ສຽມຣາດ ຈັດງານປີໃໝ່ກຳປູເຈຍແບບ “ໄຮ້ພລາສຕິກ”

ເມືອງ ບັນທາຍສຣີ ແຂວງສຽມຣາດ ປະເທດກຳປູເຈຍ, ຈັດງານເທສະການປີໃໝ່ ແບບ “ໄຮ້ ພລາສຕິກ” ໂດຍການຊຸກຍູ້ໃຫ້ຊາວຄ້າຂາຍໃຊ້ວັດສະດຸຫຸ້ມຫໍ່ຈາກທຳມະຊາດເຊັ່ນ ໃບບົວ ແລະ ໃບຕອງ ເພື່ອຫຼຸດຂີ້ເຫຍື້ອ ແລະ ປົກປ້ອງສິ່ງແວດລ້ອມ.

ສຳນັກຂ່າວຕ່າງປະເທດໄດ້ລາຍງານໃນວັນທີ 17 ເມສາ 2022 ໂດຍອ້າງການເປີດເຜີຍຂອງ ທ່ານ ຂິມ ຟິນັນ ເຈົ້າເມືອງ ບັນທາຍສຣີ, ທີ່ລະບຸຕໍ່ເວັບໄຊຕ໌ພະນົມເປນໂພສ ວ່າ “ດ້ວຍຄວາມຮ່ວມມືຮ່ວມໃຈຂອງຊາວຄ້າຂາຍໃນຖະໜົນລະຫວ່າງໝູ່ບ້ານ ແລະ ຊຸມຊົນ, ພາກລັດຈິ່ງເປີດໂຄງ ການ  “ໝູ່ບ້ານປຣະດະ (Preah Dak) ໄຮ້ພລາສຕິກ” ລະຫວ່າງວັນທີ 11-17 ເມສາ ຊຶ່ງເປັນໄລຍະເທສະການປີໃໝ່ກຳປູເຈຍ. ເພື່ອປູກຈິດສໍານຶກການຊື້-ຂາຍໄຮ້ພລາສຕິກ, ຫຼັງຈາກປະສົບບັນຫາຂີ້ເຫຍື້ອລົ້ນເມື່ອສຳເລັດງານເທສະການ, ໂດຍສະເພາະຖົງຢາງພລາສຕິກໃສ່ອາຫານທີ່ຜູ້ຄົນມັກຖິ້ມຊະຊາຍ”.

ເມືອງ ບັນທາຍສຣີ ສະໜັບສະໜູນໃຫ້ຊາວບ້ານປຣະດະ ສ້າງນິດໄສບໍ່ຮັບຖົງຢາງພລາສຕິກ ແລະ ເພີ່ມຄວາມຮັບຮູ້ກັບຜູ້ມາຢ້ຽມຢາມ ໃນການຫຼຸດຜ່ອນນຳໃຊ້ພລາສຕິກ, ເນື່ອງຈາກປັດຈຸບັນນີ້ ໝູ່ບ້ານດັ່ງກ່າວແມ່ນກາຍເປັນແຫຼ່ງທ່ອງທ່ຽວໃໝ່. ນອກນັ້ນ, ເນື້ອໃນການປູກຈິດສຳນຶກ ຍັງຖືເປັນເຄື່ອງເຕືອນໃຈວ່າ “ຢ່າຖິ້ມຂີ້ເຫຍື້ອຊະຊາຍ”.

“ຊາວຄ້າຂາຍສ່ວນໃຫຍ່ໃນໝູ່ບ້ານປຣະດະທີ່ຂາຍປີ້ງໄກ່ ແລະ ປີ້ງກົບ ໄດ້ຫັນປ່ຽນໄປນຳໃຊ້ໃບບົວ, ໃບຕອງ, ເຊືອກກ້ວຍ ຊຶ່ງຖືເປັນທາງເລືອກທີ່ດີຕໍ່ສິ່ງແວດລ້ອມ ແລະ ສະໜັບສະໜູນການໃຊ້ວັດຖຸດິບໃນທ້ອງຖິ່ນ. ທັງນີ້, ຮ້ານຄ້າໃດທີ່ປະຕິບັດຕາມຄູ່ມືນີ້ໄດ້ເປັນຢ່າງດີເພື່ອເປັນຕົວແບບໃຫ້ແກ່ຄົນອື່ນໆ ກໍ່ຈະໄດ້ຮັບປະກາສະນິຍະບັດ ແລະ ລາງວັນຫຼັງຈາກສຳເລັດງານເທສະການ” ທ່ານ ຂິມ ຟິນັນ ກ່າວ.

แชร์