ການເງິນ ສຳເລັດກອງປະຊຸມ ຄົບຄະນະບໍລິຫານງານພັກ

ກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ III ຂອງອົງຄະນະພັກກະຊວງການເງິນ, ຈັດຂຶ້ນເມື່ອວັນທີ 18 ເມສາ 2022. ພາຍໃຕ້ການເປັນປະທານຂອງ ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ, ມີຄະນະປະຈຳພັກ, ກຳມະການຄະນະພັກກະຊວງ,ບັນດາຄະນະພັກຮາກຖານ,ໜ່ວຍພັກຮາກຖານ,ຄະນະພັກ ແລະຄະນະນຳແຕ່ລະຂັ້ນຂອງກະຊວງການເງິນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດການປັບປຸງກົງຈັກການຈັດຕັ້ງຂອງກະຊວງການເງິນ, ສະພາບການຈັດຕັ້ງປະຕິບັດວຽກງານພັດທະນາບຸກຄະລາກອນຕິດພັນກັບການແກ້ໄຂພະນັກງານເຫຼືອບໍ່ພໍ ແລະສະຫຼຸບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາງວດທີ I ຂອງປີ 2022 ແລະ ທິດທາງແຜນການ ງວດ II ປີ 2022.

ພ້ອມນີ້, ກອງປະຊຸມຍັງໄດ້ຮັບຟັງການຜ່ານບົດສະຫຼຸບຕີລາຄາສະພາບການປັບປຸງກົງຈັກການຈັດຕັ້ງຂອງກະຊວງການເງິນ, ຜ່ານບົດສະຫຼຸບຕີລາຄາສະພາບການຈັດຕັ້ງປະຕິບັດວຽກງານພັດທະນາບຸກຄະລາກອນຕິດພັນກັບການແກ້ໄຂພະນັກງານເຫຼືອບໍ່ພໍ, ຊຶ່ງຜູ້ເຂົ້າຮ່ວມໄດ້ພ້ອມກັນປະກອບຄຳຄິດເຫັນໃສ່ບົດສະຫຼຸບດັ່ງກ່າວ.

ທັງນີ້, ສະຫາຍ ບຸນໂຈມ ອຸບົນປະເສີດ ໄດ້ຍົກໃຫ້ເຫັນການເສີມຂະຫຍາຍ ແລະ ທິດທາງການແກ້ໄຂບັນຫາຄົງຄ້າງ, ສິ່ງທ້າທາຍ ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນ ງົບປະມານ.ຊຶ່ງກະຊວງການເງິນ ຈະຕ້ອງໄດ້ປະຕິບັດຕາມແຜນດຳເນີນງານທັງວຽກພັກ-ລັດ ແລະ ບັນດາຄາດໝາຍທີ່ວາງໄວ້, ໂດຍສະເພາະວຽກງານຈຸດສຸມໃນປີ 2022 ເພື່ອການດຳເນີນງານຢ່າງມີຈຸດສຸມ ແລະ ເພີ່ມທະວີວຽກງານການເມືອງ-ແນວຄິດໃຫ້ແກ່ຄະນະພັກຄະນະນຳ, ສະມາຊິກພັກ-ພະນັກງານຫຼັກແຫຼ່ງ ແລະທຸກຂັ້ນຂອງຂະແໜງການເງິນທັງສູນກາງ ແລະທ້ອງຖິ່ນ. ໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບໝາຍ.

ຄຽງຄູ່ກັນນັ້ນ, ຄະນະບໍລິຫານພັກກະຊວງ, ຄະນະນຳແຕ່ລະຂັ້ນ ແລະສະມາຊິກພັກແຕ່ລະສະຫາຍຕ້ອງໄດ້ສືບຕໍ່ຈັດຕັ້ງຜັນຂະຫຍາຍຄຳສັ່ງເລກທີ 01 ຂອງກົມການເມືອງສູນການພັກ, ລົງວັນທີ 03 ມັງກອນ 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ຈັດຕັ້ງປະຕິບັດມະຕິວ່າດ້ວຍການເພີ່ມທະວີການນຳພາຂອງພັກເພື່ອສ້າງການຫັນປ່ຽນຢ່າງແຂງແຮງ ແລະ ເລິ່ກເຊິ່ງ ສະບັບເລກທີ 04/ຄບສພ, ລົງວັນທີ 30 ກັນຍາ 2021 ຄຳສັ່ງວ່າດ້ວຍການເພີ່ມທະວີການຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ເລກທີ 18/ນຍ, ລົງວັນທີ 16 ກັນຍາ 2021.

ພ້ອມກັນນີ້, ໃຫ້ເອົາໃຈໃສ່ສ້າງທ່າຫັນປ່ຽນໃໝ່ອັນແຂງແຮງ, ເລິກເຊິ່ງ ແລະຮອບດ້ານ, ສຸມໃສ່ປັບປຸງ ພັດທະນາ ແລະນຳໃຊ້ເທຄໂນໂລຢີ, ວັດຕະກຳໃໝ່ (ຫັນເປັນທັນສະໄໝ) ເພື່ອຂຸດຄົ້ນ ແລະ ເສີມຂະຫຍາຍຄວາມສາມາດບົ່ມຊ້ອນ, ສຸມໃສ່ຄົ້ນຄວ້າເລິກເຊິ່ງ ຕໍ່ກັບເນື້ອໃນວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ທົບທວນຄືນ ແລະຄົ້ນຄວ້າລະອຽດບັນດານິຕິກໍາ, ນະໂຍບາຍທີ່ມີໃນປັດຈຸບັນໃຫ້ສອດຄ່ອງເພື່ອແກ້ໄຂບັນຫາຕ່າງໆ, ເພີ່ມທະວີວຽກງານ ການບັນຊີ, ການກວດກາພາຍໃນ ຕິດພັນກັບຜົນຂອງການກວດສອບແຫ່ງລັດ.ໂດຍສະເພາະແມ່ນການແກ້ໄຂຜົນການກວດສອບ ໃຫ້ທັນການ ແລະ ເປັນຮູບປະທຳ, ເອົາໃຈໃສ່ຊຸກຍູ້, ແນະນຳຫົວໜ່ວຍງົບປະມານ, ບັນດາວິສາຫະກິດໃຫ້ຖືບັນຊີຕາມກົດໝາຍ ແລະເພີ່ມທະວີວຽກງານຕິດຕາມກວດກາການນຳໃຊ້ງົບປະມານຂອງລັດຢ່າງເຂັ້ມງວດ, ສະກັດກັ້ນ ແລະຕ້ານການສໍ້ລາດບັງຫຼວງ, ປັບປຸງລະບົບການຈັດຕັ້ງຂອງຂະແໜງການເງິນໂດຍສຸມໃສ່ປັບປຸງດ້ານກົງຈັກຂອງ 3 ຂະແໜງການສາຍຕັ້ງ ແລະ ຈັດວາງບຸກຄະລາກອນໃຫ້ສອດຄ່ອງກັບວຽກ,  ເອົາໃຈໃສ່ແກ້ໄຂ້ພະນັກງານເຫຼືອບໍ່ພໍ, ປັບປຸງພາລະບົດບາດຂອງພະແນກການເງິນ, ນະຄອນຫຼວງ, ເມືອງ, ນະຄອນ, ເທສະບານ, ໃຫ້ສຳເລັດ ໃນງວດ II .ພ້ອມກັນນັ້ນ, ກໍ່ໃຫ້ກຳນົດຕຳແໜ່ງງານໃຫ້ສຳເລັດ.

ຂ່າວ-ພາບ ກະຊວງການເງິນ

แชร์