ຮອງນາຍົກ ລົງຊຸກຍູ້ສົ່ງເສີມການຜະລິດໄມ້ອັດຢູ່ບໍລິສັດບົວລະພາ

ໃນວັນທີ 3 ພຶດສະພາ ທີ່ຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີພ້ອມດ້ວຍຄະນະໄດ້ລົງເຄື່ອນໄຫວຢ້ຽມຢາມໂຮງງານຜະລິດໄມ້ອັດຈາກໄມ້ທີ່ປູກເອງ ບໍລິສັດບົວລະພາ ກະສິກຳປ່າໄມ້ ຈຳກັດ ຢູ່ເມືອງຫີນເຫີບ ແຂວງວຽງຈັນ ເພື່ອຊຸກຍູ້, ສົ່ງເສີມການຜະລິດໄມ້ແປຮູບ (ໄມ້ອັດ) ຂອງບໍລິສັດດັ່ງກ່າວໃຫ້ໄດ້ຮັບການພັດທະນາ ແລະ ສືບຕໍ່ຜະລິດສິນຄ້າໃຫ້ໄດ້ຄຸນນະພາບ, ໄດ້ມາດຕະຖານ ແລະສາມາດຕອບສະໜອງຕາມຄວາມຕ້ອງການຂອງສັງຄົມທັງພາຍໃນ ແລະຕ່າງປະເທດ.

ໂອກາດດັ່ງກ່າວ, ທ່ານນາງ ສຸໄພວັນ ທ່ຽງຈັນໄຊ ຮອງຜູ້ອໍານວຍການ ບໍລິສັດບົວລະພາ ກະສິກໍາປ່າໄມ້ ຈໍາກັດ ໄກ້ລາຍງານໃຫ້ຮູ້ວ່າ: ບໍລິສັດບົວລະພາກໍຄື ໂຮງງານຜະລິດໄມ້ອັດຈາກໄມ້ທີ່ປູກຂອງບໍລິສັດບົວລະພາກະສິກຳປ່າໄມ້ ຈຳກັດ ໂດຍນຳໃຊ້ກົນຈັກຕ່າງໆທີ່ທັນສະໄໝ ແລະໄດ້ມາດຕະຖານມານຳໃຊ້ເຂົ້າໃນຂະບວນການຜະລິດເຊິ່ງນັບແຕ່ເລີ່ມຕົ້ນຜະລິດໃນວັນທີ 1 ມິຖຸນາ 2021 ເປັນຕົ້ນມາ (ແລ່ນເຄື່ອງ 60%), ສາມາດຜະລິດໄມ້ອັດ ໄດ້ 200 ແມັດກ້ອນຕໍ່ມື (70 ພັນກວ່າແມັດກ້ອນຕໍ່ປີ), ມາຮອດປັດຈຸບັນ ສາມາດສົ່ງອອກ ໄດ້ທັງໝົດ 122 ຕູ້, 3 ລ້ານກວ່າແມັດກ້ອນ, ໃນນັ້ນສົ່ງອອກໄປຕະຫຼາດອົດສະຕຣາລີ, ອິນເດຍ, ໄທ, ອາເມລິກາ, ຢູໂຣບ ແລະການາດາເຊິ່ງຜະລິດຕະພັນ 90% ແມ່ນສົ່ງອອກ ແລະ 10% ແມ່ນຈໍາໜ່າຍຢູ່ພາຍໃນປະເທດ.

ທ່ານນາງ ສຸໄພວັນ ທ່ຽງຈັນໄຊ ຍັງໃຫ້ຮູ້ອີກວ່າ: ໄມ້ທີ່ນຳມາຜະລິດແມ່ນໄດ້ມາຈາກສ່ວນຂອງບໍລິສັດ 100%, ຊຶ່ບໍລິສັດມີຄວາມຕ້ອງການໄມ້ເຂົ້າໂຮງງານ 130.000-185.000 ແມັດກ້ອນຕໍ່ປີ ແລະໃນປີນີ້ບໍລິສັດມີແຜນຈະປູກໄມ້ໃຫ້ໄດ້ 700 ເຮັກຕາ ແລະຈະແຈກຢາຍເບ້ຍໄມ້ໃຫ້ປະຊາຊົນໃຫ້ໄດ້ 50-60 ພັນເບ້ຍ ແນ ໃສ່ສະໜອງໄມ້ເຂົ້າໂຮງງານໃຫ້ພຽງພໍກັບການຜະລິດ ໃນແຕ່ລະປີ, ທັງແນໃສ່ສ້າງວຽກເຮັດງານທຳໃຫ້ປະຊາຊົນພາຍໃນເມືອງຫີນເຫີບ ແຂວງວຽງຈັນ ໂດຍຄາດວ່າບໍລິສັດຈະສ້າງວຽກເຮັດງານທຳໃຫ້ປະຊາຊົນກໍຄືແຮງງານປິ່ນອ້ອມເປັນຕົ້ນແຮງງານປູກໄມ້, ຕັດໄມ້ ແລະອື່ນໆ ໃຫ້ໄດ້ 3 ພັນຄົນຕໍ່ປີ.

แชร์