ຜົນກອງປະຊຸມລັດຖະບານ ວິສາມັນ ເດືອນເມສາ 2022

ລັດຖະບານ ໄດ້ສຳເລັດການດຳເນີນກອງປະຊຸມວິສາມັນ ເດືອນເມສາ 2022 ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີຮອງນາຍົກລັດຖະມົນຕີ, ຮອງປະທານສະພາແຫ່ງຊາດ, ສະມາຊິກລັດຖະບານ ແລະບັນດາແຂກຖືກເຊີນເຂົ້າຮ່ວມ.

ກອງປະຊຸມຊຶ່ງຈັດຂຶ້ນເມື່ອວັນທີ 12 ເມສາ, ໄດ້ຮັບຟັງການລາຍງານ, ຄົ້ນຄວ້າ, ປຶກສາຫາລືຕໍ່ 3 ຮ່າງກົດໝາຍ ທີ່ລັດຖະບານຈະນໍາສະເໜີຕໍ່ກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ພິຈາລະນາຮັບຮອງຊຶ່ງປະກອບມີ ຮ່າງກົດໝາຍ ວ່າດ້ວຍວິຈິດສິນ (ສ້າງໃໝ່); ຮ່າງກົດໝາຍວ່າດ້ວຍຄວາມປອດໄພຂອງເຂື່ອນ (ສ້າງໃໝ່) ແລະ ຮ່າງກົດໝາຍວ່າດ້ວຍຊັບສິນຂອງລັດ (ສະບັບປັບປຸງ).

ກອງປະຊຸມ ໄດ້ປະກອບຄຳຄິດຄຳເຫັນ, ແລ້ວຈິ່ງເຫັນດີດ້ານຫຼັກການ ຮັບຮອງເອົາ 3 ຮ່າງກົດໝາຍດັ່ງກ່າວ ແລະ ໄດ້ຊີ້ນໍາໃຫ້ກະຊວງທີ່ກ່ຽວຂ້ອງ ນໍາໄປປັບປຸງຕື່ມຕາມຄໍາເຫັນຂອງສະມາຊິກລັດຖະບານ,ໂດຍໃຫ້ມີການປະສານສົມທົບ ກັບ ກະຊວງຍຸຕິທໍາ ແລະພາກສ່ວນກ່ຽວຂ້ອງເພື່ອເຮັດໃຫ້ມີເນື້ອໃນສົມບູນ,ເລິກເຊິ່ງ, ລະອຽດ, ຈະແຈ້ງ, ຄົບຖ້ວນ, ຮັດກຸມ, ເຂົ້າໃຈງ່າຍ, ທັງໃຫ້ສອດ ຄ່ອງກັບສະພາບການຕົວຈິງ ແລະ ສາມາດຈັດຕັ້ງປະຕິບັດໄດ້. ໂດຍສະເພາະແມ່ນ ຮ່າງກົດໝາຍທີ່ສ້າງໃໝ່ນັ້ນໃຫ້ນິຍາມຕື່ມບາງຄຳສັບ, ປັບປຸງຕື່ມບາງສໍານວນໃຫ້ຖືກຕ້ອງກັບຫຼັກພາສາລາວ, ລວມທັງຊື່ ແລະ ໂຄງສ້າງຂອງກົດໝາຍ, ເພີ່ມບາງເນື້ອໃນທີ່ບໍ່ທັນຄົບຖ້ວນ ແລະ ໃຫ້ສຳເລັດທັນນຳເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະມາເຖິງນີ້.

ຢ່າງໃດກໍດີ, ທ່ານປະທານກອງປະຊຸມກໍ່ໄດ້ຊີ້ນໍາໃຫ້ຂະແໜງການກ່ຽວຂ້ອງເອົາໃຈໃສ່ວຽກຈຸດສຸມສຳຄັນ, ໂດຍເຫັນດີດ້ານຫຼັກການໃຫ້ມີການເປີດປະເທດ,ລາຍລະອຽດມອບໃຫ້ພາກສ່ວນກ່ຽວຂ້ອງ ນຳໄປພິຈາລະນາຄົ້ນຄວ້າ ໂດຍອີງໃສ່ບົດຮຽນຕົວຈິງຂອງປະເທດອ້ອມຂ້າງ; ສືບຕໍ່ຍົກສູງຄວາມຮັບຜິດຊອບ ແລະຕິດຕາມຜົນກະທົບທາງດ້ານການເມືອງ, ເສດຖະກິດ ແລະສັງຄົມຕໍ່ປະເທດເຮົາ ທີ່ຂະແໜງການຕົນຮັບຜິດຊອບໃນແຕ່ລະໄລຍະຢ່າງໃກ້ຊິດ; ສືບຕໍ່ສຸມທຸກກໍາລັງແຮງຂອງທຸກພາກສ່ວນໃນສັງຄົມເພື່ອເລັ່ງຟື້ນຟູເສດຖະກິດຂອງປະເທດເຮົາໃຫ້ຄືນສູ່ສະພາບປົກກະຕິໂດຍໄວໃນເງື່ອນໄຂການລະບາດຂອງພະຍາດໂຄວິດ-19, ໄປຄຽງຄູ່ກັບການຈັດຕັ້ງປະຕິບັດ 2 ວາລະແຫ່ງຊາດ. ນອກນັ້ນ, ກໍໃຫ້ສືບຕໍ່ສົ່ງເສີມການຜະລິດກະສິກໍາ ແລະສິນຄ້າໃຫ້ຫຼາຍຂຶ້ນເພື່ອຮັບປະກັນທາງດ້ານສະບຽງອາຫານ ແລະຕອບສະໜອງຄວາມຕ້ອງການຢູ່ພາຍໃນປະເທດໃຫ້ພຽງພໍ;​ ໃຫ້ກະຊວງການເງິນ ແລະ ກະຊວງອຸດສາຫະກໍາ ແລະການຄ້າຮີບຮ້ອນແກ້ໄຂບັນຫາລາຄານໍ້າມັນເພື່ອຫຼຸດຜ່ອນຜົນກະທົບທາງກົງ ແລະທາງອ້ອມຕໍ່ການພັດທະນາເສດຖະກິດ-ສັງຄົມ ແລະຊີວິດການເປັນຢູ່ຂອງປະຊາຊົນໂດຍໄວ. ໃຫ້ກະຊວງອຸດສາຫະກຳ ແລະ ການຄ້າ, ຕິດຕາມ ແລະ ຄຸ້ມຄອງລາຄາສິນຄ້າ ແລະສະບຽງອາຫານຢ່າງໃກ້ຊິດເພື່ອບໍ່ໃຫ້ມີການສວຍໂອກາດຂຶ້ນລາຄາ; ສືບຕໍ່ຄຸ້ມຄອງ ແລະຮັກສາສະຖຽນລະພາບດ້ານເງິນຕາໃຫ້ມີຄວາມໝັ້ນທ່ຽງ ແລະ ເໜັງຕີງໃນລະດັບທີ່ກໍານົດໄວ້, ໂດຍສະເພາະການຄຸ້ມຄອງ, ຕິດຕາມ, ກວດກາ ແລະດໍາເນີນມາດຕະການຢ່າງເຂັ້ມງວດ ຕໍ່ພາກສ່ວນ ຫຼືບຸກຄົນທີ່ສວຍໂອກາດປັ່ນປ່ວນອັດຕາແລກປ່ຽນເງິນຕາ. ພ້ອມນັ້ນ, ກໍໃຫ້ຮີບຮ້ອນສ້າງກົນໄກ ຫຼືຫັນເປັນທັນສະໄໝເພື່ອຄຸ້ມຄອງບັນດາຫົວໜ່ວຍທຸລະກິດສົ່ງອອກສິນຄ້າໃຫ້ນຳເງິນຕາຕ່າງປະເທດເຂົ້າມາຜ່ານລະບົບທະນາຄານ.

ໂດຍກອງປະຊຸມໄດ້ຮຽກຮ້ອງໃຫ້ບັນດາຂະແໜງການຈົ່ງຕັ້ງໜ້າປະຕິບັດສິດ ແລະພັນທະຂອງຕົນໃຫ້ຄົບຖ້ວນຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະກົດໝາຍ ແລະເປັນເຈົ້າໃນການຈັດຕັ້ງປະຕິບັດ 2 ວາລະແຫ່ງຊາດໃຫ້ສໍາເລັດຕາມແຜນການ ແລະຄາດໝາຍທີ່ກຳນົດໄວ້.

แชร์