ສຶກສາຄວາມເປັນໄປໄດ້ ຫັນເປັນທັນສະໄໝ ລະບົບຖານຂໍ້ມູນອົງການໄອຍະການປະຊາຊົນ

ເມື່ອວັນທີ 12 ເມສາ 2022, ໄດ້ມີພິທີລົງນາມບົດບັນທຶກຄວາມຮ່ວມມື ວ່າດ້ວຍການສຶກສາຄວາມເປັນໄປໄດ້ໃນການຫັນທັນສະໄໝກ່ຽວກັບລະບົບຖານຂໍ້ມູນ ການຕິດຕາມກວດກາການດຳເນີນຄະດີ, ວຽກງານຈັດຕັ້ງ-ພະນັກງານ, ວຽກງານແຜນການ ແລະ ຮ່ວມມືກັບຕ່າງປະເທດ ຂອງອົງການໄອຍະການປະຊາຊົນ. ຊຶ່ງລົງນາມລະຫວ່າງ ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ ແລະ ທ່ານ ລັດຕະນະມະນີ ຄູນນິວົງ ຮອງປະທານທີ່ປຶກສາອາວຸໂສ ຕາງໜ້າບໍລິສັດ ເອໄອເອັຟ, ມີພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ.

ການເຊັນບົດບັນທຶກຄວາມຮ່ວມມືດັ່ງກ່າວ ເພື່ອເປັນພື້ນຖານໃນການສຶກສາຄວາມເປັນໄປໄດ້ໃນການຫັນເປັນທັນສະໄໝລະບົບຖານຂໍ້ມູນຂອງອົງການໄອຍະການປະຊາຊົນ; ປັບປຸງລະບົບການດຳເນີນງານໃຫ້ມີຄວາມວ່ອງໄວ, ທັນການ, ປະຢັດລາຍຈ່າຍ, ທັງສາມາດຕໍ່ຍອດໃຫ້ເກີດມີຜົນປະ ໂຫຍດຕໍ່ກັບວຽກງານໄອຍະການປະຊາຊົນ ແລະ ເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ໃຫ້ທັນຍຸກດິຈີຕອລ ທັນສະໄໝຍິ່ງຂຶ້ນ, ຊຶ່ງມີກຳນົດເວລາຈັດຕັ້ງປະຕິບັດ 12 ເດືອນນັບແຕ່ມື້ລົງລາຍເຊັນເປັນຕົ້ນໄປ ໂດຍນໍາໃຊ້ງົບປະມານຂອງບໍລິສັດ. ພາຍຫຼັງການສໍາຫຼວດຄວາມເປັນໄປໄດ້ສິ້ນສຸດລົງ, ສອງຝ່າຍກໍ່ຈະພ້ອມກັນສ້າງເປັນແຜນງານໂຄງການ ແລະ ນໍາສະເໜີ ລັດຖະບານພິຈາລະນາ.

ເນື້ອໃນບົດບັນທຶກສະບັບນີ້,ເປັນການຈັດຕັ້ງແຜນພັດທະນາວຽກງານໄອຍະການປະຊາຊົນ 5 ປີ (2021-2025) ຕາມທິດກ້າວໜ້າ ແລະທັນສະໄໝ,ຍົກສູງຄຸນນະພາບຂອງການຕິດຕາມ, ກວດກາການປະຕິບັດກົດໝາຍ ແລະ ສັ່ງຟ້ອງຜູ້ຖືກຫາຂຶ້ນສານຕາມກົດໝາຍ, ເຊື່ອມໂຍງການຄຸ້ມຄອງ-ບໍລິຫານຂໍ້ມູນຂ່າວສານ ໃນທົ່ວລະບົບອົງການໄອຍະການປະຊາຊົນ ໃຫ້ມີຄວາມເປັນເອກະພາບ ແລະ ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ. ເຮັດໃຫ້ວຽກງານໄອຍະການປະຊາຊົນ, ອົງການໄອຍະການປະຊາຊົນ ເຕີບໃຫຍ່, ເຂັ້ມແຂງ, ນັບມື້ນັບທັນສະໄໝ, ວ່ອງໄວ, ປະຢັດຄ່າໃຊ້ຈ່າຍ, ປະຊາຊົນສາມາດເຂົ້າເຖິງການບໍລິການຂອງອົງການໄອຍະການປະຊາຊົນ ໄດ້ຢ່າງສະດວກສະບາຍ, ການດໍາເນີນຄະດີຖືກຕ້ອງ, ເປັນທໍາ, ປົກປ້ອງສິດ ແລະ ຜົນປະໂຫຍດຂອງລັດ, ຂອງລວມໝູ່, ສິດ ແລະ ຜົນປະໂຫຍດອັນຊອບທໍາຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ເສດຖະກິດ ແລະ ປະເທດຊາດໄດ້ຮັບການພັດທະນາຕໍ່ເນື່ອງ.

แชร์