ສໍາເລັດກອງປະຊຸມວຽກ​ງານກວດກາທົ່ວປະເທດຄັ້ງທີ IV ສຳ​ລັບ​ກະ​ຊວງ-ອົງ​ການ​ອ້ອມ​ຂ້າງ​ສູນ​ກາງ

ກອງປະຊຸມວຽກງານກວດກາທົ່ວປະເທດ ຄັ້ງທີ IV ສຳ​ລັບກະຊວງ-ອົງການອ້ອມຂ້າງສູນກາງ, ສໍາເລັດປົນໃນວັນທີ 20 ເມສາ 2022, ທີ່ສະໂມສອນໃຫຍ່ຫ້ອງວ່າການສູນກາງພັກ, ໂດຍການເປັນປະທານຂອງ ສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກຄະ​ນະເລຂາທິການສູນກາງພັກປະທານຄະນະກວດກາສູນກາງພັກປະທານອົງການກວດກາແຫ່ງລັດ ແລະຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ແລະພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ສະຫາຍ ຄໍາພັນ ພົມມະທັດ ກ່າວວ່າ: ກອງປະຊຸມວຽກງານກວດກາທົ່ວປະເທດ ຄັ້ງທີ IV ບໍ່ສະເພາະແຕ່ເປັນບັ້ນສະຫຼຸບຕີລາຄາ, ຖອດຖອນບົດຮຽນວຽກງານກວດກາໃນໄລຍະຜ່ານມາ, ກໍານົດທິດທາງ, ຄາດໝາຍລວມ ແລະວຽກທີ່ຕ້ອງເຮັດໃນຊຸມປີຕໍ່ໜ້າຕາມວາລະ 5 ປີ ດັ່ງທີ່ເຄີຍປະຕິບັດມາ; ແຕ່ຍັງເປັນກອງປະຊຸມທີ່ມີເປົ້າ ໝາຍ ແລະເນື້ອໃນຜັນຂະຫຍາຍຈິດໃຈຊີ້ນໍາ “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານ ” ໃນຂົງເຂດວຽກງານກວດກາ, ທັງເຮັດໃຫ້ການປະຕິບັດພາລະບົດບາດການກວດກາຕິດພັນກັບບັນດາເນື້ອໃນ, ເປົ້າໝາຍຂອງສອງວາລະແຫ່ງຊາດອີກດ້ວຍ.

ຊຶ່ງໃນຊຸມປີຜ່ານມາ, ຜ່ານການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X, ເລີ່ມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ການຈັດຕັ້ງປະຕິບັດບັນດາເນື້ອໃນກອງປະຊຸມວຽກງານກວດກາທົ່ວປະເທດ ຄັ້ງທີ III ແລະມະຕິ, ຄໍາສັ່ງຂອງກົມການເມືອງສູນກາງພັກ, ຄະນະເລຂາທິການສູນກາງພັກພາຍໃຕ້ການເອົາໃຈໃສ່ນໍາພາ-ຊີ້ນໍາໂດຍກົງຂອງຄະນະພັກແຕ່ລະຂັ້ນ,ວຽກງານກວດກາສາມາດຍາດໄດ້ຜົນສໍາເລັດຫຼາຍດ້ານ,ປະກອບສ່ວນສໍາຄັນໃນການປັບປຸງຍົກລະດັບຄຸນນະ ພາບທາງດ້ານການຈັດຕັ້ງ ແລະການເຄື່ອນໄຫວຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ. ພ້ອມກັນນັ້ນກໍຍັງໃຫ້ພວກເຮົາເຫັນແຈ້ງເຖິງບັນດາຈຸດອ່ອນ, ຂໍ້ຄົງຄ້າງຫຼາຍດ້ານ ແລະປາກົດການຫຍໍ້ທໍ້ທີ່ເກີດຂຶ້ນທີ່ບໍ່ທັນສາມາດແກ້ໄຂໄດ້. ນັບທັງມີບັນຫາໃໝ່ໆທີ່ໄດ້ຕັ້ງຂຶ້ນຕື່ມ,ຊຶ່ງຕ້ອງໄດ້ເພີ່ມທະວີຄວາມເອົາໃຈໃສ່ພິຈາລະນາ, ຄົ້ນຫາວິທີ ແລະມາດຕະການຕົວຈິງເພື່ອປັບປຸງແກ້ໄຂ, ເຮັດໃຫ້ວຽກງານກວດກາຂອງພັກ-ລັດ ມີບາດກ້າວຂະຫຍາຍຕົວສູ່ລະດັບໃໝ່.

ເພື່ອສ້າງຄວາມເອກະພາບສູງໃນທາງປະຕິບັດ, ໂດຍສະເພາະເພື່ອຮັບປະກັນສ້າງການຫັນປ່ຽນຢ່າງແຂງແຮງ. ທັງນີ້, ສະຫາຍ ຄໍາພັນ ພົມມະທັດ ເຫັນຄວນໃຫ້ເນັ້ນໜັກຕື່ມການສ້າງຄວາມເຂົ້າໃຈຖືກຕ້ອງກ່ຽວກັບທີ່ຕັ້ງ, ບົດບາດ ແລະເປົ້າໝາຍລວມຂອງວຽກງານກວດກາໃນສະພາບການປັດຈຸບັນ ແລະ ການເລັ່ງທວງຕົວຈິງຕໍ່ຄະນະພັກແຕ່ລະຂັ້ນເພື່ອເພີ່ມທະວີວຽກງານກວດກາເພາະຖືເປັນຂອດໜຶ່ງທີ່ສໍາຄັນນອນໃນຂະບວນວິວັດການເຄື່ອນໄຫວນໍາພາ ແລະຄຸ້ມຄອງຂອງການຈັດຕັ້ງພັກ-ລັດ ແລະບັນດາການຈັດຕັ້ງໃນລະບົບການເມືອງ; ເປັນເນື້ອໃນພື້ນຖານອັນໜຶ່ງປະກອບສ້າງແບບແຜນວິທີເຮັດວຽກທີ່ມີວິທະຍາສາດ, ແທດກັບຄວາມເປັນຈິງໂດຍທີ່ຕິດພັນກັບການເກັບກໍາສະພາບການ, ວິເຄາະໄຈ້ແຍກຂໍ້ມູນຂ່າວສານ ແລະ ການສັງລວມບັນຫາທີ່ຕ້ອງປັບປຸງແກ້ໄຂຢ່າງເປັນລະບົບໃນຂະບວນວິວັດການນຳພາ-ຄຸ້ມຄອງ; ເປັນອົງປະກອບທີ່ຂາດບໍ່ໄດ້ໃນບັນດາມາດຕະການສະກັດກັ້ນ ແລະ ແກ້ໄຂການລະເມີດກົດລະບຽບຂອງພັກ, ກົດໝາຍຂອງລັດ ແລະ ແກ້ໄຂພະຍາດອາດຍາສິດ, ການສໍ້ລາດບັງຫຼວງ ແລະບັນດາປະກົດການຫຍໍ້ທໍ້ອື່ນໆໃນຖັນແຖວສະມາຊິກພັກ, ພະນັກງານ-ລັດຖະກອນ; ຖ້າຂາດການກວດກາຈະເຮັດໃຫ້ການນໍາພາ-ຄຸ້ມຄອງ ແລະ ການປັບປຸງພາຍໃນການຈັດຕັ້ງຂອງພັກ-ລັດ ຂາດຂອດທີ່ສໍາຄັນ, ບໍ່ຄົບຖ້ວນ, ບໍ່ຕໍ່ເນື່ອງ, ບໍ່ແທດເຖິງ ແລະ ຂາດປະສິດທິຜົນຕົວຈິງ, ວຽກງານກວດກາໃນຕົວຈິງ ເປັນວຽກງານຕໍ່ສູ້ ເພື່ອປົກປ້ອງກົດລະບຽບຂອງພັກກົດໝາຍຂອງລັດ, ນັບທັງການແກ້ໄຂການກະທຳຜິດຂອງສະມາຊິກພັກ-ພະນັກງານໃຫ້ຖືກຕ້ອງສອດຄ່ອງຕາມກົດລະບຽບຂອງພັກ ແລະ ກົດໝາຍຂອງລັດ ແລະ ເພື່ອບັນລຸເປົ້າໝາຍດັ່ງກ່າວໄດ້ນັ້ນ, ໃນເວລາດໍາເນີນການກວດກາຕ້ອງ ກວດກາປົກກະຕິຕໍ່ເນື່ອງແຕ່ຫົວທີເພື່ອກໍາສະພາບລວມໃນການເຄື່ອນໄຫວຂອງການຈັດຕັ້ງພະນັກງານ-ລັດຖະກອນ,ພ້ອມທັງເຫັນໄດ້ປາກົດການລະເມີດລະບຽບກົດໝາຍ; ກວດກາເພື່ອພິສູດການກະທໍາຜິດ ເມື່ອມີປະກົດການລະເມີດລະບຽບກົດໝາຍໂດຍເຫັນໄດ້ຈາກການກວດກາປົກກະຕິ, ຈາກຜົນການກວດສອບ (ວ່າມີການກະທຳຜິດ), ຈາກຄໍາຮ້ອງ-ຄຳສະເໜີ ເພື່ອສະຫຼຸບຢ່າງເປັນລະບົບຕໍ່ການກະທຳຜິດ ແລະ ຜົນເສຍຫາຍທີ່ເກີດຂຶ້ນ ຊີ້ໃຫ້ເຫັນຄວາມຮັບຜິດຊອບຂອງການຈັດຕັ້ງລວມໝູ່ ແລະ ບຸກຄົນຕາມກົດລະບຽບຂອງພັກ ແລະ ກົດໝາຍຂອງລັດຢ່າງຊັດເຈນ ຮັດກຸມ; ດໍາເນີນການສືບສວນ-ສອບສວນຄະດີທີ່ຕິດພັນກັບພຶດຕິກໍາສໍ້ລາດບັງຫຼວງ ແລະສະເໜີມາດຕະການທາງວິໄນຕໍ່ເປົ້າໝາຍທີ່ຖືກກວດກາ ສອດຄ່ອງຕາມກົດລະບຽບຂອງພັກ, ກົດໝາຍຂອງລັດ.

ສ້າງຄວາມເຂົ້າໃຈຖືກຕ້ອງເອກະພາບກ່ຽວກັບຄວາມຮັບຜິດຊອບຂອງຄະນະພັກ: ຢືນຕໍ່ໜ້າຈຸດອ່ອນ,ຂໍ້ຄົງຄ້າງ ຫຼືການເລັ່ງທວງໃໝ່ຕໍ່ວຽກງານກວດກາຂອງພັກ-ລັດ, ຊຶ່ງຄະນະພັກແຕ່ລະຂັ້ນບໍ່ສາມາດປັດຄວາມຮັບຜິດຊອບຂອງຕົນ, ແລ້ວໂຍນບັນຫາໃຫ້ພາກສ່ວນອົງການວິຊາສະເພາະເປັນຜູ້ແກ້ໄຂ.ທັງຮັບຜິດຊອບຕໍ່ຜົນໄດ້ຮັບ ຫຼື ຢ້ານຖືກກວດກາຈາກຄະນະກວດກາພັກ ແລະອົງການກວດກາລັດ; ຫາກສະມາຊິກພັກບ່ອນໃດຫາກຍັງຢ້ານການຖືກກວດກາແມ່ນຍ້ອນບໍ່ທັນເຂົ້າໃຈທີ່ຕັ້ງ, ບົດບາດວຽກງານກວດກາ ຫຼືບໍ່ທັນມີຄວາມຮັບຜິດຊອບທີ່ແທ້ຈິງຕໍ່ວຽກງານກວດກາ.

ສ່ວນຄະນະພັກ ຫຼືສະມາຊິກພັກທີ່ເຂົ້າໃຈ ແລະສາມາດເຮັດວຽກງານກວດກາພາຍໃນຕົນເອງໄດ້ດີ, ມີບັນຫາໃດກໍກຳໄດ້ ແລະ ເປັນເຈົ້າການແກ້ໄຂແມ່ນຈະບໍ່ຢ້ານການຖືກກວດກາ. ຄວາມຮັບຜິດຊອບອັນແທ້ຈິງ ແລະຄົບຖ້ວນຂອງຄະນະພັກຕໍ່ວຽກງານກວດກາຕ້ອງສະແດງແຈ້ງໃນດ້ານຕ່າງໆ ຄື:ມີສະຕິເຄົາລົບ ແລະປະຕິບັດເຂັ້ມງວດຕໍ່ກົດລະບຽບພັກ,ກົດໝາຍຂອງລັດເພື່ອສ້າງສັດທາ-ຄວາມເຊື່ອໝັ້ນ ແລະການກະຕຸ້ນຄວາມກ້າຫານຮັບຜິດຊອບຂອງເຈົ້າໜ້າທີ່ກວດກາໃນການປະຕິບັດໜ້າທີ່; ເປັນເຈົ້າການຕິດຕາມ, ກໍາສະພາບການຈັດຕັ້ງເຄື່ອນໄຫວຂອງການຈັດຕັ້ງ ແລະຜູ້ທີ່ຖືກມອບໝາຍ, ໂດຍສະເພາະຕໍ່ຜົນໄດ້ຮັບຕົວຈິງຂອງການເຄື່ອນໄຫວປະຕິບັດບັນດາເປົ້າໝາຍທີ່ວາງອອກ ແລະ ກຳຫາງສຽງ ກໍຄື ປາກົດການບໍ່ປົກກະຕິໃນການປະຕິບັດໜ້າທີ່ຂອງພະນັກງານໂດຍຜ່ານການສັງລວມສະພາບອັນປົກກະຕິຂອງອົງການເສນາທິການ; ເອົາໃຈໃສ່ນໍາເອົາບັນຫາທີ່ເກີດຂຶ້ນຕົວຈິງໂດຍສະເພາະປະກົດການລະເມີດລະບຽບກົດໝາຍມາປຶກສາຫາລື ແລະຊີ້ນຳແກ້ໄຂຢ່າງທັນການ; ເປັນເຈົ້າການສະເໜີປະສານງານກັບຂັ້ນເທິງ ຫຼືອົງການກ່ຽວຂ້ອງເພື່ອດຳເນີນການກວດກາ ແລະແກ້ໄຂຜົນການກວດກາຢ່າງເດັດຂາດເຂັ້ມງວດ; ເອົາໃຈໃສ່ນໍາພາ-ຊີ້ນໍາ ປັບປຸງກົງຈັກການຈັດຕັ້ງປະກອບພະນັກງານ,ປົກປ້ອງການເຄື່ອນໄຫວປະຕິບັດໜ້າທີ່ຂອງພະນັກງານກວດກາ ແລະສ້າງເງື່ອນໄຂເອື້ອອຳນວຍແກ່ອົງການທີ່ເຮັດໜ້າທີ່ກວດກາພັກ-ລັດ.

ຂອບໃຈຂໍ້ມູນຈາກໜັງສືພິມປະຊາຊົນ

แชร์