4 ແຂວງພາກໃຕ້ ແລກປ່ຽນຄໍາເຫັນກ່ຽວກັບການແກ້ໄຂຜົນກວດສອບ

ເມື່ອວັນທີ 25 ເມສາ 2022 ທີ່ແຂວງຈໍາປາສັກ ໄດ້ຈັດກອງປະຊຸມແລກປ່ຽນຄໍາເຫັນຂອງ 4 ແຂວງພາກໃຕ້, ໂດຍການເປັນປະທານຮ່ວມລະຫວ່າງ ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ແລະທ່ານ ມະໄລທອງ ກົມມະສິດ ປະທານອົງການກວດສອບແຫ່ງລັດ. ເຂົ້າຮ່ວມໃນກອງປະຊຸມຄັ້ງນີ້ມີບັນດາຄະນະນໍາ 4 ຈາກແຂວງພາກໃຕ້ (ຈຳປາສັກ, ສາລະວັນ, ເຊກອງ ແລະ ອັດຕະປື) ພ້ອມດ້ວຍພະແນກການກ່ຽວຂ້ອງ, ຮອງປະທານອົງການກວດສອບແຫ່ງລັດ, ຄະນະນໍາອົງການກວດສອບປະຈໍາພາກໃຕ້ ແລະວິຊາການອົງການກວດສອບແຫ່ງລັດ.

ນອກຈາກການປຶກສາຫາລື, ແລກປ່ຽນ ແລະຖອດຖອນບົດຮຽນກ່ຽວກັບການແກ້ໄຂຜົນການກວດສອບ ແລະ ຕີລາຄາກ່ຽວກັບການແກ້ໄຂຜົນກວດສອບໃນໄລຍະຜ່ານມາແລ້ວ, ທີ່ປະຊຸມຍັງໄດ້ເນັ້ນໜັກກຽວກັບຄວາມໝາຍຄວາມສຳຄັນຂອງວຽກງານກວດສອບ,ເປົ້າໝາຍຂອງການກວດສອບ, ຂັ້ນຕອນ ແລະວິທີການການດຳເນີນການແກ້ໄຂຜົນການກວດສອບ. ໂດຍໄດ້ວິເຄາະບັນຫາ ແລະສາເຫດຂອງບັນຫາ, ພ້ອມທັງຍົກໃຫ້ເຫັນເຖິງຄວາມຈຳເປັນໃນການປັບປຸງການແກ້ໄຂຜົນການກວດສອບ.

ກອງປະຊຸມໄດ້ສະເໜີແນວຄວາມຄິດເພື່ອປັບປຸງແກ້ໄຂຜົນການກວດສອບ ແລະ ຍົກໃຫ້ເຫັນເນື້ອໃນນິຕິກຳລຸ່ມກົດໝາຍກ່ຽວກັບການແກ້ໄຂຜົນການກວດສອບ; ການປັບປຸງຄຸນນະພາບຂອງບົດສະຫຼຸບ (ບົດແຈ້ງ) ຜົນການກວດສອບ; ການປັບປຸງກົນໄກການປະສານງານ, ການປະສານສົມທົບ, ຕິດຕາມ-ຊຸກຍູ້ ແລະກວດຄືນການແກ້ໄຂຜົນການກວດສອບ ແລະການປະຕິບັດນະໂຍບາຍຕໍ່ການແກ້ໄຂທີ່ມີປະສິດທິຜົນ ແລະມາດຕະການຕໍ່ການເມີນເສີຍໃນການແກ້ໄຂຜົນການກວດສອບ.

ທັງນີ້, ບັນດາຄະນະນຳຈາກ 4 ແຂວງຈຳປາສັກ, ສາລະວັນ,  ເຊກອງ ແລະອັດຕາປືກໍ່ໄດ້ປະກອບຄໍາຄິດເຫັນ, ປຶກສາຫາລືແລກປ່ຽນ, ຖອດຖອນບົດຮຽນກ່ຽວກັບການປັບປຸງແກ້ໄຂຜົນການກວດສອບໃນໄລຍະຜ່ານມາ ແລະຍົກໃຫ້ເຫັນຈຸດດີ, ຈຸດອ່ອນ, ຂໍ້ຄົງຄ້າງ. ທັງສະເໜີວິທີການແກ້ໄຂຜົນການກວດສອບຢ່າງເປັນລະບົບເພື່ອນຳໄປສູ່ການແກ້ໄຂໄດ້ຢ່າງຂາດຕົວ.

• 27/04/2022