ນາຍົກລັດຖະມົນຕີ ສໍາເລັດການຮ່ວມປະຊຸມສຸດຍອດ ເອເຊຍ-ແປຊີຟິກ ວ່າດ້ວຍນຳ້ ຄັ້ງທີ 4 ທີ່ຍີ່ປຸ່ນ

ກອງປະຊຸມສຸດຍອດ ເອເຊຍ-ແປຊີຟິກ ວ່າດ້ວຍນຳ້ ຄັ້ງທີ 4 ໄດ້ໄຂຂຶ້ນຢ່າງເປັນທາງການ ໃນວັນທີ 23 ເມສາ 2022 ທີ່ເມືອງ ຄຸມາໂມໂຕະ ປະເທດຍີ່ປຸ່ນ, ພາຍໃຕ້ຫົວຂໍ້ “ນຳ້ເພື່ອການພັດທະນາແບບຍືນຍົງ-ບົດຮຽນທີ່ດີ ແລະ ອະນາຄົດຕໍ່ໄປ” ( Water for Sustainable Development-Best Practices and the Next Generation ).

ໃນພິທີເປີດ, ໂດຍມີລະດັບປະມຸກລັດ, ຫົວໜ້າລັດຖະບານ, ຮອງນາຍົກລັດຖະມົນຕີ ແລະ ລັດຖະມົນຕີ ຈາກປະເທດໃນພາກພື້ນເອເຊຍ-ແປຊີຟິກ ເຂົ້າຮ່ວມ ແລະ ຜັດປ່ຽນກັນຂຶ້ນກ່າວປາໄສ, ພ້ອມທັງສະແດງທັດສະນະຂອງບັນດາປະເທດເພື່ອຮ່ວມມືກັນຮັບມືກັບໄພພິບັດ. ໂດຍສະເພາະແມ່ນຜົນກະທົບຂອງການແພ່ລະບາດຂອງພະຍາດໂຄວິດ-19, ການຟື້ນຟູເສດຖະກິດຈາກການແພ່ລະບາດຂອງພະຍາດໂຄວິດ-19, ການນຳໃຊ້ງົບປະມານ, ການບໍລິຫານການປົກຄອງ ແລະການນຳໃຊ້ເທຄກໂນໂລຢີວິທະຍາສາດເຂົ້າໃສ່ວຽກງານການຄຸ້ມຄອງນຳ້ເພື່ອບັນລຸການພັດທະນາແບບຍືນຍົງ ແລະທົດສະວັດສາກົນໃນການຈັດຕັ້ງປະຕິບັດວຽກງານນຳ້ເພື່ອການພັດທະ ນາແບບຍືນຍົງ.

ທັງນີ້, ພະນະທ່ານ ພັນຄຳ ວິພາວັນ ນາຍົກລັດຖະມົນຕີ, ໄດ້ຂຶ້ນກ່າວປາໄສທີ່ກອງປະຊຸມສຸດຍອດ ເອເຊຍ-ແປຊີຟິກ ວ່າດ້ວຍນຳ້ ຄັ້ງທີ 4,ໂດຍົກໃຫ້ເຫັນຄວາມສຳຄັນຂອງນໍ້າ ແລະ ຊັບພະຍາກອນນໍ້າຖືເປັນສິ່ງຈຳເປັນສຳລັບຊີວິດຂອງມວນມະນຸດກໍ່ຄືການຄົງຕົວຂອງໂລກ ແລະມີຄວາມສຳຄັນຢ່າງສູງຕໍ່ການຄໍ້າປະກັນທາງດ້ານສະບຽງອາຫານ ແລະເຮັດໃຫ້ສິ່ງແວດລ້ອມອຸດົມສົມບູນ. ການເພີ້ມຂຶ້ນຂອງພົນລະເມືອງໃນທົ່ວໂລກ, ຄວາມຕ້ອງການນໍາໃຊ້ນໍ້າ ແລະຊັບພະຍາກອນນໍ້າເຂົ້າໃນການພັດທະນາເສດຖະກິດສັງຄົມ ແລະ ການປ່ຽນແປງດິນຟ້າອາກາດໄດ້ເປັນສາເຫດຕົ້ນຕໍທີ່ກໍ່ໃຫ້ເກີດຜົນກະທົບຈາກໄພພິບັດທາງທໍາມະຊາດນັບມື້ນັບຮຸນແຮງຂຶ້ນ, ພ້ອມທັງສົ່ງຜົນ ຕໍ່ຄວາມຍືນຍົງຂອງນໍ້າ ແລະ ຊັບພະຍາກອນນໍ້າ ອັນຮຽກຮ້ອງໃຫ້ພວກເຮົາຕ້ອງຮີບຮ້ອນໃຫ້ມີການຈັດການນໍ້າ ແລະ ຊັບພະຍາກອນນໍ້າຢ່າງມີປະສິດທິພາບ ແລະ ຍືນຍົງ. ໂດຍວົງຄະນາຍາດສາກົນກໍ່ຄືອົງການສະຫະປະຊາຊາດຈິ່ງໄດ້ກຳນົດເອົາວຽກງານການຄຸ້ມຄອງ ແລະ ນຳໃຊ້ນໍ້າແບບຍືນຍົງໃຫ້ເປັນໜຶ່ງໃນ 17 ເປົ້າໝາຍການພັດທະນາແບບຍືນຍົງ (SDG 6) ຊຶ່ງພວກເຮົາໝົດທຸກຄົນມີພັນທະໃນການຈັດຕັ້ງປະຕິບັດຢ່າງມີປະສິດທິຜົນ.

ສປປ ລາວ ເປັນໜຶ່ງໃນປະເທດທີ່ມີຄວາມອຸດົມສົມບູນໄປດ້ວຍນຳ້ ແລະຊັບພະຍາກອນນໍ້າຊຶ່ງໄດ້ກາຍເປັນທ່າແຮງອັນສຳຄັນສຳລັບການພັດທະນາເສດຖະກິດ- ສັງຄົມ. ດັ່ງນັ້ນ, ເພື່ອຄຸ້ມຄອງ ແລະນຳໃຊ້ແຫຼ່ງນໍ້າເຫຼົ່ານີ້ໃຫ້ເກີດປະໂຫຍດສູງສຸດ ແລະຍືນຍົງ, ລັດຖະບານ ໄດ້ວາງຍຸດທະສາດ ແລະແຜນການຄຸ້ມຄອງຢ່າງເປັນລະບົບ. ພ້ອມນີ້, ຍັງເຫັນໄດ້ຄວາມສຳຄັນຂອງການຮ່ວມມືທາງດ້ານນຳ້ (Water Diplomacy) ໂດຍຮ່ວມມືຢ່າງກວ້າງຂວາງກັບວົງຄະນາຍາດສາກົນ ແລະ ພາກພື້ນໃນວຽກງານນໍ້າ, ໂດຍໄດ້ຫັນເອົາມາດຕະການຂອງສາກົນກ່ຽວກັບການຄຸ້ມຄອງນໍ້າເຂົ້າມາເປັນມາດຕະການແຫ່ງຊາດ ເຊັ່ນ ໄດ້ເຊື່ອມສານ SDG 6 ເຂົ້າໃນແຜນພັດທະນາເສດຖະກິດ-ສັງຄົມແຫ່ງຊາດ.

ກອງປະຊຸມສຸດຍອດ ເອເຊຍ-ແປຊີຟິກ ວ່າດ້ວຍນຳ້ ຄັ້ງທີ 4 ໄດ້ຮັບຮອງເອົາຖະແຫຼງການຄຸມາໂມໂຕະ (Kumamoto Declaration) ທີ່ໄດ້ເນັ້ນໜັກຄືນຄວາມສຳຄັນຂອງນຳ້ ແລະການແກ້ໄຂບັນຫາທີ່ກ່ຽວກັບນໍ້າເພື່ອຄຸ້ມຄອງ ແລະນຳໃຊ້ແຫຼ່ງນໍ້າໃຫ້ເກີດປະໂຫຍດສູງສຸດ ແລະຍືນຍົງ.

แชร์