ພິທີມອບ-ຮັບ ໃບຢັ້ງຢືນໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ຂອງກະຊວງການຕ່າງປະເທດ ປະຈໍາປີ 2021.

ໃນວັນທີ 04 ພຶດສະພາ 2022 ຢູ່ກະຊວງການຕ່າງປະເທດ ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ແກ່ບັນດາໜ່ວຍພັກທີ່ຂຶ້ນກັບອົງຄະນະພັກກະຊວງການຕ່າງປະເທດ ປະຈໍາປີ 2021 ຂຶ້ນໂດຍການເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການ​ກົມ​ການ​ເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ​ກະຊວງການຕ່າງປະເທດໂດຍມີບັນດາສະຫາຍຄະນະບໍລິຫານງານພັກ-ຄະນະນຳກະຊວງການຕ່າງປະເທດ, ຄະນະໜ່ວຍພັກ, ສະມາຊິກພັກເຂົ້າຮ່ວມທັງໝົດ 100 ສະຫາຍ.   

ໃນພິທີ ສະຫາຍ ໄມທອງ ທຳມະວົງສາ, ກໍາມະການພັກ,ຫົວໜ້າກົມຈັດຕັ້ງ ແລະພະນັກງານກະຊວງການຕ່າງປະເທດໄດ້ຂຶ້ນຜ່ານບົດສະຫຼຸບຕີລາຄາວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈໍາປີ 2021 ແລະ ທິດທາງກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2022 ໂດຍໄດ້ຍົກໃຫ້ເຫັນເຖິງຄວາມເອົາໃຈໃສ່ ແລະ ຄວາມຮັບຜິດຊອບສູງຂອງບັນດາໜ່ວຍພັກ ໃນການຈັດຕັ້ງປະຕິບັດແຜນການສ້າງໜ່ວຍພັກ, ປອດໃສ, ເຂັ້ມແຂງ, ໜັກແໜ້ນ, ມະຕິ, ຄຳສັ່ງ ແລະ ກົດລະບຽບພັກ ໄດ້ເປັນຢ່າງດີ ໂດຍສະເພາະແມ່ນ ຄໍາສັ່ງເລກທີ 01/ກມ ສພ, ລົງວັນທີ 03 ມັງກອນ 2018, ຄໍາສັ່ງຂອງຄະນະຈັດຕັ້ງສູນກາງພັກ ເລກທີ 291/ຄຈສພ, ລົງວັນທີ 26/4/2018 ແລະແຈ້ງການແນະນໍາສະບັບເລກທີ 0573 /ຄພ.ຕປທ, ລົງວັນທີ 30 ກໍລະກົດ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອອອກແຮງ ແລະ ປະຕິບັດສ້າງແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຂອງໜ່ວຍພັກ ອັນໄດ້ເຮັດໃຫ້ສະມາຊິກ​ພັກ​ ມີ​ຄຸນ​ທາດ​ການ​ເມືອງ, ມີ​ຄຸນສົມບັດ​ສິນ​ທໍາ​ປະຕິວັດ, ມີຄວາມຈົ່ງຮັກພັກດີຕໍ່​ອຸດົມ​ການ​ຂອງ​ພັກ, ຍົກສູງສະຕິ, ມີຄວາມຮັບຜິດຊອບຕໍ່ໜ້າທີ່ວຽກງານຂອງ​ຕົນ, ມີຄວາມເປັນເອກະພາບຕໍ່ແນວທາງປ່ຽນແປງໃໝ່ຂອງພັກ, ເປັນ​ເຈົ້າ​ການ​ປົກປ້ອງ​ແນວທາງ ແລະ ອຸດົມ​ການ​ຂອງ​ພັກ. ພ້ອມກັນນັ້ນກໍຍັງໄດ້ຍົກໃຫ້ເຫັນບາງຂໍ້ຄົງຄ້າງທີ່ບັນດາໜ່ວຍພັກຈະຕ້ອງໄດ້ເອົາໃຈໃສ່ ເພື່ອແນໃສ່ໃຫ້ສະ​ມາ​ຊິກ​ພັກ, ພະນັກງານ-ລັດ​ຖະ​ກອນ ເພີ່ມທະວີການສຶກ​ສາ ແລະ ຄົ້ນ​ຄ້ວາ​ ບັນດາ​ມະຕິ, ຄໍາ​ສັ່ງຂອງ​ຄະນະ​ພັກ​​​ຂັ້ນເທິງເພື່ອຈັດຕັ້ງປະຕິບັດໃຫ້ສອດຄ່ອງ ແລະຖືກຕ້ອງກັບແນວທາງນະໂຍບາຍຂອງພັກ.

ໃນພິທີດັ່ງກ່າວ ສະຫາຍ ຕິ່ງ ສຸກສັນ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງການຕ່າງປະເທດໄດ້ຂຶ້ນຜ່ານມະຕິຕົກລົງຂອງຄະນະບໍລິຫານງານພັກກະຊວງການຕ່າງປະເທດ ເລກທີ 212/ຄພ.ຕປທ, ລົງວັນທີ 24 ມີນາ 2022 ວ່າດ້ວຍການຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈຳປີ 2021 ເຊີ່ງມີບັນດາໜ່ວຍພັກທີ່ຖືກຮັບຮອງທັງໝົດ 34 ໜ່ວຍພັກ ທັງຢູ່ພາຍໃນ ແລະຕ່າງປະເທດ ຈາກທັງໝົດ 57 ໜ່ວຍພັກທີ່ຂຶ້ນກັບອົງຄະນະພັກກະຊວງການຕ່າງປະເທດ. ໃນນັ້ນ, ມີໜ່ວຍພັກທີ່ສາມາດປ້ອງກັນນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນໄດ້ V ສະໄໝ ມີ 2 ໜ່ວຍພັກ, ປ້ອງກັນໄດ້ IV ສະໄໝ ມີ 5 ໜ່ວຍພັກ, ປ້ອງກັນໄດ້ III ສະໄໝ ມີ 13 ໜ່ວຍພັກ ແລະໜ່ວຍພັກທີ່ສາມາດຍາດໄດ້ນາມມະຍົດໃໝ່ ມີ 14 ໜ່ວຍພັກ.        

ເປັນກຽດໃນພິທີ ສະຫາຍ ສະເຫຼີມໄຊ ກົມມະສິດ, ກຳມະການ​ກົມ​ການ​ເມືອງສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ​ກະຊວງການຕ່າງປະເທດກໍໄດ້ຂຶ້ນມອບໃບຢັ້ງຢືນໃຫ້ແກ່ບັນດາໜ່ວຍພັກທີ່ສາມາດຍາດໄດ້ນາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2021 ແລະໄດ້ໃຫ້ຄຳໂອວາດເພື່ອຊີ້ນໍາໃນການຈັດຕັ້ງປະຕິບັດໃນຕໍ່ໜ້າໃຫ້ແກ່ບັນດາສະຫາຍຄະນະໜ່ວຍພັກ, ສະມາຊິກພັກ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຄວາມເອົາໃຈໃສ່ ຂອງບັນດາສະຫາຍຄະນະໜ່ວຍພັກ ແລະ ສະມາຊິກພັກ-ພະນັກງານໃນບັນດາໜ່ວຍພັກທີ່ຂຶ້ນກັບອົງຄະນະພັກກະຊວງການຕ່າງປະເທດທີ່ໄດ້ເອົາໃຈໃສ່ໃນການປະຕິບັດໜ້າທີ່ ແລະ ແຜນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນດ້ວຍຜົນສໍາເລັດ ເຊີ່ງໄດ້ຍົກໃຫ້ເຫັນເຖິງຄວາມສໍາຄັນຂອງວຽກງານປັບປຸງກໍ່ສ້າງຮາກຖານພັກໄດ້ເປັນໜ້າທີ່ ແລະຄວາມຮັບຜິດຊອບໂດຍກົງຂອງຄະນະພັກ ແລະ ສະມາຊິກພັກ-ພະນັກງານທຸກຄົນ. ວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຕ້ອງຮັບປະກັນ 5 ຫຼັກການ ທີ່ກົມການເມືອງສູນກາງພັກວາງອອກ ແລະພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ.    

ບັນດາໜ່ວຍພັກອ້ອມຂ້າງກະຊວງການຕ່າງປະເທດກໍ່ໄດ້ໃຫ້ຄຳໝັ້ນສັນຍາວ່າຈະພ້ອມກັນສູ້ຊົນສືບຕໍ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃຫ້ດີ ແລະຫຼາຍກວ່າເກົ່າທັງດ້ານປະລິມານ ແລະຄຸນນະພາບໃນຕໍ່ໜ້າ.

• 04/05/2022