົງ ແລະ ມາຮອດເວລາ 3 ໂມງເຊົ້າ ຂອງວັນທີ 6 ພືດສະພາ 1962. ບັ້ນຮົບປົດປ່ອຍຫຼວງນໍ້າທາເລີ່ມແຕກສຽງປືນ ໂດຍໃຊ້ກຳລັງໄຟບຸກໂຈມຕີ ຍິງທະລົ່ມໃສ່ຈຸດຕ່າງໆຂອງສັດຕູຢ່າງແຂງແຮງອັນເຮັດໃຫ້ກຳລັງຂອງສັດຕູຕົກຢູ່ໃນສະພາບກະວົນ, ກະວາຍ ແລະ ບໍ່ສາມາດຈັ້ງທ່າໄດ້. ກໍາລັງໄຟຂອງພວກເຮົາ ກໍ່ສາມາດຍືດໄດ້ບັນດາປ້ອມ ແລະ ໂປດຄ້າຍຂອງທະຫານສັດຕູຫຼາຍຈຸດເຊັ່ນ: ປ້ອມບ້ານຫ້ວຍຫົກ, ບ້ານນານ້ອຍ, ບ້ານປຸງ, ບ້ານນໍ້າປີກ ແລະເຂດຕາເວັນອອກສ່ຽງໃຕ້ຂອງທົ່ງພຽງເມືອງຫຼວງນໍ້າທາ; ມາຮອດເວລາ 12 ໂມງ 30 ນາທີ ຂອງວັນທີ 6 ພືດສະພາ 1962 ກອງບັນຊາການທະຫານຍຸດທະບັ້ນຮົບແນວລາວຮັກຊາດໄດ້ຍົກຍ້າຍຈາກຈຸດທີ່ຕັ້ງເກົ່າຍ້າຍເຂົ້າມາຢູ່ເທດສະບານເມືອງຫຼວງນໍ້າທາ, ເຂດສະໜາມບິນ ແລະ ເປັນເຈົ້າຂອງຄຸ້ມຄອງທົ່ງພຽງເມືອງຫຼວງນໍ້າທາໄດ້ຢ່າງສິ້ນເຊິງ.

ພາຍຫຼັງສິ້ນສຸດຍຸດທະບັ້ນຮົບປົດປ່ອຍຫຼວງນໍ້າທາກໍາລັງທະຫານປະເທດລາວ ແລະທະຫານອາສາສະໝັກຫວຽດນາມໄດ້ປັດເຂ່ຍພວກສັດຕູອອກຈາກວົງສູ້ຮົບໄດ້ 1.800 ຄົນ, ໃນນີ້ GM11 ຖືກດັບສູນໝົດກ້ຽງ, GM15 ແລະ GM18 ຖືກທໍາລາຍຢ່າງໜັກໜ່ວງ; ຈັບທະຫານສັດຕູເປັນສະເລີຍເສິກໄດ້ 1.432 ຄົນ, ຍຶດອາວຸດທຸກສະນິດໄດ້ 600 ກະບອກ, ລູກປືນໄດ້ 150 ໂຕນ, ຍິງເຮືອບິນຕົກ 4 ລໍາ, ປົດປ່ອຍດິນແດນໄດ້ 8.000 ກິໂລຕາແມັດ, ປົດປ່ອຍພົນລະເມືອງໄດ້ 76.000 ຄົນ, ມາຮອດວັນທີ 15 ພຶດສະພາ 1962 ສູນກາງພັກ, ກອງບັນຊາການສູງສຸດກອງທັບປົດປ່ອຍປະຊາຊົນລາວຈິ່ງໄດ້ມີຂໍ້ຕົກລົງສ້າງຕັ້ງກອງບັນຊາການທະຫານແຂວງຫຼວງນໍ້າທາຂຶ້ນໂດຍແມ່ນສະຫາຍ ສີສະຫວາດ ແກ້ວບຸນພັນ ເປັນຜູ້ປະກາດສ້າງຕັ້ງກອງບັນຊາການທະຫານແຂວງຫຼວງນໍ້າທາຂຶ້ນຢູ່ທີ່ບ້ານນໍ້າແງ້ນ ເມືອງຫຼວງນໍ້າທາ.

ໃນປັດຈຸບັນພື້ນຖານໂຄງລ່າງໄດ້ຮັບການປັບປຸງ ແລະກໍ່ສ້າງເຊັ່ນ: ໄດ້ປັບປຸງ ແລະກໍ່ສ້າງເສັ້ນທາງ, ໄຟຟ້າ, ນໍ້າປະປາ, ສຳນັກງານຫ້ອງການ, ໂຮງຮຽນ, ໂຮງໝໍ,  ສະໜາມບິນ ແລະກິດຈະການອື່ນໆ ໄດ້ຮັບການພັດທະນາດີຂື້ນ.

ຈາກນັ້ນທ່ານ ຈັນທອງ ແກ້ວປະເສີດ ຮອງເລຂາພັກແຂວງ ຜູ້ຊີ້ນໍາວຽກງານພັກ-ພະນັກງານ ຂື້ນຜ່ານເອກະສານຫວນຄືນມູນເຊື້ອວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນແຂວງຫຼວງນໍ້າທາດ້ວຍຄວາມເອກອ້າງທະນົງໃຈຕໍ່ຜົນງານ ແລະໄຊຊະນະອັນໃຫຍ່ຫຼວງທີ່ກໍາລັງປ້ອງກັນຄວາມສະຫງົບຂອງແຂວງຫຼວງນໍ້າທາຍາດມາໄດ້ ຕະຫຼອດໄລຍະ 60 ປີຜ່ານມາ, ໃນພິທີຍັງໄດ້ຮັບການສະໜັບໜູນ ປະກອບສວ່ນຊວ່ຍເຫຼຶອເປັນເງີນສົດໃນການຈັດພິທີສະເຫຼີມສະຫຼອງວັນປົດປ່ອຍແຂວງຫຼວງນໍ້າທາ 1 ຮອ້ຍລ້ານກີບ  ຄຶ: ກະຊວງປ້ອງກັນປະເທດ 30 ລ້ານກີບ, ກະຊວງປ້ອງກັນຄວາມສະຫງົບ 10 ລ້ານກີບ, ບໍລິສັດ ຈະເລີນຊັບ ຍິ່ງຈະເລີນຈໍາກັດ ແຂວງຫຼວງນໍ້າທາ 20 ລ້ານກີບ, ບໍລິສັດ ໄຊພະຈັນ ກໍ່ສ້າງຈໍາກັດ 20 ລ້ານກີບ, ໂຮງໝໍຟູຢູທາງ 20 ລ້ານກີບ.

 

แชร์