ທ່ານ ຄຳພັນ ພົມມະທັດ ພ້ອມດ້ວຍຄະນະເຄື່ອນໄຫວວຽກງານຢູ່ແຂວງຜົ້ງສາລີ

ໃນລະຫ່ວາງວັນທີ 5-6 ພຶດສະພາ 2022 ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງພ້ອມດ້ວຍຄະນະໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ ໂດຍມີທ່ານ ບົວທອງ ອຸແສງຄຳ ຮອງເລຂາພັກແຂວງ, ຜູ້ຊີ້ນຳວຽກງານຂົງເຂດພັກພະນັກງານຂັ້ນແຂວງ, ພ້ອມດ້ວຍການນໍາຫຼັກແຫຼ່ງຂອງແຂວງໃຫ້ການຕ້ອນຮັບຢ່າງອົບອຸ່ນ,  

ໂອກາດນີ້ ທ່ານ ຄຳພັນ ພົມມະທັດ ພ້ອມດ້ວຍຄະນະ ກໍ່ໄດ້ຮັບຟັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງແຂວງ ຈາກທ່ານ ບົວທອງ ອຸແສງຄຳ ຮອງ ເລຂາພັກແຂວງ ເຊີ່ງທ່ານໄດ້ຍົກໃຫ້ເຫັນການຊີ້ນຳໆພາ ແລະ ສະພາບຈຸດພິເສດທີ່ຕັ້ງຂອງແຂວງ ຊຶ່ງແຂວງຜົ້ງສາລີເປັນແຂວງໜຶ່ງທີຕັ້ງຢູ່ເໜືອສຸດຂອງ ສປປ ລາວ, ມີເນື້ອທີທັງໝົດ 16.270 ກິໂລຕາແມັດ ມີ 7 ເມືອງ, 57 ກຸ່ມບ້ານ, ມີ 508 ບ້ານ, 42.886 ຄອບຄົວ, ພົນລະເມືອງ 194.056 ຄົນ, ຍິງ 95.336 ຄົນ, ມີ 15 ຊົນເຜົ່າ. ມາຮອດປັດຈຸບັນມີເສັ້ນທາງເຂົ້າເຖິ່ງທຸກໆ ບ້ານໃນທົ່ວແຂວງ, ໃນນັ້ນ ບ້ານທີມີເສັ້ນທາງທ່ຽວໄດ້ລະດູດຽວມີ 175 ບ້ານ, ເສັ້ນທາງທ່ຽວໄດ້ 2 ລະດູມີ 333 ບ້ານ; ບ້ານທີ່ໄດ້ຊົມໃຊ້ໄຟຟ້າລັດມີ 341 ບ້ານ; ມີຊາຍແດນຕິດຈອດກັບ 2 ປະເທດເພື່ອນບ້ານຄື: ສສ ຫວຽດນາມ ກັບ ສປ ຈີນ, ສະພາບທີຕັ້ງພູມສັນຖານຂອງແຂວງຜົ້ງສາລີເປັນພູສູງຊັນ, ເຫວເລີກ, ການຕັ້ງບ້ານກະແຈກກະຈາຍ, ຈຸດເລີ່ມຕົ້ນຂອງການພັດທະນາຕໍ່າ, ພຶ້ນຖານໂຄງລ່າງຈໍາເປັນແກ່ການພັດທະນາເສດຖະກີດ-ສັງຄົມບໍ່ທັນຕອບສະໜອງໄດ້, ຄວາມທຸກຍາກຂອງປະຊາຊົນຍັງກວມອັດຕາສ່ວນສູງ, ການຫັນປ່ຽນແນວຄິດຄອງເດີມກໍ່ຄືແບບແຜນວິທີຊີວິດຂອງປະຊາຊົນຈໍານວນໜຶ່ງຍັງຊັກຊ້າ, ຄວາມອາດສາມາດສະໜອງດ້ານທຶນຮອນຈາກພາກລັດເມືອທຽບກັບຄວາມຮຽກຮ້ອງຕ້ອງການແມ່ນຍັງຈໍາກັດຫຼາຍ ແລະ ອື່ນໆ. ແຕ່ໂດຍພາຍໃຕ້ການຊີ້ນໍາ-ນໍາພາຂອງຄະນະພັກ, ອົງການປົກຄອງແຕ່ລະຂັ້ນເຮັດໃຫ້ແຂວງຜົ້ງສາລີສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ເສດຖະກິດ-ສັງຄົມໄດ້ຮັບການພັດທະນາຖືກທິດ ແລະ ມີການຂະຫຍາຍຕົວດີຂຶ້ນເທື່ອລະກ້າວ ຊຶ່ງສະແດງອອກອັດຕາການເຕີບໂຕສະເລ່ຍຢູ່ໃນລະດັບ 6,10%, ລວມຍອດຜະລິດຕະພັນພາຍໃນ (GDP) ສະເລ່ຍໃສ່ຫົວຄົນບັນລຸ 1.123 ໂດລາສະຫະລັດ, ໂຄງປະກອບເສດຖະກິດຕາມຂະແໜງການກະສິກໍໍາ-ປ່າໄມ້ ກວມ 11,37%, ອຸດສາຫະກໍາ-ຫັດຖະກໍາ ກວມ 5,89%, ການບໍລິການກວມ 1,27% ຂອງລວມຍອດດຜະລິດຕະພັນພາຍໃນ. ວຽກງານປະເມີນຄວາມທຸກຍາກ ໄດ້ປະເມີນຕາມ ດໍາລັດ 348/ລບ ໃນປີ 2019 ທົ່ວແຂວງບ້ານ 516 ບ້ານ, ມີບ້ານພົ້ນທຸກ 117 ບ້ານ, ກວມ 22,67 %, ຄອບຄົວພົ້ນທຸກ 12.015 ຄອບຄົວ, ກວມ 34,19% ແລະ ຄອບຄົວພັດທະນາ 2.862 ຄອບຄົວ ກວມ 8,14%. ປະຈຸບັນສືບຕໍ່ສູ້ຊົນແກ້ໄຂຄວາມທຸກຍາກໃຫ້ໄດ້ 128 ບ້ານ ແລະ ຄອບຄົວທຸກຍາກໃຫ້ໄດ້ 7.040 ຄອບຄົວ; ພ້ອມກັນນັ້ນກໍ່ພວມສຸມໃສ່ຈັດຕັ້ງປະຕິບັດ 2 ວາລະແຫ່ງຊາດຢ່າງແຂງແຮງ ແລະ ເປັນບຸລິມະສິດທີ່ສຳຄັນ, ວຽກງານໂຄງການກໍ່ສ້າງ ແລະ ຍົກຍ້າຍເທດສະບານແຂວງ: ໄດ້ເອົາໃຈໃສ່ຊີ້ນໍາຈັດຕັ້ງປະຕິບັດຕາມສັນຍາການຄ້າ ແລະ ມາຮອດປະຈຸບັນມີຄວາມຄືບໜ້າແຕ່ລະໜ້າວຽກຄື: ການກໍ່ສ້າງເສັ້ນທາງມີຄວາມຄືບໜ້າສະເລ່ຍ 56,9%;  ກໍ່ສ້າງຂົວ 4 ແຫ່ງ ຄືບໜ້າ 73,10 %; ກໍ່ສ້າງລະບົບຕາຂ່າຍ ຄືບໜ້າ 58,59 %; ກໍ່ສ້າງລະບົບນ້ຳປະປາ ຄືບໜ້າ 82,13 %; ກໍ່ສ້າງສະໜາມກິລາແຫ່ງໃໝ່ ຄືບໜ້າ 27,32%;  ກໍ່ສ້າງສວນສາທາລະນະ ແລະ ສິ່ງອຳນວຍຄວາມສະດວກ ຄືບໜ້າ 5%; ກໍ່ສ້າງສໍານັກງານຫ້ອງການ 18 ຫຼັງ ສະເລ່ຍຄືບໜ້າ 36,85%;  ພ້ອມກັນນັ້ນລັດຖະບານໄດ້ອະນຸມັດງົບປະມານທັງໝົດ 150,44 ຕື້ກີບ, ໃນນີ້: ຊົດເຊີຍເວນຄືນຜົນກະທົບບັນດາໂຄງການກໍ່ສ້າງຕ່າງໆ ຈໍານວນ 58,28 ຕື້ກີບ.

ໃນໂອກາດນີ້, ທ່ານ ຄຳພັນ ພົມມະທັດ ກໍ່ໄດ້ມີຄຳເຫັນໂອ້ ຊຶ່ງກ່ອນອື່ນ ທ່ານ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ທີ່ທັງແຂວງຜົ້ງສາລີຍາດມາໄດ້ໃນໄລຍະທີ່ຜ່ານ ຊຶ່ງທັງໝົດນັ້ນແມ່ນ ຍ້ອນຄວາມເອົາໃຈໃສ່ຂອງການນຳແຂວງ ກໍຄືອໍານາດການປົກຄອງແຕ່ລະຂັ້ນໄດ້ ຊີ້ນຳ-ນໍາພາ ແລະ ທ່ານໄດ້ເນັ້ນໃຫ້ການນຳ, ພະນັກງງານຫຼັກແຫຼ່ງທຸກຂັ້ນ ຈົ່ງພ້ອມກັນສຸມທຸກວິທີການເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງແຂວງໃຫ້ບັນລຸຕາມແຜນການທີ່ວາງໄວ້, ພ້ອມກັນນັ້ນຈົ່ງເອົາໃຈໃສ່ແກ້ໄຂບັນຫາທີ່ຍັງຄົງຄ້າງທີ່ໄດ້ຍົກຂຶ້ນ ມາໃນບົດສະຫຼຸບ ໃຫ້ເບິ່ງບັນຫາຢ່າງເລິກຊຶ່ງຖືກຈຸດ, ແກ້ໄຂຖືກປະເດັນ ແລະ ເຂັ້ມງວດ, ເອົາໃຈໃສ່ການຈັດຕັ້ງປະຕິບັດ 2 ວາລະແຫ່ງຊາດໃຫ້ເລິກຊຶ່ງ, ເພີ່ມທະວີຈັດຕັ້ງ ປະຕິບັດບົດບາດຂອງວຽກງານກວດກາຂອງພັກຕາມເນື້ອໃນຈິດໃຈມະຕິກອງປະຊຸມໃຫຍ່ ຄັ້ງທີ XI ຂອງພັກ ເພື່ອສ້າງໃຫ້ການເຄື່ອນໄຫວວຽກງານຮອບດ້ານທຸກຂະແໜງການໄດ້ຮັບປະສິດທິພາບ ແລະ ປະສິດທິຜົນ; ຄະນະພັກ ແຕ່ລະຂັ້ນຕ້ອງມີຄວາມຮັບຜິດຊອບຕໍ່ວຽກງານຕິດຕາມ, ກວດກາຢ່າງແຂງແຮງ ແລະ ສ້າງເງື່ອນໄຂເຮັດໃຫ້ ວຽກງານຕິດຕາມ, ກວດກາພັກມີຄວາມເຂັ້ມແຂງ ແລະ ໄດ້ຮັບການຈັດຕັ້ງປະຕິບັດຢ່າງຖືກຕ້ອງ.

ໃນໂອກາດທີ່ທ່ານ ຄພັນ ພົມມະທັດ ພ້ອມດ້ວຍຄະນະ ໄດ້ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີນີ້ ຍັງໄດ້ໄປທ່ຽວຊົມພື້ນຖານການຜະລິດຊາຢູ່ສວນຊາ 400 ປີ ບ້ານລຸງຈີ້ງ ແລະ ທ່ຽວຊົມ ກາບໄຫວ້ພະທາດມີ່ງຂວັນພູຟ້າ ຊຶ່ງເປັນພະທາດຄູ່ບ້ານຄູ່ເມືອງຂອງຊາວເມືອງຜົ້ງສາລີຕື່ມອີກ.

แชร์