ພາກລັດ ແລະເອກະຊົນ ຮ່ວມສ້າງສູນພັດທະນາສືມືແຮງງານກະສິກຳ

ໂດຍສະຖາບັນພັດທະນາສີມືແຮງງານກະຊວງແຮງງານ ແລະສະຫວັດດີການສັງຄົມ (ຮສສ) ພ້ອມກັບບໍລິສັດ ໜຳເວ້ພັດທະນາ (ລາວ) ຈຳກັດ, ໄດ້ລົງນາມຄວາມຮ່ວມມືດ້ານວິຊາການ, ຊຶ່ງຕາງໜ້າເຊັນໂດຍທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານ ລາວ-ເກົາຫຼີ ແລະ ທ່ານ ຢ່າງ ລີຮາວ ຕາງໜ້າບໍລິສັດໜຳເວ້ພັດທະນາ (ລາວ) ຈຳກັດ ແລະເຊັນສັນຍາສັນຍາເຊົ່າດິນລັດລະຫວ່າງ ກົມຄຸ້ມຄອງຊັບສິນຂອງລັດ ກະຊວງການເງິນ ກັບ ບໍລິສັດໜຳເວ້ພັດທະນາ (ລາວ) ຈຳກັດ ຕາງໜ້າເຊັນໂດຍທ່ານ ພຸດທະສິນ ເຮືອງທິວົງ ຫົວໜ້າກົມຄຸ້ມຄອງຊັບສິນຂອງລັດ ແລະທ່ານ ຢ່າງ ລີຮາວ ຕາງໜ້າບໍລິສັດໜຳເວ້ພັດທະນາ (ລາວ) ຈຳກັດ.

ວາລະດັ່ງກ່າວຈັດຂຶ້ນເມື່ອວັນທີ 11 ເມສາ 2022, ທີ່ເຮືອນຮັບແຂກກະຊວງ ຮສສ; ເປັນກຽດເຂົ້າຮວ່ມໂດຍ ທ່ານ ລີປ່າວ ຢ່າງ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມ, ມີບັນດາຫົວໜ້າຫ້ອງການ, ບັນດາຫົວໜ້າກົມ, ພ້ອມດວ້ຍບັນດາທ່ານແຂກຖືກເຊີນເຂົ້າຮວ່ມເປັນສັກຂີພິຍານ.

ເນື້ອໃນສັນຍາດັ່ງກ່າວ, ລະບຸກ່ຽວກັບການສ້າງສູນພັດທະນາສືມືແຮງງານດ້ານກະສິກຳ VITAL FARM ເພື່ອການສຶກສາ ແລະແລກປ່ຽນວັດທະນະທຳຕັ້ງຢູ່ບ້ານນາຊາ ເມືອງປາກງື່ມ ນະຄອນຫຼວງວຽງຈັນ, ໂດຍໄດ້ຮັບອະນຸຍາດຢ່າງເປັນທາງການຈາກລັດຖະມົນຕີກະຊວງການເງິນຕາມຂໍ້ຕົກລົງສະບັບເລກທີ 0937/ກງ ລົງວັນທີ 31 ມີນາ 2022 ວ່າດ້ວຍການອະນຸມັດໃຫ້ເຊົ່າ ແລະ ສຳປະທານທີ່ດິນຂອງລັດ ແກ່ ບໍລິສັດໜຳເວ້ພັດທະນາ (ລາວ) ຈຳກັດ, ໂດຍມອບໃຫ້ ກົມຄຸ້ມຄອງຊັບສິນແຫ່ງລັດ ເປັນຜູ້ເຊັນສັນຍາຮ່ວມກັບ ບໍລິສັດ ແລະ ຂໍ້ຕົກລົງຂອງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ສະບັບເລກທີ 1289 /ຮສສ ລົງວັນທີ 6 ເມາສາ 2022 ວ່າດ້ວຍການອະນຸມັດໃຫ້ສະຖາບັນພັດທະນາສີມືແຮງງານເຊັນສັນຍາຮ່ວມມືດ້ານວິຊາການ ກັບ ບໍລິສັດໜຳເວ້ພັດທະນາ (ລາວ) ຈຳກັດ.

ດັ່ງນັ້ນ,ສັນຍາເຊົ່າ-ສຳປະທານທີ່ດິນຂອງລັດ ແລະສັນຍາຮ່ວມມືດ້ານວິຊາການນີ້,ຈິ່ງຖືເປັນຂີດໝາຍໃໝ່ໃນການຜັນຂະຫຍາຍຍຸດທະສາດແຫ່ງຊາດເພື່ອການສົ່ງເສີມວຽກເຮັດງານທຳໃນຊົນນະບົດ; ການຜັນຂະຫຍາຍແຜນພັດທະນາວຽກງານ ຮສສ 5 ປີ ຄັ້ງທີ 5 ດ້ວຍການຮ່ວມມືຈາກນັກລົງທຶນຕ່າງປະເທດເຂົ້າມາເປັນຄູ່ຮ່ວມພັດທະນາ, ສະໜັບສະໜູນທາງດ້ານທຶນຮອນ ແລະເທຄນິຄວິຊາການໃນການພັດທະນາພື້ນຖານໂຄງລ່າງ, ພັດທະນາສີມືແຮງງານດ້ານກະສິກໍາ, ໃຫ້ເປັນລະບົບຄົບຊຸດ ເພື່ອຫຼຸດຜ່ອນການນຳໃຊ້ງົບປະມານຂອງລັດ ເທື່ອລະກ້າວ; ພ້ອມນັ້ນ, ສູນພັດທະນາສີມືແຮງງານດ້ານກະສິກຳແຫ່ງນີ້ກໍ່ຈະກາຍເປັນສູນແຫ່ງການສຶກສາຮຽນຮູ້ທາງດ້ານວິທະຍາສາດ, ເທຄໂນໂລຢີກ່ຽວກັບການພັດທະນາກະສິກໍາທີ່ທັນສະໄໝ, ການທ່ອງທ່ຽວ, ແລກປ່ຽນບົດຮຽນທາງດ້ານວັດທະນະທຳໂດຍຈະເປີດໃຫ້ບໍລິການແກ່ນັກຮຽນ-ນັກສຶກສາຂອງໂຮງຮຽນ, ມະຫາວິທະຍາໄລ ແລະ ຊາວກະສິກອນຜູ້ທີ່ມີຄວາມສົນໃຈໃນດ້ານການປູກຝັງ-ລ້ຽງສັດ ໄດ້ເຂົ້າມາທັດສະນະສຶກສາ ແລະ ຝຶກງານ; ແນໃສ່ສົ່ງເສີມການຜະລິດພາຍໃນ ແລະເປັນສູນການພັດທະນາກະສິກໍາແບບຍືນຍົງ.

แชร์