ຜູ້ຍິງປືນ ແລະ ຜູ້ບຸກເບີກດິນ ບ້ານນາໂນອາດຖືກດຳເນີນຄະດີ

   ສືບຕໍ່ກັບເຫດການປະຊາຊົນຖືກດິນຟາມໄກ່ດົງໂດກຈໍານວນ 394 ຄອບຄົວ ດໍາເນີນການບຸກເບີກດິນເຂດບ້ານນາໂນ ເມືອງໄຊເສດຖາ ຈໍານວນ 15 ເຮັ ກຕາ ຊຶ່ງຖືກດິນສ່ວນບຸກຄົນ, ດິນກອງພັນ 988 ແລະດິນໂຄງການຈັດສັນ, ທີ່ສໍາຄັນແມ່ນບໍ່ໄດ້ຮັບອະນຸຍາດຈາກພັກ-ລັດ, ທັງມີການຝ່າຝືນແຈ້ງຫ້າມຊຶ່ງເປັນຕົ້ນເຫດເຮັດໃຫ້ເກີດມີບັນຫາປາກົດການຫຍໍ້ທໍ້ທາງສັງຄົມຊຶ່ງຜູ້ລະເມີດທີ່ລວມທັງເຈົ້າຂອງດິນຍິງປືນ ແລະຜູ້ບຸກເບີກຮອງເຈົ້າເມືອງໄຊເສດຖາລະບຸວ່າ ຜິດຕໍ່ລະບຽບກົດໝາຍ ແລະອາດຈະຖືກດຳເນີນຄະດີໃນທາງກົດໝາຍທັງນີ້ຂໍເວລານໍາປະຊາຊົນ 1 ເດືອນເພື່ອປຶກສາຫາລື ແລະຄົ້ນຄວ້າຫາທິດທາງໃນການແກ້ໄຂ.

  ທ່ານ ພຸດທະພອນ ໂຄດປັນຍາ ຮອງເຈົ້າເມືອງໄຊເສດຖາ ໃຫ້ສໍາພາດຕໍ່ສື່ມວນຊົນເມື່ອວັນທີ 19 ມີນາ ຕໍ່ກັບບັນຫາການບຸກເບີກດິນຂອງປະຊາຊົນເຂດບ້ານນາໂນຮູ້ວ່າ: ນັບແຕ່ຕົ້ນເດືອນມີນາມານີ້ປະຊາຊົນຖືກດິນຟາມໄກ່ດົງໂດກຈໍານວນໜຶ່ງໄດ້ບຸກເບີກດິນຢູ່ບ້ານນາໂນ ໂດຍບໍ່ໄດ້ຮັບອະນຸຍາດດ້ວຍການ ນໍາໃຊ້ລົດໄຖນາ 4 ຄັນເປັນພາຫະນະ, ເມື່ອເປັນແນວນັ້ນທາງຄະນະຮັບຜິດຊອບໄດ້ບອກພວກກ່ຽວຢຸດເຊົາ ແລະໃນວັນທີ 5 ມີນາ ເຈົ້າເມືອງໄຊເສດຖາອອກແຈ້ງການໃຫ້ຢຸດຕິການບຸກເບີກ, ຕໍ່ມາວັນທີ 12 ຄະນະກໍາມະການໄດ້ລົງສໍາຫຼວດພ້ອມເຮັດບົດບັນທຶກຮ່ວມກັບອໍານາດການປົກຄອງບ້ານ ແລະຜູ້ບຸກເບີກ, ໃນວັນທີ 17 ການບຸກເບີກຂອງປະຊາຊົນຍັງບໍ່ຢຸດເຊົາທັງມີການຝັງຮົ້ວແບ່ງກັນເປັນລັອກ ແລະກວມເອົາດິນຂອງປະຊາຊົນທີ່ມີໃບຕາດິນຈໍານວນໜຶ່ງສະນັ້ ນຈິ່ງເກີດມີບັນຫາການຖົກຖຽງກັນ ແລະໃຊ້ອາວຸດປືນຍິງນາບຄູ່. ບັນຫາດັ່ງກ່າວນີ້ທ່ານຮອງເຈົ້າເມືອງໄຊເສດຖາ ກ່າວວ່າຜິດຕໍ່ລະບຽບກົດໝາຍທັງຜູ້ບຸກ ເບີກດິນບໍ່ໄດ້ຮັບອະນຸຍາດ ແລະຜູ້ທີ່ໃຊ້ອາວຸດນາບຄູ່ຊຶ່ງທັງສອງຈະຖືກປະຕິບັດຕາມລະບຽບກົດໝາຍ.

   ສ່ວນສາເຫດການແກ່ຍາວຊົດເຊີຍເປັນເວລາເກືອບ 8 ປີ ແມ່ນຍ້ອນຂອດການປະສານງານເບື້ອງຕົ້ນມີການຊັກຊ້າ, ພະນັກງານທີ່ຖືກແຕ່ງຕັ້ງຮັບຜິດ ຊອບຈໍານວນໜຶ່ງຖືກຍົກຍ້າຍໄປປະຈໍາການບ່ອນອື່ນເຮັດໃຫ້ການປະສານງານບໍ່ເປັນໄປຕໍ່ນື່ອງ, ແຕ່ອໍານາດການປົກຄອງເມືອງກໍບໍ່ໄດ້ລົດລະປະປ່ອຍປະຊາ ຊົນ ແລະໄດ້ແກ້ໄຂມາເປັນ ແຕ່ລະໄລຍະຄືຄະນະກໍາມະການຮັບຜິດຊອບໄດ້ຄົ້ນຄວ້າ ແລະຕົກລົງເອົາຈຸດດັ່ງກ່າວເປັນບ່ອນຊົດເຊີຍໃຫ້ປະຊາຊົນໃນເນື້ອທີ່ 7 ເຮັກຕາ. 

  ສໍາລັບທິດທາງການແກ້ໄຂບັນຫາດັ່ງກ່າວທ່ານຮອງເຈົ້າເມືອງໄຊເສດຖາ ກ່າວວ່າ: ຈະຂໍເວລາ 1 ເດືອນ ເພື່ອໃຫ້ປະຊາຊົນຜູ້ເປັນເຈົ້າຂອງດິນ ຫຼື ພະນັກ ງານທຸກຍາກທີ່ອົງການຈັດຕັ້ງພັກ-ລັດ ໄດ້ອະນຸຍາດໃນເມື່ອກ່ອນນໍາເອົາເອກະສານເຂົ້າມາແຈ້ງຕໍ່ອໍານາດການປົກຄອງບ້ານເພື່ອຈະໄດ້ກວດກາຄືນວ່າເອກະ ສານທີ່ດິນດັ່ງກ່າວຖືກຕ້ອງ ແລະ ສອດຄ່ອງກັບນິຕິກໍາທີ່ລັດກໍານົດໃຫ້ ຫຼື ຍັງ ແລະມີການພັດທະນາແທ້ ຫຼື ບໍ່, ສ່ວນດິນທີ່ເຫຼືອບໍ່ມີເອກະສານຕ່າງໆແມ່ນຈະໄດ້ຈັດສັນໃຫ້ປະຊາຊົນທີ່ຖືກໂຄງການ ຫຼື ຟາມໄກ່ດົງໂດກ. ດັ່ງນັ້ນຈິ່ງຂໍຮຽກຮ້ອງນໍາປະຊາຊົນທີ່ຖືກຟາມໄກ່ດົງໂດກຈົ່ງອົດທົດລໍອີກເພາະປະຈຸບັນອໍານາດການປົກຄອງເມືອງກໍາລັງປະສານສົມທົບກັບນະຄອນຫຼວງ ແລະບັນດາກະຊວງໂດຍໃນວັນ 20 ມີນານີ້ ຈະມີກອງປະຊຸມປຶກສາຫາລືເພື່ອຊອກທິດທາງແກ້ໄຂ ແລະຈະລົງຕິດຕາມສໍາຫຼວດເພື່ອຈັດສັນທີ່ດິນໃຫ້ປະຊາຊົນຈໍານວນ 394 ຄອບຄົວທີ່ຖືກດິນຟາມໄກ່ດົງໂດກ.

ຂ່າວ: ກິ່ງລັດຕະນະ

แชร์