ພິດໄພຈາກການສໍ້ລາດບັງຫຼວງ ສ້າງຄວາມເສຍຫາຍຕໍ່ປະເທດຊາດຢ່າງມະຫາສານ

ປະເທດຊາດ ແລະປະຊາຊົນອັບປະໂຫຍດ ຫຼືເສຍຫາຍກ່ວາ 8 ພັນຕື້ກີບ 50 ກວ່າລ້ານໂດລາ 36 ກວ່າລ້ານບາດ ຈາກການສໍ້ລາດບັງຫຼວງແຕ່ 2016 ເປັນຕົ້ນມາ.

ການປະຕິບັດງານຂອງຄະນະກວດກາສູນກາງພັກ, ໂດຍສົມທົບກັບຄະນະນຳກະຊວງ-ອົງການ, ນະຄອນຫຼວງ, ແຂວງ ແລະຄະນະກວດການແຕ່ລະຂັ້ນ. ຊຶ່ງພົ້ນເດັ່ນແມ່ນການກວດກາໂຄງການລົງທຶນກໍ່ສ້າງພື້ນຖານໂຄງລ່າງ,ການຄຸ້ມຄອງນຳໃຊ້ທີ່ດິນ,ການຂຸດຄົ້ນ ແລະ ທຸລະກິດໄມ້,ການສຳຫຼວດຂຸດຄົ້ນແຮ່ທາດ ແລະອື່ນໆ ນັບແຕ່ປີ 2016 ເຖິງປັດຈຸບັນ. ໃນນັ້ນໄດ້ກວດກາທັງໝົດ 4.185 ເປົ້າໝາຍ ພົບຜົນເສຍຫາຍທັງໝົດ 8.370 ຕື້ກີບ; 50,22 ລ້ານໂດລາສະຫະລັດ; 36,89 ລ້ານບາດໄທ.

ຂໍ້ມູນດັ່ງກ່າວ, ຖືກນຳຂຶ້ນລາຍງານຕໍ່ກອງປະຊຸມວຽກງານກວດກາທົ່ວປະເທດ ຄັ້ງທີ IV ​ສຳ​ລັບກະຊວງ-ອົງການອ້ອມຂ້າງສູນກາງ, ຊຶ່ງເປີດຂຶ້ນໃນວັນທີ 19 ເມສາ 2022 ທີ່ສະໂມສອນໃຫຍ່ຫ້ອງວ່າການສູນກາງພັກ. ໂດຍການເປັນປະທານຂອງ ສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກຄະ​ນະເລຂາທິການສູນກາງພັກປະທານຄະນະກວດກາສູນກາງພັກປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາສະຫາຍຮອງປະທານຄະນະກວດກາສູນກາງພັກ ແລະອົງການກວດກາແຫ່ງລັດ,ສະຫາຍກໍາມະການສູນກາງພັກ,ເລຂາຄະນະພັກ,ປະທານກວດກາພັກ-ລັດກະຊວງ-ອົງການອ້ອມຂ້າງສູນກາງ, ບັນດາຄະນະກົມຂອງຄະນະກວດກາສູນກາງພັກ ແລະ ຄະນະຮັບຜິດຊອບຈາກຄະນະກວດກາສູນກາງພັກ, ອົງການກວດກາແຫ່ງລັດເຂົ້າຮ່ວມຢ່າງພ້ອມພຽງ.

ທັງນີ້, ສະຫາຍ ວິໄລວັນ ບຸດດາຄໍາ ກໍາມະການສໍາຮອງສູນກາງພັກຄະນະປະຈໍາພັກ ຮອງປະທານຄະນະກວດກາສູນກາງພັກ ແລະ ອົງການກວດກາແຫ່ງລັດ ໄດ້ຂຶ້ນສະເໜີຮ່າງບົດສະຫຼຸບ-ຕີລາຄາການເຄື່ອນໄຫວວຽກງານກວດກາແຕ່ປີ 2016 ເຖິງປັດຈຸບັນ ແລະບາງເນື້ອໃນຕົ້ນຕໍສໍາລັບການເຄື່ອນໄຫວແຕ່ນີ້ເຖິງປີ 2026 ໂດຍລະບຸວ່າ: ກົງຈັກການຈັດຕັ້ງຄະນະກວດກາພັກ-ອົງການກວດກາລັດແຕ່ລະຂັ້ນໄດ້ຮັບການປັບປຸງທາງດ້ານການຈັດຕັ້ງ, ພາລະບົດບາດ, ໜ້າທີ່, ສິດ. ຊຶ່ງສອດຄ່ອງກັບຂໍ້ກໍານົດໃນກົດລະບຽບຂອງພັກ, ກົດໝາຍຂອງລັດ, ຈິ່ງເຮັດໃຫ້ກົງຈັກມີຄວາມເຂັ້ມແຂງ, ພະນັກງານທີ່ເຮັດວຽກກວດກາໄດ້ເພີ່ມຂຶ້ນກວ່າເມື່ອກ່ອນທັງທາງດ້ານປະລິມານ ແລະຄຸນນະພາບ. ປັດຈຸບັນມີພະນັກງານກວດກາອາຊີບທັງໝົດ 4.697 ຄົນ ຍິງ 1.532 ຄົນ, ໃນນີ້ຢູ່ຄະນະກວດກາສູນກາງພັກ ແລະ ອົງການກວດກາແຫ່ງລັດ 304 ຄົນ ຍິງ 104 ຄົນ; ກະຊວງ-ອົງການ 1.130 ຄົນ ຍິງ 408 ຄົນ; ຂັ້ນແຂວງ 554 ຄົນ ຍິງ 181 ຄົນ; ຂັ້ນເມືອງ 1.182 ຄົນ ຍິງ 343 ຄົນ ແລະ ຢູ່ຂະແໜງກວດກາຂອງພະແນກການຂັ້ນແຂວງ 1.527 ຄົນ ຍິງ 496 ຄົນ.

ໃນ​ໄລ​ຍະ​ຜ່ານ​ມາ ໄດ້ດໍາເນີນການຕິດຕາມ, ກວດກາປົກກະຕິ, ກວດກາຕາມຄຳສັ່ງ ແລະຕາມການສະເໜີຂອງພົນລະເມືອງ. ຊຶ່ງເຜີຍໃຫ້ເຫັນຜົນເສຍຫາຍຕາມທີ່ລະບຸມາຂ້າງເທິງນັ້ນ; ໃນເບື້ອງຕົ້ນສາມາດເກັບກູ້ຄືນມາໃຫ້ລັດໄດ້ 1.782 ຕື້ກີບ;3,55 ລ້ານໂດລາ,​ 11,16 ລ້ານບາດ.

ສຳລັບການເຄື່ອນໄຫວກວດກາໂຄງການລົງທຶນຂອງລັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 130/ຫສນຍ, ສໍາເລັດແລ້ວ 2.004 ໂຄງການ ໃນຈໍານວນ 5.542 ໂຄງການ; ໄດ້ດໍາເນີນການຈັດຕັ້ງປະຕິບັດຄໍາສັ່ງເລກທີ 15/ນຍ, ພົບເຫັນການລະເມີດ ແລະຜູ້ມີສ່ວນຮ່ວມພົວພັນ 1.119 ຄົນ, ໃນນີ້ ມີພະນັກງານລັດ 127 ຄົນ, ຜູ້ປະກອບການ 246 ຄົນ, ປະຊາຊົນ 746 ຄົນ, ຢຶດໄມ້ໄດ້ 11.351,75 ແມັດກ້ອນ ແລະ 33,17 ໂຕນ, ປັບໃໝ 22,28 ຕື້ກີບ.ພົບເຫັນການຄ້າງມອບພັນທະ ແລະຄ້າງຊໍາລະຄ່າໄມ້ໃຫ້ລັດ 121.120.861 ແມັດກ້ອນ ມູນຄ່າ 66,57 ຕື້ກີບ ແລະ 4,87 ລ້ານໂດລາ.

ສ່ວນການຄົ້ນຄວ້າຄໍາຮ້ອງ-ຄໍາສະເໜີຂອງພົນລະເມືອງທີ່ມີຕໍ່ການຈັດຕັ້ງພັກ, ອົງການບໍລິຫານລັດ, ການປະຕິບັດໜ້າທີ່ຂອງສະມາຊິກພັກ-ພະນັກງານນັບແຕ່ປີ 2016 ເຖິງປັດຈຸບັນໄດ້ຮັບຄໍາຮ້ອງຄໍາສະເໜີທັງໝົດ 5.568 ສະບັບ, ໃນນັ້ນ ໄດ້ນໍາພາຊີ້ນໍາຄົ້ນຄວ້າພິຈາລະນາແກ້ໄຂແລ້ວ 1.685 ສະບັບ, ສົ່ງໃຫ້ພາກສ່ວນອື່ນແກ້ໄຂ 1.911 ສະບັບ, ແຈ້ງຕອບພາກສ່ວນທີ່ກ່ຽວຂ້ອງ 204 ສະບັບ, ເກັບມ້ຽນຕິດຕາມ 286 ສະບັບ, ສືບຕໍ່ຄົ້ນຄວ້າ 1.482 ສະບັບ, ຄໍາຮ້ອງ-ຄໍາສະເໜີທີ່ພົ້ນເດັ່ນກວ່າໝູ່ແມ່ນ: ຂໍ້ຂັດແຍ່ງກ່ຽວຂ້ອງກັບທີ່ດິນ, ເຮືອນ,ການດໍາເນີນທຸລະກິດ,ຄວາມບໍ່ພໍໃຈຕໍ່ຂະບວນການສືບສວນ-ສອບສວນ ຫຼືການປະຕິບັດຄໍາຕັດສິນຂອງສານ, ພ້ອມທັງບັນຫາການລົງວິໄນຕໍ່ພະນັກງານ-ສະມາຊິກພັກ ແລະບັນຫາອື່ນໆ.

แชร์