ຮອງຫົວໜ້າ ຄອສພ ເຄື່ອນໄຫວວຽກງານທີ່ໄຊຍະບູລີ
ໃນລະຫວ່າງວັນທີ 4-5 ເມສາ 2022 ສະຫາຍ ນາງ ວິລະວອນ ພັນທະວົງ ຄະນະປະຈໍາພັກ, ຮອງຫົວໜ້າຄະນະໂຄສະນາອົບຮົມສູນກາງພັກພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງໄຊຍະບູລີ, ໂດຍການຕ້ອນຮັບຂອງການນໍາແຂວງ, ເມືອງກໍຄືຄະນະໂຄສະນາອົບຮົມແຂວງ.
ໂດຍທັງຄະນະໄດ້ເຂົ້າພົບ ສະຫາຍ ພົງສະຫວັນ ສິດທະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊຍະບູລີ ເພື່ອຮັບຟັງການລາຍງານສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ການພັດທະນາເສດຖະກິດ-ສັງຄົມ ຂອງແຂວງ ແລະ ສະພາບແນວຄິດໂດຍລວມຂອງພະນັກງານ, ສະມາຊິກພັກ ແລະ ປະຊາຊົນທົ່ວແຂວງ. ຈາກນັ້ນ, ກໍ່ໄດ້ພົບປະກັບຄະນະໂຄສະນາອົບຮົມ ແຂວງໄຊຍະບູລີ, ໂດຍໄດ້ຮັບຟັງການລາຍງານສະພາບການເຄື່ອນໄຫວວຽກງານໂຄສະນາອົບຮົມແຂວງໃນໄລຍະຜ່ານມາ, ໂດຍ ທ່ານ ອາເມຊົງ ເຢ້ຍເລັງ ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ ແລະໄດ້ແລກປ່ຽນຄວາມຄິດຄວາມເຫັນເພື່ອຖອດຖອນບົດຮຽນ ລະຫວ່າງສູນກາງ ກັບ ທ້ອງຖິ່ນເພື່ອພ້ອມກັນສ້າງການຫັນປ່ຽນໃໝ່ໃຫ້ມີຄຸນນະພາບດີຂຶ້ນກວ່າເກົ່າ.
ທັງນີ້, ສະຫາຍ ນາງ ວິລະວອນ ພັນທະວົງ ໄດ້ໂອ້ລົມ ແລະໃຫ້ທິດຊີ້ນໍາບາງບັນຫາ ຕໍ່ຄະນະໂຄສະນາອົບຮົມແຂວງໄຊຍະບູລີ ໂດຍສະເໜີໃຫ້ຄະນະປະຈຳພັກແຂວງ ເພີ່ມທະວີການນໍາພາ-ຊີ້ນໍາ ຢ່າງໃກ້ຊິດຕໍ່ວຽກງານໂຄສະນາອົບຮົມ, ພ້ອມຄົ້ນຄວ້າປະກອບວັດຖຸອຸປະກອນຮັບໃຊ້ວຽກງານຕາມຄວາມເໝາະສົມ. ເອົາໃຈໃສ່ສະຫຼຸບວຽກງານການເມືອງ-ແນວຄິດທົ່ວແຂວງ, ໃນນີ້ ໃຫ້ຕີລາຄາຢ່າງພາວະວິໄສຕໍ່ກັບການເສື່ອມຖອຍ ດ້ານຄຸນທາດການເມືອງຂອງພະນັກງານ, ສະມາຊິກພັກ ເພື່ອເປັນຂໍ້ມູນໃຫ້ແກ່ການກະກຽມເນື້ອໃນກອງປະຊຸມວຽກງານການເມືອງ-ແນວຄິດ ທົ່ວປະເທດ ຄັ້ງທີ V. ໄປພ້ອມກັບຄວາມເອົາໃຈໃສ່ຕິດຕາມເກັບກໍາສະພາບແນວຄິດຫາງສຽງສັງຄົມທີ່ມີຕໍ່ການນໍາພາຂອງພັກ ແລະການຄຸ້ມຄອງຂອງລັດ, ໂດຍສະເພາະໃນໄລຍະລະບາດຂອງພະຍາດ ໂຄວິດ-19 ຮອບທີ 3 ແລະ ຜົນກະທົບຈາກຄວາມຕຶງຄຽດລະຫວ່າງຣັສເຊຍ ກັບ ຢູເຄຣນ, ເພື່ອລາຍງານໃຫ້ຄະນະປະຈໍາພັກ ມີທິດຊີ້ນໍາໃນການແກ້ໄຂ; ນອກນີ້ ກໍຕ້ອງໄດ້ເອົາໃຈໃສ່ຕອບແກ້ ແລະ ອະທິບາຍບັນຫາພົ້ນເດັ່ນຕ່າງໆທີ່ກະທົບຕໍ່ແນວຄິດຂອງພະນັກງານ, ສະມາຊິກພັກ ແລະ ປະຊາຊົນ ຢ່າງທັນການ.
ຫັນເອົາແຜນພັດທະນາວຽກງານໂຄສະນາອົບຮົມຮອດປີ 2025 ມາສ້າງເປັນແຜນວຽກ, ແຜນງົບປະມານໃນແຕ່ລະປີຢ່າງລະອຽດ ແລະເຄື່ອນໄຫວຕາມແຜນຢ່າງມີຈຸດສຸມ ແລະ ສອດຄ່ອງກັບສະພາບຄວາມເປັນຈິງໃນແຕ່ລະໄລຍະ,ທັງເອົາໃຈໃສ່ປັບປຸງເນື້ອໃນ, ຮູບການ ແລະ ວິທີການເຄື່ອນໄຫວວຽກງານໂຄສະນາສຶກສາອົບຮົມໃຫ້ເລິກເຊິ່ງ, ມີຫຼາຍຮູບຫຼາຍສີ, ແທດເໝາະກັບແຕ່ລະເປົ້າໝາຍ ເພື່ອເຮັດໜ້າທີ່ເປັນເສນາທິການໃຫ້ຄະນະພັກຂັ້ນຂອງຕົນໃຫ້ດີ ແລະ ມີຄຸນນະພາບ.ບັນຫາສໍາຄັນແມ່ນໃຫ້ເອົາໃຈໃສ່ຜັນຂະຫຍາຍເນື້ອໃນຄໍາເຫັນຂອງສະຫາຍ ບຸນທອງ ຈິດມະນີ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດຕໍ່ກອງປະຊຸມວຽກງານໂຄສະນາອົບຮົມທົ່ວປະເທດ ປະຈໍາປີ 2021 ໃຫ້ປະກົດຜົນເປັນຈິງເພື່ອເຮັດໃຫ້ວຽກງານໂຄສະນາອົບຮົມມີການຫັນປ່ຽນຢ່າງແຂງແຮງ ແລະ ເລິກເຊິ່ງ.
ດ້ານພາລະບົດບາດຂອງຄະນະໂຄສະນາອົບຮົມແຂວງ ແລະ ເມືອງໃຫ້ສືບຕໍ່ປະຕິບັດຕາມອັນເກົ່າໄປກ່ອນ, ພາຍຫຼັງພາລະບົດບາດຂອງຄະນະໂຄສະນາອົບຮົມສູນກາງພັກ ປັບປຸງສໍາເລັດ, ຈຶ່ງຮ່າງພາລະບົດບາດຂອງຄະນະໂຄສະນາອົບຮົມທ້ອງຖິ່ນຄືນໃໝ່ ເພື່ອໃຫ້ເປັນເອກະພາບກັນໃນທົ່ວປະເທດ.
ເອົາໃຈໃສ່ບໍາລຸງຍົກລະດັບຄວາມຮູ້ທາງດ້ານທິດສະດີມາກ-ເລນິນ, ແນວຄິດ ໄກສອນ ພົມວິຫານ ແລະ ເຊື່ອມຊຶມກໍາແໜ້ນແນວທາງແຜນນະໂຍບາຍຂອງພັກ ໃຫ້ແກ່ຜູ້ທີ່ເຮັດວຽກງານການເມືອງ-ແນວຄິດຢູ່ຂັ້ນແຂວງ ແລະຂັ້ນເມືອງ.
ສຸມໃສ່ຈັດຕັ້ງການໂຄສະນາ,ສ້າງແຜນການ ແລະ ກິດຈະກໍາຕ່າງໆ ໃຫ້ແກ່ການສະເຫຼີມສະຫຼອງປີສາມັກຄີ-ມິດຕະພາບ ລາວ-ຫວຽດນາມ ໃຫ້ເປັນຂະບວນການຟົດຟື້ນ ແລະ ມີຄວາມໝາຍເລິກເຊິ່ງ.
ໃນໂອກາດດັ່ງກ່າວ ສະຫາຍຮອງຫົວໜ້າ ຄອສພ ຍັງໄດ້ມອບປຶ້ມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ປຶ້ມຖາມ-ຕອບ ປີສາມັກຄີ-ມິດຕະພາບ ລາວ-ຫວຽດນາມ, ເຈວລລ້າງມື, ຄອມພິວເຕີຣ໌ 1 ຊຸດ ແລະ ເຄື່ອງກີລາຈໍານວນໜຶ່ງ ໃຫ້ຄະນະໂຄສະນາອົບຮົມແຂວງ ແລະ ໄດ້ໄປຢ້ຽມຢາມຄອບຄົວຕົວແບບ,ພ້ອມເຄື່ອນໄຫວຊຸກຍູ້ວຽກງານໂຄສະນາອົບຮົມຢູ່ເມືອງເງິນ ແລະ ເມືອງຫົງສາຕື່ມອີກ.
ພາຍຫຼັງສຳເລັດການເຄື່ອນໄຫວວຽກງານຢູ່ແຂວງໄຊຍະບູລີ ສະຫາຍຮອງຫົວໜ້າ ຄອສພ ພ້ອມດ້ວຍຄະນະກໍ່ໄດ້ເດີນທາງໄປເຄື່ອນໄຫວວຽກງານທີ່ແຂວງຫຼວງພຣະບາງ ແລະ ແຂວງວຽງຈັນ ເຖິງວັນທີ 9 ເມສາ 2022 .
