ສປປ ລາວ ມອບຫລຽນໄຊພັດທະນາ ຊັ້ນ 2 ໃຫ້ທະນາຄານ ຮ່ວມທຸລະກິດລາວ-ຫວຽດ

ໃນໂອກາດທີ່ເດີນທາງໄປຢ້ຽມຢາມ ສສ ຫວຽດນາມ ເມື່ອບໍ່ດົນມານີ້, ທ່ານ ນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ພ້ອມຄະນະໄດ້ເຂົ້າຮ່ວມພິທີມອບຫລຽນໄຊແຮງງານຊັ້ນ 3 ຈາກລັດຖະບານ ສາທາລະນະລັດ ສັງຄົມນິຍົມ ຫວຽດນາມ ແລະ ຫລຽນໄຊອັນຊົງກຽດອື່ນໆອີກຫລາຍຫລຽນ ເນື່ອງໃນໂອກາດສະເຫລີມ ສະຫລອງ 65 ປີແຫ່ງວັນສ້າງຕັ້ງທະນາຄານການຄ້າຫຸ້ນສ່ວນ ລົງທຶນ ແລະ ພັດທະນາຫວຽດນາມ (BIDV) ໃນນັ້ນ, ທ່ານນາງ ປານີ ຢາທໍ່ຕູ້ ໄດ້ໃຫ້ກຽດມອບຫລຽນໄຊພັດທະນາຊັ້ນ 2 ໃຫ້ແກ່ຜູ້ຕາງຫນ້າຄະນະນຳ BIDV ທີ່ມີຜົນງານດີເດັ່ນ ໃນການປະກອບສ່ວນດ້ານວັດຖຸ ແລະ ທຶນຮອນເຂົ້າໃນການພັດທະນາເສດຖະກິດ-ສັງຄົມ ຢູ່ ສປປ ລາວ ຕາມດຳລັດຂອງປະທານປະເທດ ແຫ່ງ ສປປ ລາວ ສະບັບ ເລກທີ 041/ຄຕທ, ລົງວັນທີ 22/03/2022.

ໃນພິທີຄັ້ງນີ້, ມີການນຳຂອງພັກ ແລະ ລັດສາທາລະນະລັດ ສັງຄົມນິຍົມ ຫວຽດນາມ, ການນຳຂອງພັກ ແລະ ລັດ ແຫ່ງ ສປປ ລາວ, ຜູ້ນຳລັດຖະບານກຳປູເຈຍ, ຮ່ວມກັບການນຳຂັ້ນສູງສູນກາງ ແລະ ທ້ອງຖິ່ນ, ກະຊວງ, ສາຂາຂອງຫວຽດນາມ ແລະລາວ, ກຳປູເຈຍ, ລັດເຊຍ, ບັນດາລູກຄ້າ, ຄູ່ຮ່ວມງານ, ຄູ່ຮ່ວມທຸລະກິດທັງພາຍໃນ ແລະຕ່າງປະເທດເຂົ້າຮ່ວມ.

ຕະຫລອດໄລຍະ 65 ປີ ແຫ່ງການດຳເນີນທຸລະກິດການຄ້າ, ທະນາຄານແມ່ຂອງ ທະນາຄານ ຮ່ວມທຸລະກິດ ລາວ-ຫວຽດ ໄດ້ກາຍເປັນສະຖາບັນການເງິນທີ່ມີຫລາຍຮູບຫລາຍແບບ, ຫລາຍຂົງເຂດ, ປະຈຸບັນ BIDV ມີທຸລະກິດການທະນາຄານ, ປະກັນໄພ, ຫລັກຊັບ, ການລົງທຶນທາງດ້ານການເງິນ, ມີເຄືອຂ່າຍກວ້າງຂວາງ, ມີສາຂາພາຍໃນ ແລະຕ່າງປະເທດ 1.085 ສາຂາ, ຫ້ອງການທຸລະກໍາ, 10 ບໍລິສັດຍ່ອຍ ແລະມີການຄ້າໃນລາວ, ກໍາປູເຈຍ, ມຽນມາ, ລັດເຊຍ ແລະ ໄຕ້ຫວັນ.

ໃນໄລຍະຜ່ານມາ BIDV ກໍໄດ້ໄດ້ຮັບລາງວັນຈາກພັກ ແລະລັດຖະບານ ແຫ່ງ ສປປ ລາວ ໃນຫລາຍລະດັບເປັນຕົ້ນຫລຽນໄຊເອກະລາດ, ຫລຽນໄຊແຮງງານ, ຫລຽນໄຊມິດຕະພາບ ແລະອື່ນໆ


ຂໍ້ມູນ: ທະນາຄານຮ່ວມທຸລະກິດ ລາວ-ຫວຽດ ຈໍາກັດ

แชร์