ນາຍົກລັດຖະມົນຕີ ລາວ-ຫວຽດນາມ ສົນທະນາ-ອວຍພອນໃນວາລະປີໃໝ່ລາວ

ເມື່ອວັນທີ 12 ເມສາ 2022, ສະຫາຍ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບໂທລະສັບອວຍພອນຈາກ ສະຫາຍ ຟ້າມ ມິງ ຈິງ ນາຍົກລັດຖະມົນຕີ ແຫ່ງ ສສ ຫວຽດນາມ, ເນື່ອງໃນໂອກາດບຸນປີໃໝ່ປະຈໍາຊາດລາວ ພ.ສ 2565.

ໂດຍສະຫາຍນາຍົກລັດຖະມົນຕີ ຟ້າມ ມິງ ຈິງ ໄດ້ສົ່ງຄໍາອວຍພອນປີໃໝ່ອັນອົບອຸ່ນທີ່ສຸດມາຍັງສະຫາຍນາຍົກລັດຖະມົນຕີ ພັນຄໍາ ວິພາວັນ, ພ້ອມທັງຝາກຄວາມອວຍພອນປີໃໝ່ຂອງການນໍາຂັ້ນສູງພັກ-ລັດ ແຫ່ງ ສສ ຫວຽດນາມ ສົ່ງເຖິງການນໍາຂັ້ນສູງພັກ-ລັດ ແຫ່ງ ສປປ ລາວ. ພ້ອມທັງສະແດງຄວາມຊົມເຊີຍຜົນສໍາເລັດຂອງ ສປປ ລາວ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຂອງພັກປະຊາຊົນ ປະຕິວັດລາວ ຄັ້ງທີ XI ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9, ຊຶ່ງເຫັນວ່າພາຍໃຕ້ການນໍາພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ປະຊາຊົນລາວອ້າຍນ້ອງສາມາດຍາດໄດ້ຜົນສໍາເລັດໃໝ່ຫຼາຍດ້ານ, ສ້າງປະເທດລາວຮຸ່ງເຮືອງສີວິໄລ, ຖານະບົດບາດຂອງ ສປປ ລາວ ໃນເວທີພາກພື້ນ ແລະສາກົນນັບມື້ນັບສູງເດັ່ນຂຶ້ນ.

ໃນທ່າມກາງບັນຍາກາດແຫ່ງບຸນປີໃໝ່ລາວກໍຄືບັນຍາກາດການສະເຫຼີມສອງຫຼອງປີສາມັກຄີມິດຕະພາບລາວ-ຫວຽດນາມ 2022 ຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ, ສອງນາຍົກລັດຖະມົນຕີລ້ວນມີຄວາມເບີກບານມ່ວນຊື່ນ, ຮ່ວມກັນຕີລາຄາສູງຕໍ່ການຂະຫຍາຍຕົວຂອງການພົວພັນສອງຝ່າຍ ລາວ-ຫວຽດນາມ ຕະຫຼອດໄລຍະຜ່ານມາ. ບໍ່ວ່າຈະໃນເວລາໃດກໍຄືສະພາບການໃດມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລາວ-ຫວຽດນາມ ຫວຽດນາມ-ລາວ ກໍສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.

ສອງຝ່າຍໄດ້ສະແດງຄວາມເພິ່ງພໍໃຈທີ່ເຫັນວ່າບົນພື້ນຖານການຕົກລົງຂອງການນໍາຂັ້ນສູງສອງຝ່າຍກໍຄືຜົນການພົບປະຂອງສອງນາຍົກລັດຖະມົນຕີໃນໂອກາດການຢ້ຽມຢາມ ສສ ຫວຽດນາມ ຢ່າງເປັນທາງການ, ກໍ່ຄືການເຂົ້າຮ່ວມກອງປະຊຸມຄະນະກໍາມະການຮ່ວມມືທະວິພາຄີ ລາວ-ຫວຽດນາມ ຄັ້ງທີ 44 ໃນເດືອນມັງກອນ 2022 ທີ່ນະຄອນຫຼວງຮ່າໂນ້ຍ, ທີ່ສອງນາຍົກລັດຖະມົນຕີ ໄດ້ຕັດສິນໃຈຢ່າງເດັດຂາດໃນການຊຸກຍູ້ການພົວພັນຮ່ວມມືດ້ານເສດຖະກິດລະຫວ່າງສອງປະເທດໃຫ້ມີປະສິດທິຜົນຂຶ້ນສູ່ລະດັບສູງໃໝ່, ຂະແໜງການກ່ຽວຂ້ອງໄດ້ເອົາໃຈໃສ່ຈັດຕັ້ງປະຕິບັດຢ່າງຕັ້ງໜ້າ, ສະແດງອອກຜ່ານການເຮັດວຽກຮ່ວມກັນທັງແບບເຊິ່ງໜ້າ ແລະ ແບບທາງໄກໃນໄລຍະ 3 ເດືອນຜ່ານມາ, ຜ່ານການເດີນທາງມາຢ້ຽມຢາມເຮັດວຽກຂອງຄະນະຜູ້ແທນຂັ້ນສູງ, ກະຊວງແຜນການ ແລະການລົງທຶນ, ຄະນະກໍາມະການຮ່ວມມື ຫວຽດນາມ-ລາວ, ເລຂາພັກນະຄອນຫຼວງຮ່າໂນ້ຍກໍຄືກະຊວງອຸດສາຫະກໍາ ແລະການຄ້າໃນມໍ່ໆມານີ້.

ສອງຝ່າຍໄດ້ເປັນເອກະພາບກັນສືບຕໍ່ຮ່ວມກັນຈັດກິດຈະກໍາສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຢ່າງເປັນຂະບວນຟົດຟື້ນ,ສືບຕໍ່ແລກປ່ຽນຄະນະຮ່ວມກັນໃນທຸກລະດັບ, ສືບຕໍ່ຈັດຕັ້ງຜັນຂະຫຍາຍການຕົກລົງຂອງການນໍາຂັ້ນສູງສອງຝ່າຍ, ສືບຕໍ່ເພີ່ມທະວີການຮ່ວມມືດ້ານເສດຖະກິດ-ສັງຄົມ, ການເຊື່ອມໂຍງພື້ນຖານໂຄງລ່າງໃຫ້ນັບມື້ນັບມີປະສິດທິຜົນຍິ່ງຂຶ້ນເພື່ອຜົນປະໂຫຍດຂອງປະຊາຊົນສອງຊາດ, ສືບຕໍ່ເອົາ​ໃຈ​ໃສ່ເພີ່ມທະວີ​ການ​ສຶກ​ສາ​ອົບ​ຮົມ​ມູນ​ເຊື້ອ​ຄວາມ​ສາ​ມັກ​ຄີ​ພິ​ເສດ ລາວ-ຫວຽດ​ນາມ ໃນ​ຖັນ​ແຖວ​ພະ​ນັກ​ງານ ແລະປະ​ຊາ​ຊົນ​ເປັນ​ຕົ້ນ​ແມ່ນ​ຖັນ​ແຖວ​ຊາວ​ໜຸ່ມ-ເຍົາ​ວະ​ຊົນຂອງ​ສອງ​ປະ​ເທດ​; ສືບຕໍ່ຮ່ວມມື ແລະສະໜັບສະໜູນເຊິ່ງກັນແລະກັນໃນເວທີພາກພື້ນ ແລະສາກົນ.

ໂອກາດນີ້, ສະຫາຍ ພັນຄໍາ ວິພາວັນ ກໍໄດ້ສະແດງຄວາມຂອບໃຈມາຍັງ ສະຫາຍ ຟ້າມ ມິງ ຈິງ ທີ່ໄດ້ໂທລະສັບມາອວຍພອນປີໃໝ່ປະຈຳຊາດລາວໃນຄັ້ງນີ້,ຊຶ່ງສະແດງໃຫ້ເຫັນເຖິງໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມ ແລະ ຄວາມສາມັກຄີພິເສດຂອງສອງຊາດ, ພ້ອມທັງຕາງໜ້າການນໍາຂັ້ນສູງ ພັກ-ລັດ ແຫ່ງ ສປປ ລາວ ຝາກຄວາມຂອບໃຈໄປຍັງການນໍາຂັ້ນສູງ ພັກ-ລັດ ແຫ່ງ ສສ ຫວຽດນາມ ຕໍ່ກັບຄໍາອວຍພອນປີໃໝ່ອັນອົບອຸ່ນທີ່ສຸດ. ພ້ອມນີ້, ສະຫາຍ ພັນຄໍາ ວິພາວັນ ກໍໄດ້ອວຍພອນໃຫ້ ສະຫາຍ ຟ້າມ ມິງ ຈິງ ພ້ອມຄອບຄົວ ແລະຝາກຄໍາອວຍພອນໄປຍັງການນໍາຫວຽດນາມຈົ່ງມີແຕ່ຄວາມຜາສຸກ ແລະປະສົບຜົນສໍາເລັດໃນໜ້າທີ່ວຽກງານອັນໃໝ່ທີ່ຍິ່ງໃຫຍ່ກວ່າເກົ່າ, ສືບຕໍ່ນໍາພາປະເທດຫວຽດນາມພັດທະນາ, ຮຸ່ງເຮືອງ, ສີວິໄລ ຍິ່ງໆຂຶ້ນ ແລະໄດ້ເຊື້ອເຊີນສະຫາຍ ຟ້າມ ມິງ ຈິງ ພ້ອມດ້ວຍພັນລະຍາມາຢ້ຽມຢາມລາວໃນເວລາອັນຄວນອີກດ້ວຍ.

แชร์