ທ່ານ ສົມນິດ ສີລິບຸນລ້ຽງ ໃຫ້ຮູ້ຕື່ມວ່າ ຄະນະກວດກາໄດ້ເອົາໃຈໃສ່ຕິດຕາມ, ກວດກາ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ແລະມະຕິກອງປະຊຸມໃຫຍ່ຂອງຄະນະພັກແຕ່ລະຂັ້ນ; ຕິດຕາມການຈັດຕັ້ງປະຕິບັດກົດລະບຽບພັກ; ການຕິດຕາມ, ກວດກາການດໍາເນີນຊີວິດການເມືອງພາຍໃນພັກ ຕາມທີ່ກົດລະບຽບຂອງພັກໄດ້ກໍານົດ; ຕິດຕາມ, ຊຸກຍູ້ວຽກງານກວດກາລັດໃນທົ່ວແຂວງ ໃນການຕິດຕາມ ການຈັດຕັ້ງ-ປະຕິບັດກົດໝາຍ, ມະຕິ, ຄຳສັ່ງ, ດຳລັດ, ພາລະບົດບາດ, ໜ້າທີ່, ຂອບເຂດສິດການເຄື່ອນໄຫວຂອງບັນດາພະແນກການ, ອົງການອ້ອມຂ້າງແຂວງ ແລະ ບັນດາເມືອງ; ຕິດຕາມ,ກວດກາຕາມຄຳສັ່ງ: ໄດ້ເຄື່ອນໄຫວ ກວດກາລັດວິສະຫະກິດນໍ້າປະປາແຂວງ ແລະ ອົງການກາແດງແຂວງ, ກວດກາການປ່ອຍເງິນກູ້ ເພື່ອເກັບຊື້ເຂົ້າແຮ, ແຊກແຊງລາຄາເຂົ້າ ແລະ ດັດສົມ ຕະຫຼາດແຕ່ ປີ 2010; ຕິດຕາມ, ກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມເປັນຕົ້ນແມ່ນຕິດຕາມ, ກວດກາໂຄງການລົງທຶນຂອງລັດຕາມແຜນການຂອງອົງການກວດກາລັດຖະບານ, ຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ; ດຳເນີນການກວດກາການຈັດຕັ້ງປະຕິບັດຄຳສັ່ງ 13/ນຍ ໃນທົ່ວແຂວງສາມາດດຳເນີນການເລີກຊື້ ບັນດາຫົວໜ່ວຍ ທີ່ລັກລອບເຄື່ອນໄຫວຜິດກົດໝາຍວ່າດ້ວຍແຮ່ທາດດ້ວຍຮູບການ ຫຼາຍກໍລະນີ; ໄດ້ສຸມໃສ່ຕິດຕາມ, ກວດກາ ແລະຊຸກຍູ້ການຄຸ້ມຄອງການຂຸດຄົ້ນໄມ້, ເຄື່ອນຍ້າຍໄມ້ ແລະທຸລະກິດໄມ້ ຕາມຄໍາສັ່ງ 15/ນຍ, ຍຶດໄມ້ 7 ພັນກວ່າແມັດກ້ອນ, ຍຶດ ແລະ ປັບໄໝພາຫະນະ 15 ຄັນ, ກ່າວເຕືອນເຈົ້າໜ້າທີ່ລັດຈຳນວນໜຶ່ງ; ຕິດຕາມ, ກວດກາ ແລະຊຸກຍູ້ການແກ້ໄຂຜົນການກວດກາໂຄງການລົງທຶນຂອງລັດ ຕາມແຈ້ງການຂອງອົງການກວດກາລັດຖະບານ ຊຶ່ງໄດ້ດຳເນີນການກ່າວເຕືອນພະນັກງານ, ສະມາຊິກພັກ ທີ່ມີສ່ວນກ່ຽວຂ້ອງ ຈຳນວນ 15 ຄົນ ແລະ ນຳສະເໜີຫັກລົບມູນຄ່າໂຄງການທີ່ຄິດໄລ່ບໍ່ຖືກລະບຽບຈຳນວນ 3 ໂຄງການ ມູນຄ່າ 7 ຕື້ກວ່າກີບ.

 

ທັງນີ້, ໄດ້ມີການມອບໃບຍ້ອງຍໍໃຫ້ແກ່ພະນັກງານ-ລັດຖະກອນຂອງຄະນະກວດກາພັກແຂວງທີ່ມີຜົນງານດີເດັ່ນປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດວຽກງານໃນໄລຍະ 1 ປີ ຜ່ານມາ, ໂດຍປະເພດຍ້ອງຍໍ ມີ23 ຄົນ, ຍິງ 7 ຄົນ ແລະປະເພດຊົມເຊີຍ ມີ 1 ຄົນ.