ເອດີບີ ຄາດເສດຖະກິດລາວປີນີ້ຂະຫຍາຍຕົວ 3,4 ປີໜ້າ 3,7

ໃນວັນທີ 6 ເມສາ 2022 ທະນາຄານພັດທະນາເອເຊຍ ຫຼື ເອດີບີ (ADB) ໄດ້ເຜີຍແຜ່ບົດລາຍງານການຄາດຄະເນເສດຖະກິດຂອງເອເຊຍ ປະຈຳປີ 2022, ໃນນັ້ນ ເສດຖະກິດ ສປປ ລາວ ຄາດວ່າຈະຂະຫຍາຍໂຕ 3,4% ໃນປີນີ້ ແລະ 3,7% ໃນປີໜ້າ ຈາກປັດໄຈສົ່ງເສີມການສົ່ງອອກ.

ໂດຍ ເອດີບີ ຊີ້ວ່າການຄຸ້ມຄອງການເງິນຂອງປະເທດທີ່ມີປະສິດທິພາບຈະເປັນປັດໄຈສໍາຄັນໃຫ້ແກ່ການຟື້ນຟູເສດຖະກິດທີ່ຍັງຄົງອ່ອນແອ ແລະຜະເຊີນໜ້າກັບຫຼາຍມໍລະສຸມຊຶ່ງລວມເຖິງການລະບາດຂອງພະຍາດໂຄວິດ-19, ອັດຕາເງິນເຟີ້ສູງ ແລະຜົນກະທົບຈາກຄວາມຂັດແຍ່ງລະຫວ່າງຣັສເຊຍ ແລະຢູເຄຣນ.

ທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈໍາ ສປປ ລາວ, ໄດ້ລະບຸວ່າ " ໃນປີ 2021 ເສດຖະກິດຂອງ ສປປ ລາວ ໄດ້ຄ່ອຍໆຟື້ນຕົວຈາກສະພາບເສດຖະກິດທີ່ຕົກຕໍ່າທີ່ສຸດໃນຮອບຫຼາຍທົດສະວັດ, ແຕ່ຜົນກະທົບຈາກການລະບາດຂອງພະຍາດໂຄວິດ-19 ແລະ ອັດຕາເງິນເຟີ້ທີ່ສູງກໍ່ເຮັດໃຫ້ສະພາບການຟື້ນຕົວມີທ່າອຽງຫຼຸດລົງ; ໃນຂະນະທີ່ລັດຖະບານກໍ່ຕ້ອງໄດ້ເຝົ້າລະວັງ, ທັງເລັ່ງສັກວັຄຊີນຢ່າງຕໍ່າສອງເຂັ້ມໃຫ້ກັບພົນລະເມືອງຂອງຕົນຫຼາຍເທົ່າທີ່ຈະຫຼາຍໄດ້ ແລະເພີ່ມທະວີຄວາມໂປ່ງໃສໃນການຄຸ້ມຄອງການເງິນພາກລັດເພື່ອຟື້ນຟູຄວາມໝັ້ນໃຈຂອງຕະຫຼາດ ແລະດຶງດູດການລົງທຶນທີ່ມີຄຸນນະພາບ ແລະຍືນຍົງ".

ຢ່າງໃດກໍຕາມ,ການລະບາດພະຍາດໂຄວິດ-19 ຮອບສອງໃນເດືອນເມສາ 2021 ໄດ້ເຮັດໃຫ້ລັດຖະບານປະກາດປິດເມືອງຫຼາຍຄັ້ງ, ຊຶ່ງໄດ້ລົບກວນກິດຈະກໍາທາງດ້ານເສດຖະກິດໃນຂະແໜງການບໍລິການພາຍໃນ ລວມທັງໂຮງແຮມ, ຮ້ານອາຫານ ແລະ ການຂົນສົ່ງ.ທັງນີ້,ເພື່ອຊຸກຍູ້ການຟື້ນຟູຕະຫຼາດພາຍໃນປະເທດ, ລວມທັງການທ່ອງທ່ຽວ, ຊຶ່ງໃນເດືອນມັງກອນ 2022 ລັດຖະບານກໍ່ໄດ້ຜ່ອນຜັນມາດຕະການຄວບຄຸມພະຍາດໂຄວິດ-19 ແລະເລັ່ງໃສ່ການສັກວັຄຊີນໂດຍຕັ້ງເປົ້າໃຫ້ບັນລຸ 80% ຂອງປະຊາກອນໃນທົ່ວປະເທດໃນທ້າຍປີ 2022 ເມື່ອທຽບໃສ່ 50% ໃນເດືອນທັນວາ 2021.

ຢ່າງໃດກໍດີ, ການສົ່ງອອກຂອງຂະແໜງອຸດສາຫະກຳ ແລະຂະແໜງກະສິກຳໄດ້ປະກອບສ່ວນໃຫ້ແກ່ການຟື້ນຕົວຂອງເສດຖະກິດໃນປີທີ່ຜ່ານມາ. ພ້ອມນັ້ນ, ສະພາບອາກາດທີ່ເອື້ອອຳນວຍກໍ່ເຮັດໃຫ້ເຂື່ອນຫຼາຍແຫ່ງສາມາດຜະລິດໄຟຟ້າ ແລະດໍາເນີນການຜະລິດໄດ້ເຕັມກຳລັງ, ທັງເພີ່ມການຜະລິດໄຟຟ້າເພື່ອການສົ່ງອອກ. ທາງດ້ານການສົ່ງອອກສິນຄ້າກະສິກຳກໍ່ເພີ່ມຂຶ້ນໃນຫຼາຍຊະນິດ, ຊຶ່ງສ່ວນໜຶ່ງແມ່ນຄວາມຕ້ອງການຂອງຕະຫຼາດຈີນທີ່ເພີ່ມຂຶ້ນ. ໂດຍຄາດວ່າການສົ່ງອອກໃນປີນີ້ຈະເພີ່ມຂຶ້ນເນື່ອງຈາກວ່າຈະມີການໄຫຼເຂົ້າຂອງການລົງທຶນຈາກຕ່າງປະເທດໃນການພັດທະນາພະລັງງານໄຟຟ້າດ້ວຍແຮງລົມ, ພະລັງງານແສງອາທິດ, ພະລັງງານໄຟຟ້າທີ່ປ່ອຍອາຍຄາຣ໌ບອນຕໍ່າ ແລະອື່ນໆເພື່ອສົ່ງອອກກະແສໄຟຟ້າ.

 ແຕ່ຫາກວ່າການເພີ່ມຂຶ້ນຂອງລາຄານໍ້າມັນເຊື້ອໄຟ ແລະການອ່ອນຄ່າຂອງເງິນກີບ, ກໍ່ເຮັດໃຫ້ອັດຕາເງິນເຟີ້ຢູ່ໃນລະດັບ 5,3%  ໃນເດືອນທັນວາ 2021 ແລະ ອາດເພີ່ມຂຶ້ນຢູ່ໃນລະດັບ 5,8% ໃນປີ 2022  ແລະ 5,0% ໃນປີ 2023, ຊຶ່ງເງິນເຟີ້ຈະສ້າງຄວາມຫຍຸ້ງຍາກໃຫ້ແກ່ການແກ້ບັນຫາໜີ້ສິນຂອງປະເທດທີ່ມີຄວາມສ່ຽງສູງຢູ່ແລ້ວ. ໃນບົດລາຍງານສະບັບນີ້, ໄດ້ຮຽກຮ້ອງໃຫ້ລັດຖະບານເພີ່ມທະວີຄວາມໂປ່ງໃສໃນການຄຸ້ມຄອງໜີ້ສິນສາທາລະນະກັບຕ່າງປະເທດ, ຊຶ່ງຈະຊ່ວຍເປີດໂອກາດໃຫ້ ສປປ ລາວ ເຂົ້າເຖິງແຫຼ່ງທຶນເພື່ອການພັດທະນາແບບຍືນຍົງ.

ຂໍ້ມູນຈາກ: ເອດີບີ

แชร์