ປະທານສະພາແຫ່ງຊາດພົບປະໂອ້ລົມການນໍາ ແຂວງເຊກອງ

ໃນວັນທີ 4 ພຶດສະພາ 2022 ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ພ້ອມຄະນະໄດ້ເຄື່ອນໄຫວຢ້ຽມຢາມ ແລະ ພົບປະໂອ້ລົມຄະນະພັກ-ພະນັກງານນໍາພາຫຼັກແຫຼ່ງແຂວງເຊກອງ ໂດຍມີທ່ານ ນາງ ຈັນຫອມ ຮອງເລຂາພັກແຂວງເຊກອງ, ມີບັນດາສະຫາຍໃນຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ ແລະ ພະນັກງານການນໍາຫຼັກແຫຼ່ງເຂົ້າຮ່ວມ.

      ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ໄດ້ລາຍງານສະພາບການພັດທະນາເສດ ຖະກິດ-ສັງຄົມຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ; ການປະຕິບັດມາດຕະການປ້ອງ ກັນຄວບຄຸມ ແລະແກ້ໄຂການລະບາດພະຍາດໂຄວິດ-19, ມາດຕະການຊຸກຍູ້ການທ່ອງທ່ຽວສີຂຽວຢູ່ແຂວງເຊກອງ; ນອກຈາກນີ້ ທ່ານ ດົງເພັດ ພະຍົນ ປະທານສະພາປະຊາຊົນແຂວງ ຍັງໄດ້ລາຍງານສະພາບການເບື້ອງຕົ້ນໃນການຊຸກຍູ້ ແລະຕິດຕາມການຈັດຕັ້ງປະຕິບັດມະຕິກອງປະຊຸມສະໄມວິສາມັນ ເທື່ອທີ 1 ຂອງສະພາແຫ່ງຊາດຊຸດທີ IX ກ່ຽວ ກັບການຮັບຮອງເອົາວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດ ຖະກິດ-ການເງິນ ແລະວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ.

     ໃນໂອກາດນີ້ ທ່ານ ໄຊສົມພອນ ພົມວິຫານ ໄດ້ຍ້ອງຍໍຊົມ ເຊີຍຕໍ່ຜົນສໍາເລັດທີ່ແຂວງເຊກອງຍາດມາໄດ້, ພ້ອມນັ້ນທ່ານປະ ທານສະພາແຫ່ງຊາດ ຍັງໄດ້ໂອ້ລົມ ແລະ ເນັ້ນໜັກບັນຫາສໍາຄັນ ເປັນຕົ້ນ ວຽກງານການພັດທະນາເສດຖະກິດ-ສັງຄົມ; ການຈັດຕັ້ງປະຕິບັດ 2 ວາລະແຫ່ງຊາດ ແລະ ມາດຕະການຕ້ານກັບການລະບາດຂອງພະຍາດໂຄວິດ-19 ຕິດພັນກັບການຈັດຕັ້ງປະຕິບັດແຜນການທ່ອງທ່ຽວສີຂຽວ, ເຊິ່ງຮຽກຮ້ອງໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີຄວາມເອົາໃຈໃສ່ ຈັດຕັ້ງຜັນຂະຫຍາຍແນວທາງປ້ອງກັນຊາດ- ປ້ອງກັນຄວາມສະຫງົບ ທົ່ວປວງຊົນຮອບດ້ານຢ່າງທົ່ວເຖິງ ແລະ ເລິກເຊິ່ງ; ຊີ້ນໍາຂະແໜງການທີ່ກ່ຽວຂ້ອງຂອງແຂວງ ນໍາໃຊ້ທ່າແຮງບົ່ມຊ້ອນຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ,ຖືວາລະແຫ່ງຊາດ ເປັນພາລະກິດທົ່ວປ່ວງຊົນ, ພ້ອມນັ້ນໃຫ້ເພີ່ມທະວີການນໍາພາຊີ້ນໍາ ວຽກງານການພັດທະນາຊັບ ພະຍາກອນມະນຸດ ໃຫ້ໄປຕາມແຜນພັດທະນາເສດຖະກິດ-ສັງຄົມຂອງແຂວງວາງອອກ ທັງຮັບປະກັນຄຸນນະພາບພ້ອມທັງຊີ້ນໍາ ຂະແໜງການທີ່ກ່ຽວຂ້ອງ ເອົາໃຈໃສ່ການສະກັດກັ້ນພະຍາດໂຄວິດ-19 ດ້ວຍຄວາມຮັບຜິດຊອບສູງ; ສໍາລັບວຽກງານສະພາ ໃຫ້ເພີ່ມທະວີການປະຕິບັດໜ້າທີ່ຂອງສະພາປະຊາຊົນແຂວງ ໃນການເປັນຕົວແທນໃຫ້ແກ່ປະ ຊາຊົນບັນດາເຜົ່າຂອງແຂວງ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ, ກະກຽມເນື້ອໃນກອງປະຊຸມສະໄໝສາມັນຂອງສະພາປະຊາຊົນແຂວງ ເພື່ອພິຈາລະນາຮັບຮອງເອົາບັນຫາສໍາຄັນຂອງແຂວງ, ລວມທັງການເຄື່ອນໄຫວຕິດຕາມກວດກາຂອງສະພາປະຊາຊົນແຂວງເຊກອງ ຊຶ່ງຈະເປັນຂໍ້ມູນໃຫ້ຄະນະພັກແຂວງ ໃນການປັບປຸງແກ້ໄຂບັນຫາຕ່າງໆໄດ້ຢ່າງຖືກຕ້ອງ; ມີີການປະສາສົມທົບວຽກງານ ລະຫວ່າງ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກັບສະພາປະ ຊາຊົນແຂວງ, ເພື່ອປະຕິບັດ  ໜ້າທີ່ເປັນຕົວແທນແຫ່ງສິດແລະຜົນປະໂຫຍດຂອງປະຊາຊົນບັນດາເຜົ່າຢູ່ແຂວງຂອງຕົນໃຫ້ມີປະສິດທິພາບແລະໄດ້ຮັບຜົນສໍາເລັດສູງ, ນອກຈາກນີ້ ການຈັດຕັ້ງປະຕິບັດແຜນການທ່ອງທ່ຽວສີຂຽວ ກໍເປັນວິທີການໜຶ່ງໃນການຟື້ນຟູເສດຖະກິດຂອງປະເທດເຮົາໃຫ້ຄືນສູ່ສະພາບປົກກະຕິ ພາຍຫຼັງສະພາບການລະບາດຂອງພະຍາດໂຄວິດ-19 ໄດ້ເບົາບາງ ແລະ ຫຼຸດລົງ. ຈຶ່ງສະເໜີໃຫ້ອໍານາດການປົກຄອງແຂວງ ນໍາພາຊີ້ນໍາພາກສ່ວນກ່ຽວຂ້ອງ ວາງແຜນ ການທ່ອງທ່ຽວສີຂຽວຂອງແຂວງ; ຄົ້ນຄວ້າ, ຜັນຂະຫຍາຍບັນດານິຕິກໍາທີ່ກ່ຽວຂ້ອງ ຂອງລັດຖະບານ ເພື່ອເຮັດໃຫ້ການຈັດຕັ້ງປະຕິບັດຢູ່ທ້ອງຖິ່ນຕົນ ມີຄວາມສອດຄ່ອງ ແລະ ໄດ້ຮັບຜົນສໍາເລັດ.

แชร์