ເປີດຊຸດບຳລຸງວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ພະນັກງານພັກ-ລັດ ຊຸດທີ XIX ສົກຮຽນ 2021-2022

ໃນວັນທີ 4 ເມສາ 2022 , ວິທະຍາຄານປ້ອງກັນຊາດ ໄກສອນ ພົມວິຫານ ໄດ້ເປີດຊຸດບຳລຸງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ພະນັກງານພັກ-ລັດ ຊຸດທີ XIX ສົກ 2021-2022, ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກຮອງນາຍົກລັດຖະມົນຕີ, ລັດ​ຖະມົນຕີກະຊວງປ້ອງກັນປະເທດ, ມີຄະນະພັກ-ຄະນະບັນຊາ ວປກ, ພະນັກງານ, ຄູອາຈານ ແລະນັກສຶກສາການນຳພັກ-ລັດ ເຂົ້າຮ່ວມ.

ສະຫາຍ ພົນຈັດຕະວາ ປອ ສົງກາ ບຸນຄຸນ ຮອງຫົວໜ້າການທະຫານ ຫົວໜ້າກົມອົບຮົມ-ກໍ່ສ້າງ ວິທະຍາຄານປ້ອງກັນຊາດ ໄກສອນພົມວິຫານ ໄດ້ຂື້ນຜ່ານແຜນການບຳລຸງວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ການນຳພັກ-ລັດ ໄລຍະ 64 ວັນ ຊຸດທີ XIX ປະຈຳສົກຮຽນ 2021-2022 ມີຈໍານວນນັກສຶກສາການນໍາພັກ-ລັດ ຈໍານວນ 30 ສະຫາຍ, ໃນນັ້ນມາຈາກສູນກາງ 13 ສະຫາຍ ແລະທ້ອງຖິ່ນ 17 ຈຸດປະສົງເພື່ອເປັນການສຶບຕໍ່ຈັດຕັ້ງຜັນຂະຫຍາຍເເນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃນໄລຍະໃໝ່ ທີ່ມະຕິກອງປະຊຸມໃຫຍ່ຄັງທີ XI ຂອງພັກວາງອອກ, ທັງເປັນການຍົກສູງຄວາມຮັບຜິດຊອບເປັນເຈົ້າການ, ເອກະລາດ, ປະດິດສ້າງໃນການຄົ້ນຄວ້າຮໍ່າຮຽນທິດສະດີຫລັກການ ແລະສົມທົບບົດຮຽນພຶດຕິກຳຕົວຈິງຂອງອົງການ, ກົມກອງທ້ອງຖິ່ນ, ເນື້ອໃນທີ່ນຳມາອົບຮົມຄັ້ງນີ້ແບ່ງອອກເປັນ 3 ກຸ່ມຄື: ກຸ່ມເນື້ອໃນອົບຮົມຈຸດໜັກລວມມີ 17 ບົດ, ກຸ່ມເນື້ອໃນອົບຮົມເພີ່ມເຕີມຈຳນວນໜຶ່ງ, ຂຽນບົດເກັບກ່ຽວ, ເວລາອົບຮົມທັງໝົດ 64 ວັນ,  ອົບຮົມຮົມຕົວຈິງ 38 ວັນ, ວັນພັກ 20 ວັນ.

ໂອກາດດັ່ງກ່າວ, ສະຫາຍ ພົນເອກ ຈັນສະໝອນ ຈັນຍາລາດ ໄດ້ໃຫ້ກຽດໂອ້ລົມ ແລະຮຽກຮ້ອງໃຫ້ຄະນະ​ພັກ-ຄະນະອຳນວຍການ, ນັກສຶກສາການນຳພັກ-ລັດແຕ່ລະສະຫາຍຈົ່ງຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ເປັນເຈົ້າການປະດິດສ້າງໃນການຄົ້ນຄວ້າຮຳ່ຮຽນທາງດ້ານທິດສະດີຫຼັກການ ແລະສົມທຽບກັບພຶດຕິກຳຕົວຈິງ, ປະຕິບັດຖືກຕ້ອງຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ  ເປັນເອກະພາບໃນຂອບເຂດທົ່ວປະເທດ, ເອົາໃຈໃສ່ຈັດຕັ້ງປະຕິບັດແຜນການອົບຮົມໃຫ້ບັນລຸຕາມຈຸດປະສົງ ແລະຄາດໝາຍທີ່ກຳນົດໄວ້.

แชร์