52 ບໍລິສັດ ເລີ່ມການຜະລິດໃນເຂດພັດທະນາກວມລວມໄຊເຊດຖາ

ປັດຈຸບັນ, ເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ, ມີຫົວໜ່ວຍທຸລະກິດທີ່ໄດ້ເຊັນສັນຍາເພື່ອເຂົ້າມາລົງທຶນທັງໝົດ 107 ບໍລິສັດ, ໃນນັ້ນ 52 ບໍລິສັດແມ່ນເລີ່ມທໍາການຜະລິດແລ້ວ ແລະ 55 ບໍລິສັດ ແມ່ນກໍາລັງກະກຽມເບື້ອງຕົ້ນ ແລະດໍາເນີນການກໍ່ສ້າງ.

ຂໍ້ມູນດັ່ງກ່າວໄດ້ຖືກລາຍງານໃນໂອກາດທີ່ ທ່ານ ບຸນທອງ ຈິດມະນີ ກຳມະການກົມການ ເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ພ້ອມຄະນະ, ໄດ້ເຄື່ອນໄຫວຢ້ຽມຢາມເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ເມື່ອວັນທີ 20 ເມສາ 2022, ໂດຍໃຫ້ການຕ້ອນຮັບຂອງ ທ່ານ ອານຸພາບ ຕຸນາລົມ ເລຂາຄະພັກນະຄອນຫຼວງວຽງຈັນ ປະທານສະພາປະຊາຊົນນະຄອນຫຼວງວຽງຈັນ, ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ, ພ້ອມຄະນະ ແລະພາກສ່ວນທີ່ກ່ຽວຂ້ອງ.

ທ່ານ ຂຽງຄຳ ພຸດຈັນທະວົງສາ ຮອງຜູ້ອຳນວຍການໃຫຍ່ບໍລິສັດຮ່ວມທຶນລາວ-ຈີນ ຈຳກັດ, ໄດ້ລາຍງານສະພາບລວມຂອງເຂດພັດທະນາກວມລວມໄຊເຊດຖາ ນະຄອນຫຼວງວຽງຈັນ ວ່າ: ເຂດພັດທະນາກວມລວມໄຊເຊດຖາແມ່ນໂຄງການຮ່ວມທຶນລະຫວ່າງອົງການປົກຄອງນະຄອນຫຼວງວຽງຈັນ ຕາງໜ້າລັດຖະບານ ແຫ່ງ ສປປ ລາວ ແລະ ບໍລິສັດລົງທຶນຕ່າງປະເທດແຂວງຢູນນານ ທີ່ຂຶ້ນກັບ ກຸ່ມບໍລິສັດ ກໍ່ສ້າງ ແລະ ລົງທຶນ ແຂວງຢູນນານ ຫຸ້ນສ່ວນຈໍາກັດ ຕາງໜ້າລັດຖະບານ ສປ ຈີນ, ເປັນເຂດທີ່ທັງສອງລັດຖະບານກໍານົດເປັນໂຄງການຮ່ວມມືລະດັບຊາດ, ເປັນໂຄງການທີ່ເປັນສັນຍະລັກມິດຕະພາບລະຫວ່າງສອງປະເທດ ລາວ-ຈີນ, ໄດ້ຮັບການເອົາໃຈໃສ່ ແລະ ໃຫ້ການສະໜັບສະໜູນຈາກລັດຖະບານສອງປະເທດ, ເປັນເຂດຮ່ວມມືເສດຖະກິດການຄ້າຕ່າງປະເທດຂອງ ສປ ຈີນ ແຫ່ງດຽວຢູ່ໃນລາວ ແລະ ຍັງເປັນເຂດເສດຖະກິດພິເສດຂອງ ສປປ ລາວ ຊຶ່ງຖືກຈັດເຂົ້າໃນຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ໂດຍຈັດເອົາເຂດພັດທະນາກວມລວມໄຊເຊດຖາເປັນໂຄງການກໍ່ສ້າງທີ່ສໍາຄັນຂອງສອງລັດຖະບານ.

ມາຮອດປັດຈຸບັນ, ເຂດພັດທະນາກວມລວມໄຊເຊດຖາ ໄດ້ສຳເລັດການພັດທະນາໄລຍະໜຶ່ງຄື: ສໍາເລັດການກໍ່ສ້າງໂຄງລ່າງພື້ນຖານເປັນຕົ້ນຖະໜົນຫົນທາງ, ນໍ້າປະປາ, ໄຟຟ້າ, ການສື່ສານ, ຫ້ອງການພາສີ ແລະ ສິ່ງອຳນວຍຄວາມສະດວກອື່ນໆ, ຂະນະນີ້ ກຳລັງສຸມໃສ່ກໍ່ສ້າງເຂດການຄ້າ-ການທ່ອງທ່ຽວ ແລະ ເຂດຕົວເມືອງໃໝ່ນະຄອນຫຼວງວຽງຈັນ. ສ່ວນໄລຍະທີສອງ ເພື່ອເປັນການປັບປຸງສິ່ງອຳນວຍຄວາມສະດວກຂອງໂຄງລ່າງພື້ນຖານ, ຊຶ່ງປັດຈຸບັນ ເຂດພັດທະນາໄດ້ມີການລົງທຶນໄປແລ້ວທັງໝົດ 1,3 ຕື້ໂດລາ. ໃນນັ້ນ, ລົງທຶນໃນໂຄງລ່າງພື້ນຖານປະມານ 600 ລ້ານໂດລາ, ມູນຄ່າລົງທຶນຂອງວິສາຫະກິດທີ່ລົງທຶນຢູ່ໃນເຂດລົງທຶນປະມານ 700 ລ້ານໂດລາ, ມີຫົວໜ່ວຍວິສາຫະກິດທີ່ໄດ້ເຊັນສັນຍາເພື່ອເຂົ້າມາລົງທຶນທັງໝົດ 107 ບໍລິສັດ, ໃນນີ້ ມີ 52 ບໍລິສັດທີ່ໄດ້ເລີ່ມທຳການຜະລິດແລ້ວ, ອີກ 55 ບໍລິສັດແມ່ນກໍາລັງກະກຽມເບື້ອງຕົ້ນ ແລະ ກໍາລັງດໍາເນີນການກໍ່ສ້າງຊຶ່ງເປັນນັກລົງທຶນທີ່ມາຈາກ 7 ປະເທດ ແລະ ພື້ນທີ່ເຊັ່ນ: ຈີນ, ໄທ, ຍີ່ປຸ່ນ, ມາເລເຊຍ, ສິງຄະໂປຣ໌, ລາວ ແລະ ສະຫະລັດອະເມຣິກາ.

ໂອກາດນີ້, ທ່ານ ບຸນທອງ  ຈິດມະນີ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບເຂດພັດທະນາກວມລວມໄຊເຊດຖາທີ່ສາມາດຈັດຕັ້ງປະຕິບັດສຳເລັດຫຼາຍໜ້າວຽກ ຊຶ່ງເຂດດັ່ງກ່າວໄດ້ສ່ອງແສງໃຫ້ເຫັນເຖິງມິດຕະພາບ ແລະ ສັນຍະລັກແຫ່ງການພົວພັນຮ່ວມມືລະຫວ່າງລາວ-ຈີນ. ທີ່ສຳຄັນແມ່ນສາມາດດຶງດູດຫຼາຍບໍລິສັດໃຫຍ່ໆຢູ່ຕ່າງປະເທດເຂົ້າມາລົງທຶນ, ອີກທັງເປັນບ່ອນສ້າງແຫຼ່ງລາຍຮັບໃຫ້ແກ່ນະຄອນຫຼວງວຽງຈັນກໍຄື ສປປ ລາວ. ທັງນີ້, ທ່ານກໍໄດ້ຮຽກຮ້ອງໃຫ້ຄະນະຮັບຜິດຊອບ ສືບຕໍ່ປະຕິບັດບັນດາໂຄງການໄລຍະສອງຕໍ່ໄປ,ສິ່ງສຳຄັນແມ່ນເຂດພັດທະນາກວມລວມໄຊເສດຖາຕ້ອງປະສານສົມທົບກັບຮາກຖານບ້ານເພື່ອຮ່ວມກັນປົກປັກຮັກສາສິ່ງແວດ ລ້ອມ, ລວມທັງວຽກງານຄວາມເປັນລະບຽບຮຽບຮ້ອຍ ແລະວຽກງານປ້ອງກັນຄວາມສະຫງົບສຸກຂອງປະຊາຊົນ.

ໂອກາດດຽວກັນ, ທ່ານ ບຸນທອງ ຈິດມະນີ ພ້ອມຄະນະ, ຍັງໄດ້ໄປຢ້ຽມຍາມບໍລິສັດເປີ້ຍເຕີເຄື່ອງນຸ່ງຫົ່ມ (ລາວ) ຈຳກັດ ແລະ ບໍລິສັດ ເປໂຕຣເຄມີລາວ ຈຳກັດ ທີ່ຕັ້ງຢູ່ໃນເຂດພັດທະນາກວມລວມໄຊເຊດຖາອີກດ້ວຍ.

แชร์