ລົງນາມບັນທຶກກົນໄກປະສານງານດຳເນີນຄະດີອາຍາ ປ່າໄມ້ ແລະ ສັດນໍ້າ-ສັດປ່າ

 ເມື່ອວັນທີ 5 ເມສາ 2022 ທີ່ຫ້ອງປະຊຸມອົງການໄອຍະການປະຊາຊົນສູງສຸດ, ໄດ້ຈັດພິທີລົງນາມບົດບັນທຶກການກຳນົດກົນໄກປະສານງານໃນການດຳເນີນຄະດີອາຍາ ກ່ຽວກັບປ່າໄມ້ ແລະ ສັດນໍ້າ-ສັດປ່າ, ລະຫວ່າງອົງການໄອຍະການປະຊາຊົນສູງສຸດ ແລະກະຊວງກະສິກຳ ແລະປ່າໄມ້. ໃຫ້ກຽດເປັນປະທານຮ່ວມໂດຍ ທ່ານ ໄຊຊະນະ ໂຄດພູທອນ ກໍາມະການສູນກາງພັກຫົວໜ້າອົງການໄອຍະການປະຊາຊົນສູງສຸດ, ທ່ານ ເພັດ ພົມພິພັກ ກໍາມະການສູນກາງພັກ, ລັດຖະມົນຕີກະຊວງກະສິກໍາ ແລະປ່າໄມ້, ມີຮອງຫົວໜ້າອົງການປະຊາຊົນສູງສຸດ, ຮອງລັດຖະມົນຕີ, ຄະນະປະສານງານຮ່ວມມືທັງ 2 ຝ່າຍ ແລະພະນັກງານຫຼັກແຫຼ່ງທັງສອງພາກສ່ວນ ເຂົ້າຮ່ວມ.

  ບົດບັນທຶກດັ່ງກ່າວ ປະກອບມີ 8 ຂໍ້ ຄື 1/ ແຕ່ງຕັ້ງຄະນະປະສານງານຮ່ວມລະຫວ່າງອົງການໄອຍະການປະຊາຊົນສູງສຸດ ແລະກະຊວງກະສິກຳ ແລະປ່າໄມ້, ໃນນັ້ນ ຂັ້ນທ້ອງຖິ່ນ ແຕ່ງຕັ້ງຄະນະປະສານງານຮ່ວມ ລະຫວ່າງ ອົງການໄອຍະການປະຊາຊົນ ແລະ ອົງການສືບສວນ-ສອບສວນ ຂອງເຈົ້າໜ້າທີ່ປ່າໄມ້ , ດໍາເນີນຄະດີອາຍາຕໍ່ຜູ້ລະເມີດ; 2/ ແຕ່ງຕັ້ງກອງເລຂາຊ່ວຍວຽກປະສານງານ, ກະກຽມເອກະສານ ແລະ ວຽກງານຕ່າງໆ ລະຫວ່າງອົງການໄອຍະການປະຊາຊົນສູງສຸດ ແລະ ກະຊວງກະສິກຳ ແລະປ່າໄມ້; 3/. ກໍານົດກົນໄກລະບອບປະຊຸມຂອງຄະນະປະສານງານຮ່ວມ 3 ເດືອນຕໍ່ຄັ້ງ; ອົງການໄອຍະການປະຊາຊົນສູງສຸດເປັນໃຈກາງຈັດກອງປະຊຸມ; ກໍລະນີທີ່ຈໍາເປັນ ແລະຮີບດ່ວນໃຫ້ອົງການໄອຍະການປະຊາຊົນສູງສຸດ ຫຼືກະຊວງກະສິກໍາ ແລະ ປ່າໄມ້ນໍາບັນຫາທີ່ຈໍາເປັນ ແລະຮີບດ່ວນເຂົ້າກອງປະຊຸມຄະນະປະສານງານ ເພື່ອຮ່ວມກັນຄົ້ນຄວ້າຕົກລົງແກ້ໄຂ, ສະໜອງຂໍ້ມູນຂ່າວສານ ຫຼື ຫຼັກຖານທີ່ກ່ຽວຂ້ອງ ເປັນເຈົ້າການແກ້ໄຂຢ່າງເດັດຂາດ ແລະ ເປັນຮູບປະທໍາ; 4/ ບັນຫາທີ່ນໍາມາຄົ້ນຄວ້າ ແລະຕົກລົງໃນກອງປະຊຸມຄະນະປະສານງານຮ່ວມແມ່ນການດໍາເນີນຄະດີອາຍາຕໍ່ຜູ້ລະເມີດກົດໝາຍວ່າດ້ວຍປ່າໄມ້ ແລະ ກົດໝາຍວ່າດ້ວຍສັດນໍ້າ ແລະ ສັດປ່າທີ່ມີຄວາມຫຍຸ້ງຍາກສັບສົນ, ຄະດີລາຍໃຫຍ່ ຫຼືຄະດີທີ່ພົວພັນກັບການຮ່ວມມືສາກົນ, ຄະດີທີ່ສັງຄົມໃຫ້ຄວາມສົນໃຈ, ຄະດີທີ່ມີການກະທໍາຜິດພົວພັນກັບຫຼາຍພາກສ່ວນ ຫຼື ຫຼາຍແຂວງ; ເປັນຕົ້ນແມ່ນ ການກໍານົດເຫດການຂອງຄະດີ, ການຕີຄວາມໝາຍຂອງມາດຕາກົດໝາຍ, ການນໍາໃຊ້ວິທີການສືບສວນ-ສອບສວນ,ມາດຕະການສະກັດກັ້ນ ແລະ ບັນຫາອື່ນ,ຊຶ່ງສໍານວນຄະດີ ຢູ່ນໍາພາກສ່ວນໃດໃຫ້ພາກສ່ວນນັ້ນເປັນເຈົ້າການສະໜອງຂໍ້ມູນຂ່າວສານ ຫຼືເອກະສານຫຼັກຖານທີ່ກ່ຽວຂ້ອງ ເພື່ອຄົ້ນຄວ້າ, ຕົກລົງແກ້ໄຂໃຫ້ບຸກຄົນ ແລະ ຕິດຕາມກວດກາ, ຊີ້ນໍາ-ນໍາພາການຈັດຕັ້ງປະຕິບັດຢ່າງໃກ້ຊິດ; 5/ ກໍານົດກົນໄກໃນການສະຫຼຸບລາຍງານສະຖິຕິການດໍາເນີນຄະດີອາຍາຕໍ່ຜູ້ລະເມີດກົດໝາຍລະຫວ່າງອົງການໄອຍະການປະຊາຊົນ ແລະອົງການສືບສວນ-ສອບສວນຂອງເຈົ້າໜ້າທີ່ປ່າໄມ້ແຕ່ສູນກາງລົງຮອດທ້ອງຖິ່ນ ຕາມລະບົບສາຍຕັ້ງໃນຂອບເຂດທົ່ວປະເທດ, ໂດຍມອບໃຫ້ກອງເລຂາຊ່ວຍວຽກ ຂອງອົງການໄອຍະການປະຊາຊົນສູງສຸດ ແລະ ກະຊວງກະສິກໍາ ແລະ ປ່າໄມ້; ຄົ້ນຄວ້າຮ່າງແບບຟອຣ໌ມລາຍງານສະຖິຕິຄະດີອາຍາ ຕໍ່ຜູ້ລະເມີດກົດໝາຍໃຫ້ຫົວໜ້າຫ້ອງການສອງພາກສ່ວນ ແຈ້ງການໃຫ້ທ້ອງຖິ່ນໃນການຈັດຕັ້ງປະຕິບັດໂດຍກຳນົດເອົາວັນທີ 20 ຂອງທຸກໆເດືອນເປັນວັນປິດຕົວເລກ ແລະສະຫຼຸບເຂົ້າບັນຊີສະຖິຕິລາຍງານສາຍຕັ້ງຂອງຕົນ; 6/ ຄະນະປະສານງານຂອງອົງການໄອຍະການປະຊາຊົນສູງສຸດ ແລະ ກະຊວງກະສິກໍາ ແລະ ປ່າໄມ້, ຄົ້ນຄວ້າຮ່າງຄໍາແນະນໍາຮ່ວມ, ຄໍາສັ່ງ ຫຼື ນິຕິກໍາອື່ນທີ່ພົວພັນກັບການດໍາເນີນຄະດີອາຍາຕໍ່ຜູ້ລະເມີດກົດໝາຍເພື່ອເປັນບ່ອນອີງໃຫ້ອົງການໄອຍະການປະຊາຊົນ ແລະ ອົງການສືບສວນ-ສອບສວນ ຂອງເຈົ້າໜ້າທີ່ປ່າໄມ້ແຕ່ສູນກາງລົງຮອດທ້ອງຖິ່ນຈັດຕັ້ງປະຕິບັດໃນຂອບເຂດທົ່ວປະເທດ; 7/ ການຈັດຝຶກອົບຮົມເພື່ອສ້າງຄວາມເຂັ້ມແຂງກ່ຽວກັບການດໍາເນີນຄະດີອາຍາໃຫ້ພະນັກງານ ອົງການໄອຍະການປະຊາຊົນ ແລະ ເຈົ້າໜ້າທີ່ອົງການສືບສວນ-ສອບສວນຂອງເຈົ້າໜ້າທີ່ປ່າໄມ້ທັງສູນກາງ ແລະທ້ອງຖິ່ນຮ່ວມກັນ, ໂດຍນໍາໃຊ້ງົບປະມານຂອງແຕ່ລະພາກສ່ວນ ຫຼື ນໍາໃຊ້ງົບປະມານມາຈາກພາກສ່ວນອື່ນ; 8/ ມອບໃຫ້ ຄະນະປະສານງານຮ່ວມອອກແຈ້ງການ ແລະ ເຜີຍແຜ່ບົດບັນທຶກຮ່ວມ ແລະ ແນະນໍາໃຫ້ອົງການໄອຍະການປະຊາຊົນ ແລະ ອົງການສືບສວນ-ສອບສວນ ເຈົ້າໜ້າທີ່ປ່າໄມ້ຂັ້ນທ້ອງຖິ່ນໃນຂອບເຂດທົ່ວປະເທດຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃຫ້ມີປະສິດທິຜົນສູງ; ໂດຍໄດ້ກໍານົດໜ້າທີ່ຄວາມຮັບຜິດຊອບຕາມພາລະບົດບາດ, ຂອບເຂດສິດ, ມາດຕະການສະກັດກັ້ນ ແລະແກ້ໄຂການລະເມີດກົດໝາຍຕາມຂະບວນຍຸຕິທໍາ.

ໃນວາລະດັ່ງກ່າວ, ອົງການໄອຍະການປະຊາຊົນສູງສຸດກໍ່ໄດ້ມອບປຶ້ມກົດໝາຍວ່າດ້ວຍການດໍາເນີນຄະດີອາຍາ, ປຶ້ມປະມວນກົດໝາຍອາຍາ ແລະປຶ້ມປະມວນກົດໝາຍແພ່ງຈຳນວນໜຶ່ງໃຫ້ກະຊວງກະສິກຳ ແລະປ່າໄມ້.

ບົດບັນທຶກດັ່ງກ່າວ, ເປັນນິຕິກຳທີ່ສຳຄັນ ແລະ ເປັນພື້ນຖານກ່ຽວກັບກົນໄກປະສານງານໃນການດຳເນີນຄະດີອາຍາກ່ຽວກັບປ່າໄມ້ ແລະສັດນໍ້າ-ສັດປ່າ ລະຫວ່າງ ອົງການໄອຍະການປະຊາຊົນ ແລະ ອົງການສືບສວນ-ສອບສວນ ຂອງເຈົ້າໜ້າທີ່ພາສີ ແລະ ປ່າໄມ້ ໃນຂອບເຂດທົ່ວປະເທດ, ເປັນການການຈັດຕັ້ງປະຕິບັດມະຕິຂອງສະພາແຫ່ງຊາດ, ກົດໝາຍວ່າດ້ວຍອົງການໄອຍະການປະຊາຊົນ, ກົດໝາຍວ່າດ້ວຍການດຳເນີນຄະດີອາຍາ ແລະ ກົດໝາຍວ່າດ້ວຍປ່າໄມ້, ສັດນໍ້າ-ສັດປ່າ, ລວມເຖິງກົດໝາຍອື່ນທີ່ກ່ຽວຂ້ອງແນໃສ່ສະກັດກັ້ນປະກົດການຫຍໍ້ທໍ້ໃນການດຳເນີນຄະດີອາຍາ ; ພ້ອມທັງຮັບປະກັນຄວາມສັກສິດຂອງກົດໝາຍ, ປະຕິບັດຕາມຫຼັກການລວມສູນ ແລະເປັນເອກະພາບຕາມລະບົບສາຍຕັ້ງແຕ່ຂັ້ນສູນກາງລົງຮອດຂັ້ນທ້ອງຖິ່ນໃນຂອບເຂດທົ່ວປະເທດ, ເຮັດໃຫ້ການດໍາເນີນຄະດີອາຍາຕາມຂະບວນຍຸຕິທຳມີຄວາມຖືກຕ້ອງ, ໂປ່ງໃສ, ທັນເວລາ ແລະ ຍຸຕິທໍາ.

แชร์