ບໍລິສັດຈະເລີນຮ່ວມພັດທະນາກໍ່ສ້າງ ຊະນະປະມູນໂຄງການສ້າງສູນບຳບັດຜູ້ຕິດຢາເສບຕິດ ທີ່ເຊກອງ

ເມື່ອອາທິດທີ່ຜ່ານມາ, ກອງບັນຊາການປ້ອງກັນຄວາມສະຫງົບ ( ປກສ ) ແຂວງເຊກອງ, ໄດ້ຈັດກອງປະຊຸມເປີດຊອງປະມູນໂຄງການກໍ່ສ້າງຕາຂ່າຍໄຟຟ້າ 22 ກິໂລໂວນ 0,4 ກິໂລໂວນ ແລະ ຕິດຕັ້ງໜໍ້ແປງ 3P-100 KVA ພ້ອມທັງຕິດຕັ້ງໄຟຟ້າເຂົ້າໃນອາຄານ ແລະກໍ່ສ້າງສະໂຕໂດນໍ້າເຂົ້າສູນບໍາບັດຜູ້ຕິດຢາເສບຕິດເຊິ່ງຕັ້ງຢູ່ ບ້ານທົ່ງຫວາຍ, ເມືອງທ່າແຕງ, ແຂວງເຊກອງ. ໂດຍມີ ພັນເອກ ທະວິສັກ ເພັດພູຫຼວງ ຮອງຫົວໜ້າກອງບັນຊາການ ປກສ ແຂວງເຊກອງ, ມີຄະນະກໍາມະການຮັບຜິດຊອບການປະມູນຈັດຊື້-ຈັດຈ້າງຂັ້ນແຂວງ,ບັນດາບໍລິສັດ ແລະພາກສ່ວນກ່ຽວຂ້ອງເຂົ້າຮ່ວມ.

ການຈັດກອງປະຊຸມເປີດຊອງປະມູນ ໂຄງການກໍ່ສ້າງໃນຄັ້ງນີ້ ,ແມ່ນປະຕິບັດຕາມກົດໝາຍ ວ່າດ້ວຍການລົງທຶນ.ທັງເປັນການເປີດກວ້າງ, ຊອກຫາບໍລິສັດທີ່ມີມາດຖານ, ເງື່ອນໄຂໃນການປະຕິບັດໂຄງການ ເພື່ອໃຫ້ບັນລຸຕາມ ເປົ້າໝາຍທີ່ວາງໄວ້.

ທັງນີ້, ມີ 4 ບໍລິສັດໄດ້ເຂົ້າຮ່ວມການປະມູນດັ່ງກ່າວ; ຜ່ານການເປີດຊອງປະມູນ ແລະກວດກາບັນດາເອກະສານຕ່າງໆຂອງຄະນະກໍາມະການ, ໂດຍປະຊຸມໄດ້ເປັນເອກະພາບຮັບຮອງເອົາບໍລິສັດຈະເລີນຮ່ວມພັດທະນາກໍ່ສ້າງ ແລະຕິດຕັ້ງໄຟຟ້າ ຈໍາກັດ ເປັນຜູ້ຊະນະການປະມູນທີ່ມີມູນຄ່າ 489 ລ້ານກວ່າກີບ.

แชร์