ຜົນກອງປະຊຸມວຽກງານກວດກາທົ່ວປະເທດ ຄັ້ງທີ IV ຈຸດຈຳປາສັກ

ລາຍງານການເຄື່ອນໄຫວວຽກງານກວດກາແຕ່ປີ 2016 ເຖິງປັດຈຸບັນ ໄດ້ລະບຸກ່ຽວກັບການພິຈາລະນາລົງວິໄນຕໍ່ການຈັດຕັ້ງພັກ ແລະ ສະມາຊິກພັກ, ຊຶ່ງມີການລົງວິໄນ ໃນລະດັບຕ່າງໆຕໍ່ການຈັດຕັ້ງພັກ ແລະ ສະມາຊິກພັກເຊັ່ນ ໄດ້ກ່າວເຕືອນຄວາມຜິດ 9 ໜ່ວຍພັກ, ສະມາຊິກພັກຖືກລົງວິໄນ 3.690 ເທື່ອຄົນ ຍິງ 440 ຄົນ. ໃນນີ້ໄດ້ຕິຕຽນ 26 ຄົນ, ກ່າວເຕືອນຄວາມຜິດ 753 ຄົນ, ໂຈະການຮ່ວມຊີວິດພັກ 742 ຄົນ, ປົດຕໍາແໜ່ງ 150 ຄົນ ແລະ ເອົາອອກຈາກພັກ 2.019 ຄົນ. ທັງນີ້, ມີການເປີດເຜີຍໃນກອງປະຊຸມວຽກງານກວດກາທົ່ວປະເທດ ຄັ້ງທີ IV ທີ່ນະຄອນປາກເຊ ແຂວງຈຳປາສັກ ເມື່ອລະຫວ່າງວັນທີ 11-12 ເມສາ 2022 ຢູ່ຫ້ອງວ່າການແຂວງ, ຊຶ່ງມີແຂວງຈໍາປາສັກ, ສະຫວັນນະເຂດ, ສາລະວັນ, ເຊກອງ ແລະ ແຂວງອັດຕະປື. ໂດຍການເປັນປະທານຂອງ ສະຫາຍ ຄຳພັນ ພົມມະທັດ ກຳມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາສະຫາຍເລຂາພັກ, ຮອງເລຂາ, ຄະນະປະຈໍາພັກ, ປະທານກວດກາແຂວງ ແລະ ປະທານກວດກາບັນດາເມືອງ 5 ແຂວງ ພ້ອມດ້ວຍບັນດາຕາງໜ້າພະແນກການຕ່າງໆອ້ອມຂ້າງແຂວງຈຳປາສັກ ແລະ ຄະນະຮັບຜິດຊອບຈາກຄະນະກວດກາສູນກາງພັກ, ອົງການກວດກາແຫ່ງລັດ ເຂົ້າຮ່ວມ.

ຢ່າງໃດກໍດີ, ໃນການຈັດຕັ້ງປະຕິບັດວຽກງານກວດກາທົ່ວປະເທດ ກໍມີຜົນສໍາເລັດຫຼາຍດ້ານ, ເປັນຕົ້ນແມ່ນ ຄະນະກວດກາສູນກາງພັກໄດ້ມີການເຄື່ອນໄຫວຢ່າງຕັ້ງໜ້າ ແລະ ມີການປະສານສົມທົບກັບຄະນະພັກຂັ້ນຕ່າງໆ ເພື່ອຊຸກຍູ້, ຕິດຕາມ, ກວດກາ ປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ການຈັດແບ່ງປະເພດສະມາຊິກພັກ ສ່ວນໃຫຍ່ທີ່ຂຶ້ນກັບການຄຸ້ມຄອງຂອງອົງຄະນະພັກ ກະຊວງ-ອົງການ ແລະ ທ້ອງຖິ່ນ.

ໃນລາຍງານດຽວກັນໃຫ້ຮູ້ຕື່ມກ່ຽວກັບວຽກງານກວດກາລັດ ແມ່ນໄດ້ສົມທົບກັບຄະນະນໍາກະຊວງ-ອົງການ, ນະຄອນຫຼວງ, ແຂວງ ແລະ ຄະນະກວດກາແຕ່ລະຂັ້ນ ຊຶ່ງດໍາເນີນການຕິດຕາມ, ກວດກາປົກກະຕິ, ກວດກາຕາມຄຳສັ່ງ, ຕາມການສະເໜີຂອງພົນລະເມືອງ. ໃນນັ້ນ, ອັນພົ້ນເດັ່ນແມ່ນ ກວດກາບັນຫາໂຄງການລົງທຶນກໍ່ສ້າງພື້ນຖານໂຄງລ່າງ, ການຄຸ້ມຄອງນໍາໃຊ້ທີ່ດິນ, ການຂຸດຄົ້ນ ແລະ ທຸລະກິດໄມ້, ການສຳຫຼວດຂຸດຄົ້ນແຮ່ທາດ ແລະ ອື່ນໆ ນັບແຕ່ປີ 2016 ເຖິງປັດຈຸບັນ. ສາມາດກວດກາໄດ້ທັງໝົດ 4.185 ເປົ້າໝາຍ, ພົບເຫັນຜົນເສຍຫາຍທັງໝົດ 8.370 ຕື້ກີບ, 50,22 ລ້ານໂດລາສະຫະລັດ ແລະ 36,89 ລ້ານບາດ; ໃນເບື້ອງຕົ້ນສາມາດເກັບກູ້ຄືນມາໃຫ້ລັດໄດ້ 1.782 ຕື້ກີບ; 3,55 ລ້ານໂດລາ; 11,16 ລ້ານບາດ. ສ່ວນການກວດກາໂຄງການລົງທຶນຂອງລັດ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 130/ຫສນຍ, ສໍາເລັດແລ້ວ 2.004 ໂຄງການໃນຈໍານວນ 5.542 ໂຄງການ; ໄດ້ດໍາເນີນການຈັດຕັ້ງປະຕິບັດ ຄຳສັ່ງເລກທີ 15/ນຍ, ພົບເຫັນການລະເມີດ ແລະ ຜູ້ມີສ່ວນຮ່ວມພົວພັນ 1.119 ຄົນ, ໃນນີ້ມີພະນັກງານລັດ 127 ຄົນ, ຜູ້ປະກອບການ 246 ຄົນ, ປະຊາຊົນ 746 ຄົນ, ຢຶດໄມ້ໄດ້ 11.351,75 ແມັດກ້ອນ ແລະ 33,17 ໂຕນ, ປັບໃໝ 22,28 ຕື້ກີບ, ພົບເຫັນການຄ້າງມອບພັນທະ ແລະ ຄ້າງຊໍາລະຄ່າໄມ້ໃຫ້ລັດ 121.120.861 ແມັດກ້ອນ ມູນຄ່າ 66,57 ຕື້ກີບ ແລະ 4,87 ລ້ານໂດລາ.

ໃນໄລຍະຜ່ານມາ, ໄດ້ດຳເນີນການສືບສວນ-ສອບສວນຄະດີກ່ຽວຂ້ອງກັບການສໍ້ລາດບັງຫຼວງທັງໝົດ 842 ເປົ້າໝາຍ, ໃນນັ້ນມີພະນັກງານລັດ 363 ຄົນ, ພະນັກງານລັດວິສາຫາກິດ 364 ຄົນ, ບຸກຄົນທົ່ວໄປທີ່ກ່ຽວຂ້ອງ 115 ຄົນ, ສາມາດສະຫຼຸບຄະດີສົ່ງໄອຍະການ 154 ຄົນ ໃນນີ້ພະນັກງານລັດ 79 ຄົນ, ພະນັກງານລັດວິສາຫະກິດ 41 ຄົນ, ບຸກຄົນທີ່ກ່ຽວຂ້ອງ 34 ຄົນ, ສານຕັດສິນແລ້ວ 100 ຄົນ ໃນນັ້ນ ພະນັກງານລັດ 47 ຄົນ, ພະນັກງານລັດວິສາຫະກິດ 28 ຄົນ, ບຸກຄົນທີ່ກ່ຽວຂ້ອງ 25 ຄົນ, ພົບເຫັນຜົນເສຍຫາຍທັງໝົດ 747.512 ຕື້ກວ່າກີບ, 426.793 ລ້ານກວ່າບາດ, 13.814 ລ້ານກວ່າໂດລາ, ໃນເບື້ອງຕົ້ນສາມາດເກັບກູ້ຄືນໄດ້ 378.807 ຕື້ກວ່າກີບ, 30.604 ລ້ານກວ່າບາດ, 11.097 ລ້ານໂດລາ.

ໂອກາດນີ້, ສະຫາຍ ຄໍາພັນ ພົມມະທັດ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ໂດຍເຫັນຄວນໃຫ້ເອົາໃຈໃສ່ຕື່ມບາງຈຸດຕົ້ນຕໍ ໃນການເຄື່ອນໄຫວວຽກງານກວດກາຊຸມປີຕໍ່ໜ້າ. ທີ່ສຳຄັນແມ່ນຕ້ອງສ້າງຄວາມເຂົ້າໃຈຖືກຕ້ອງກ່ຽວກັບທີ່ຕັ້ງ, ບົດບາດຂອງວຽກງານກວດກາໃນສະພາບການປັດຈຸບັນ ແລະ ຄວາມເລັ່ງທວງຕົວຈິງຕໍ່ຄະນະພັກແຕ່ລະຂັ້ນ; ປັບປຸງພາລະບົດບາດ ແລະ ສາຍພົວພັນຂອງອົງການກວດກາຂອງພັກ-ລັດ ກັບບັນດາພາກສ່ວນທີ່ກ່ຽວຂ້ອງ; ປັບປຸງຂອດໃນກົງຈັກການຈັດຕັ້ງ ແລະ ແບບແຜນເຮັດວຽກຂອງຄະນະກວດກາພັກ-ອົງການກວດກາລັດແຕ່ລະຂັ້ນ;ກ່ຽວກັບການແກ້ໄຂບັນຫາພະນັກງານໃຫ້ອົງການກວດກາພັກ-ລັດແຕ່ລະຂັ້ນ ແລະອື່ນໆ.

แชร์