ຮອງນາຍົກລັດຖະມົນຕີ ຊຸກຍູ້ວຽກງານຢູ່ແຂວງຊຽງຂວາງ

ເມື່ອລະຫວ່າງວັນທີ 21-22 ເມສາ 2022, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ພ້ອມດ້ວຍຄະນະໄດ້ເຄື່ອນໄຫວຊຸກຍູ້ການພັດທະນາເສດຖະກິດ-ສັງຄົມ ຢູ່ແຂວງຊຽງຂວາງ. ໂດຍມີ ທ່ານ ບຸນຈັນ ສີວົງພັນ ເຈົ້າແຂວງໆຊຽງຂວາງ, ພ້ອມດ້ວຍຄະນະນໍາຂອງແຂວງ, ຜູ້ຕາງໜ້າພະແນກການ ແລະຄະນະນຳຂອງເມືອງໃຫ້ການຕ້ອນຮັບ.

ໂອກາດນີ້, ເຈົ້າແຂວງຊຽງຂວາງໄດ້ລາຍງານສະພາບການພັດທະນາເສດຖະກິດ-ສັງຄົມ, ຊຶ່ງແຂວງຊຽງຂວາງ ໄດ້ສູ້ຊົນປະຕິບັດໜ້າທີ່ການເມືອງທີ່ໄດ້ຮັບມອບໝາຍ, ໂດຍສະເພາະການສູ້ຊົນປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປີ 2022 ກໍຄືແຜນພັດທະນາເສດຖະກິດ-ສັງຄົມຂອງແຂວງໃນໄລຍະຜ່ານມາ. ສໍາລັບການປະຕິບັດແຜນພັດທະນາເສດຖະກິດ-ສັງຄົມ ໄຕຣ໌ມາດ 1 ປີ 2022 ຕິດພັນກັບການປະຕິບັດ 2 ວາລະແຫ່ງຊາດ, ການປະຕິບັດວຽກງານກໍ່ສ້າງຮາກຖານການເມືອງ (ຕາມ 4 ເນື້ອໃນ 4 ຄາດໝາຍ), ການພັດທະນາຊົນນະບົດລົບລ້າງຄວາມທຸກຍາກ ຕາມດຳລັດ 348/ລບ, ການປະຕິບັດວຽກງານ 3 ສ້າງ (ຕາມມະຕິ 25/ກມສພ ແລະ ຄຳສັ່ງ 34/ນຍ), ການແຂ່ງຂັນຮັກຊາດ ແລະ ພັດທະນາຂອງແຂວງ ແລະ ການສະເຫຼີມສະຫຼອງປີມິດຕະພາບ ລາວ-ຫວຽດນາມ 2022 ໄດ້ຮັບຜົນສໍາເລັດຕາມແຜນການທີ່ວາງໄວ້.

ສໍາລັບການພັດທະນາເສດຖະກິດ-ສັງຄົມຂອງແຂວງ ໃນປີ 2021 ເຫັນວ່າເສດຖະກິດຂະຫຍາຍຕົວ 5,7%, ລວມຍອດຜະລິດຕະພັນພາຍໃນ GDP ບັນລຸໄດ້ 3.889,57ຕື້ກີບ; ຈັດເກັບລາຍຮັບທ້ອງຖິ່ນເຂົ້າງົບປະມານບັນລຸໄດ້ 133,14 ຕື້ກີບ, ເທົ່າກັບ 90,83% ຂອງແຜນດັດແກ້, ທຽບໃສ່ປີຜ່ານມາເພີ່ມຂຶ້ນ 12,61%; ລະດົມການລົງທຶນທົ່ວສັງຄົມໄດ້ທັງໝົດ 1.999,10 ຕື້ກີບ; ເກັບກູ້ຜົນຜະລິດເຂົ້າໄດ້ 104.000 ໂຕນ, ເທົ່າກັບ 96,51% ຂອງແຜນການປີ; ໄດ້ສຸມໃສ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃນຂົງເຂດສຶກສາ ແລະສາທາລະນະສຸກຢ່າງຕໍ່ເນື່ອງ, ເອົາໃຈໃສ່ຝຶກອົບຮົມພັດທະນາສີມືແຮງງານ ແລະ ຈັດຫາວຽກເຮັດງານທຳເພື່ອແກ້ໄຂບັນຫາໄພຫວ່າງງານ ແລະສຸມໃສ່ເກັບກູ້ລະເບີດບໍ່ທັນແຕກອອກຈາກພື້ນທີ່ທຳການຜະລິດ.

 

ໃນໂອກາດນີ້, ຮອງນາຍົກລັດຖະມົນຕີໄດ້ສະແດງຄວາມຊົມເຊີຍຕໍ່ຜົນສໍາເລັດທີ່ແຂວງຊຽງຂວາງສາມາດຍາດມາໄດ້, ແຕ່ກໍ່ໃຫ້ແຂວງສືບຕໍ່ແກ້ໄຂຈຸດອ່ອນຈໍານວນໜຶ່ງທີ່ຄົງຄ້າງຢູ່. ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານຢູ່ໃນແຕ່ລະຂະແໜງການໃຫ້ມີຄວາມຈົ່ງຮັກພັກດີ, ມີຈັນຍາບັນ, ຮັກວິຊາຊີບ, ຍົກສູງສະຕິຄວາມຮັບຜິດຊອບໜ້າທີ່ການເມືອງທີ່ໄດ້ຮັບມອບໝາຍ ແລະ ຖືເອົາຜົນປະໂຫຍດຂອງປະເທດຊາດເປັນກົກ; ເອົາໃຈໃສ່ຈັດຕັ້ງປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ເປັນຮູບປະທຳ, ໂດຍນຳໃຊ້ທຸກນະໂຍບາຍ ແລະ ມາດຕະການແກ້ໄຂ ແລະ ຄຸ້ມຄອງເສດຖະກິດມະຫາພາກໃຫ້ມີສະຖຽນລະພາບໂດຍພື້ນຖານ, ແກ້ໄຂຄວາມກົດດັນດ້ານເສດຖະກິດໃຫ້ຜ່ອນເບົາລົງເທື່ອລະກ້າວ; ເອົາໃຈໃສ່ເຮັດໃຫ້ວຽກງານການລົງທຶນຂອງລັດມີການຫັນປ່ຽນໃໝ່ຢ່າງແທ້ຈິງ, ຈັດບູລິມະສິດໂຄງການລົງທຶນຂອງລັດ ແລະ ສຸມໃສ່ໂຄງການທີ່ຈຳເປັນຮີບດ່ວນຄຽງຄູ່ກັບການຈໍາກັດໂຄງການໃໝ່ທີ່ບໍ່ມີປະສິດທິຜົນ ແລະ ບໍ່ຈໍາເປັນຮີບດ່ວນ, ເພື່ອບໍ່ໃຫ້ສ້າງໜີ້ສະສົມເພີ່ມຂຶ້ນຕື່ມ; ປັບປຸງວຽກງານສົ່ງເສີມ ແລະຄຸ້ມຄອງການລົງທຶນຂອງເອກະຊົນພາຍໃນ ແລະ ຕ່າງປະເທດຢ່າງແຂງແຮງ ແລະເປັນເຈົ້າການສູງໂດຍການບຸກທະລຸແກ້ໄຂຂອດຂັ້ນການບໍລິການປະຕູດຽວໃຫ້ໄວ.

ໃນໂອກາດດຽວກັນ, ຄະນະຮອງນາຍົກລັດຖະມົນຕີກໍໄດ້ໄປຢ້ຽມຢາມໂຄງການ ແລະພື້ນຖານການຜະລິດຂອງແຂວງຊຽງຂວາງຈໍານວນໜຶ່ງ, ເປັນຕົ້ນແມ່ນ ໂຄງການຂຸດຄົ້ນສົ່ງອອກແຮ່ທາດ (ແຮເຫຼັກພູຍວນ) ບ້ານນາຕໍ ເມືອງແປກ; ໂຄງການກຸ່ມຟາຣ໌ມລ້ຽງງົວພັນຊີ້ນ, ພັນນົມ ທີ່ນໍາໃຊ້ເທຄໂນໂລຢີທັນສະໄໝຂອງບໍລິສັດ ຈຣາໂກ-ວິນາມິວ; ຢ້ຽມຢາມຄອບຄົວຕົວແບບໃນການລ້ຽງງົວທ໋ອມ ບ້ານຄອງເຂດພັ້ນ, ເມືອງແປກ; ໂຄງການຂຸດຄົ້ນສົ່ງອອກແຮ່ເຫຼັກ ບ້ານຖໍ້າລາ ເມືອງຄໍາ ແລະ ໄປຢ້ຽມຢາມດ່ານສາກົນນໍ້າກັ່ນອີກດ້ວຍ; ພ້ອມທັງໄດ້ມອບເງິນໃຫ້ແຂວງຊຽງຂວາງຈໍານວນໜຶ່ງເພື່ອນໍາໃຊ້ເຂົ້າໃນວຽກງານລວມ.

แชร์