ສັກວັກຊີນກວມ 100% ຈຶ່ງຈະຮັບປະກັນໃຫ້ແກ່ການເປີດປະເທດ

ການສຳຫຼວດພື້ນທີ່ທ່ອງທ່ຽວສີຂຽວໃນນະຄອນຫຼວງວຽງຈັນ, ແຂວງວຽງຈັນ ແລະແຂວງຫຼວງພຣະບາງ ໄດ້ຂໍ້ສະຫຼຸບວ່າການເປີດປະເທດຈະຊ່ວຍໃຫ້ຂະແໜງການທ່ອງທ່ຽວ ແລະອຸດສາຫະກຳການບໍລິການກັບຄືນມາເປັນແຫຼ່ງລາຍຮັບຂອງ ສປປ ລາວ; ແຕ່ເພື່ອໃຫ້ບັນລຸຜົນດັ່ງກ່າວແມ່ນຕ້ອງສາມາດຄຸ້ມຄອງການໃຫ້ບໍລິການວັກຊີນ ແລະອັດຕາປົກຄຸມການສັກວັກຊີນເພື່ອປ້ອງກັນໂຄວິດ-19 ໃຫ້ຮັບປະກັນໄດ້ 100% ແລະຕ້ອງມີມາດຕະການປ້ອງກັນໃນລະດັບສູງສຸດໂດຍສະເພາະໃນເຂດທ່ອງທ່ຽວສີຂຽວ.

ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຮ້າຍແຮງໄປທົ່ວໂລກ, ໂດຍສະເພາະບັນດາປະເທດເອເຊຍຕາເວັນອອກ ແລະຕາເວັນອອກສຽງໃຕ້ຊຶ່ງມີຈຳນວນຜູ້ຕິດເຊື້ອ ແລະເສຍຊີວິດເພີ່ມຂຶ້ນຢ່າງໄວວາຈາກການລະບາດຮອບທີ2ນັບແຕ່ຕົ້ນປີ 2020 ເປັນຕົ້ນມາ. ສ່ວນທາງດ້ານເສດຖະກິດກໍ່ໄດ້ຮັບຄວາມເສຍຫາຍຢ່າງກວ້າງຂວາງ.

ສຳລັບ ສປປ ລາວ, ຮອດວັນທີ 22ກັນຍາ 2021 ເຫັນວ່າການຟື້ນຕົວຂອງເສດຖະກິດຊ້າລົງອັນເນື່ອງມາຈາກການລ໊ອກດາວນ໌ ແລະການໃຊ້ຈ່າຍຫຼຸດລົງ, ຊຶ່ງນະໂຍບາຍຫຼຸດຜ່ອນການແຜ່ລະບາດຂອງໂຄວິດໄດ້ຂັດຂວາງການຜະລິດ ແລະ ຈຳກັດການເຕີບໂຕດ້ານການຄ້າ, ການຂາຍຍ່ອຍ, ການຂົນສົ່ງ, ການບໍລິການທ່ອງທ່ຽວ. ການຫຼຸດຜ່ອນການເຄື່ອນໄຫວທາງດ້ານເສດຖະກິດເຮັດໃຫ້ການຫວ່າງງານເພີ່ມຂຶ້ນ ແລະລາຍໄດ້ຂອງຄົວເຮືອນກໍ່ຫຼຸດລົງໂດຍສະເພາະແມ່ນແມ່ຍິງທີ່ມີການສຶກສາຕໍ່າ, ອີກທັງຜົນກະທົບຈາກໂຄວິດ-19 ຍັງເຮັດໃຫ້ນັກທ່ອງທ່ຽວຕ້ອງຍົກເລີກ ຫຼືເລື່ອນການເດີນທາງເຂົ້າ ສປປ ລາວ.

ມາຮອດປັດຈຸບັນລັດຖະບານແຫ່ງ ສປປ ລາວ ກໍໄດ້ກະກຽມໃຫ້ແກ່ການເປີດປະເທດເຊັ່ນດຽວກັບບັນດາປະເທດໃນພາກພື້ນ ແລະທົ່ວໂລກເພື່ອຫຼຸດຜ່ອນຜົນກະທົບທາງດ້ານເສດຖະກິດ-ສັງຄົມ.ຢ່າງໃດກໍຕາມ, ການຟື້ນຕົວທາງເສດຖະກິດຂອງ ສປປ ລາວ ແມ່ນຂຶ້ນກັບນະໂຍບາຍສະໜັບສະໜູນພາກທຸລະກິດ ແລະຄົວເຮືອນເພື່ອປັບຕົວເຂົ້າກັບສະພາບ New normal.

ໂດຍປະຕິບັດຕາມແຜນຟື້ນຟູເສດຖະກິດຂອງລັດຖະບານ, ດັ່ງນັ້ນຂະແໜງການກ່ຽວຂ້ອງຈຶ່ງໄດ້ດຳເນີນການສຳຫຼວດພື້ນທີ່ທ່ອງທ່ຽວສີຂຽວໂດຍກຳນົດເອົາໃນນະຄອນຫຼວງວຽງຈັນ, ແຂວງວຽງຈັນ ແລະແຂວງຫຼວງພຣະບາງ, ການສຳຫຼວດໄດ້ເລີ່ມຕົ້ນມາແຕ່ເດືອນກຸມພາເຖິງເດືອເມສາ 2022. ທີມສຳຫຼວດດັ່ງກ່າວແມ່ນພາຍໃຕ້ການຊີ້ນຳ-ນຳພາຂອງຄະນະນຳກະຊວງສາທາລະນະສຸກ, ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ, ພາຍໃຕ້ການສະໜັບສະໜູນຂອງຄູ່ຮ່ວມພັດທະນາ UNICEF.ທັງນີ້, ກໍເພື່ອສຶກສາອັດຕາປົກຄຸມການສັກວັກຊີນປ້ອງກັນໂຄວິດ-19 ໃນພື້ນທີ່ທ່ອງທ່ຽວດັ່ງກ່າວ ແລະເພື່ອປະເມີນຄວາມຮູ້ຂອງຜູ້ໃຫ້ບໍລິການ ກ່ຽວກັບວັກຊີນໂຄວິດ-19, ທັງເພື່ອໃຫ້ຄຳແນະນຳເພື່ອກ້າວໄປສູ່ການຈັດຕັ້ງປະຕິບັດໄດ້. ທີ່ສຳຄັນແມ່ນເພື່ອເປັນຂໍ້ມູນໃນການເປີດປະເທດຮັບນັກທ່ອງທ່ຽວ ແລະ ກະຕຸ້ນເສດຖະກິດຂອງ ສປປ ລາວ.

ຜົນຈາກການສຳຫຼວດໃນຄັ້ງນີ້ຈຶ່ງມີບົດສະຫຼຸບ ແລະຄຳແນະນຳວ່າ 1) ເຖິງແມ່ນອັດຕາການສັກວັກຊີນປ້ອງກັນໂຄວິດ-19 ຈະກວມອັດຕາສູງ, ແຕ່ກົມກ່ຽວຂ້ອງຂອງກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວຄວນເອົາໃຈໃສ່ຕິດຕາມ ແລະ ໃຫ້ຜູ້ປະກອບການຕ້ອງສັກວັກຊີນເຂັມກະຕຸ້ນໃຫ້ໄດ້ 100%; 2) ໜ່ວຍງານສາທາລະນະສຸກ ຄວນເພີ່ມຕື່ມຂໍ້ມູນຂ່າວສານທາງອອນໄລນ໌, ເພາະຜູ້ເຂົ້າຮ່ວມການສຶກສາໄດ້ຮັບຂໍ້ມູນຂ່າວສານກ່ຽວກັບໂຄວິດ-19 ຜ່ານຊ່ອງທາງດັ່ງກ່າວສູງ; 3) ໂຄງການ 100% ສັກວັກຊີນໂຄວິດ-19 ໃຫ້ຜູ້ປະກອບການບໍລິການໃນພື້ນທີ່ທ່ອງທ່ຽວສີຂຽວຄວນໄດ້ຮັບການຈັດຕັ້ງປະຕິບັດ, ພະນັກງານທີ່ໃຫ້ບໍລິການຕ້ອງສັກວັກຊີນໂຄວິດ-19ຄົບ ແລະເຂັມກະຕຸ້ນຄົບຈຶ່ງອະນຸຍາດໃຫ້ລົງທະບຽນເປັນຜູ້ໃຫ້ບໍລິການໃນພື້ນທີ່ທ່ອງທ່ຽວສີຂຽວ ຢູ່ ສປປ ລາວ ໄດ້ ແລະ 4) ຜູ້ປະກອບການ ຄວນຊອກຂໍ້ມູນຂ່າວສານອັນໃໝ່, ຖືກຕ້ອງ ແລະທັນເຫດການກ່ຽວກັບພະຍາດໂຄວິດ-19 ເພື່ອປ້ອງກັນບໍ່ໃຫ້ພະນັກງານໃນສະຖານບໍລິການໄດ້ຮັບຂໍ້ມູນຜິດພາດ.

 

แชร์