ທຸກລົມຫາຍໃຈຂອງຊາວໂລກ ລ້ວນສູບເອົາອາກາດເສຍ

ຜູ້ຄົນເທິງໂລກກວ່າ 99% ກຳລັງສູບຫາຍໃຈເອົາອາກາດທີ່ມີມົນລະພິດເຂົ້າສູ່ຮ່າງກາຍໃນປະລິມານຫຼາຍເກີນໄປ, ຊຶ່ງເປັນສາເຫດການຕາຍຂອງປະຊາກອນໂລກປີລະຫຼາຍລ້ານຄົນ.

ສຳນັກຂ່າວຕ່າງປະເທດ, ໄດ້ລາຍງານໂດຍອ້າງຄຳຖະແຫຼງຂອງອົງການອະນາໄມໂລກ(WHO) ໃນວັນທີ 4 ເມສາ 2022, ທີ່ລະບຸເຕືອນໃຫ້ເຫັນເຖິງອັນຕະລາຍຂອງມົນລະພິດທາງອາກາດ. ໂດຍ WHO ໄດ້ຊີ້ໃຫ້ເຫັນທາງເລືອກທີ່ຈະເປັນຕົວຊ່ວຍໃຫ້ເກີດການປ່ຽນແປງໃນທາງທີ່ດີດ້ວຍການຫັນມາໃຊ້ພະລັງງານທາງເລືອກ.

ຂໍ້ມູນໃໝ່ຈາກໜ່ວຍງານດ້ານສຸຂະພາບ ຂອງສະຫະປະຊາຊາດ, ສະແດງໃຫ້ເຫັນວ່າ: ທຸກມູມໂລກກຳລັງຜະເຊີນກັບມົນລະພິດທາງອາກາດ ແລະ ສະຖານະການຍິ່ງຮຸນແຮງໜັກໃນບັນດາປະເທດທຸກຍາກ.

ທັງນີ້, ທ່ານ ນາງ ມາເຣຍ ເນຍ໌ຣາ ຜູ້ອຳນວຍການດ້ານສິ່ງແວດລ້ອມ, ການປ່ຽນແປງສະພາບພູມີອາກາດ ແລະສຸຂະພາບ ຂອງອົງການອະນາໄມໂລກ, ໄດ້ກ່າວຕໍ່ສື່ວ່າ “ເກືອບ 100% ຂອງປະຊາກອນໂລກ, ແມ່ນຫາຍໃຈເອົາອາກາດທີ່ເຕັມໄປດ້ວຍສານອັນຕະລາຍເກີນມາດຕະຖານຂອງອົງການອະນາໄມໂລກ ແລະ ນັ້ນກໍ່ເປັນບັນຫາດ້ານສາທາລະນະສຸກທີ່ໜ້າກັງວົນຫຼາຍ”.

ຢ່າງໃດກໍຕາມ, ເຖິງຈະມີລາຍງານຂອງອົງການສະຫະປະຊາຊາດໃນປີຜ່ານມາວ່າ: ການລ໊ອກດາວນ໌ຈາກການລະບາດໃຫຍ່ຂອງໄວຣັສໂຄວິດ-19 ແລະ ມີມາດຕະການຈຳກັດການເດີນທາງ, ຊຶ່ງເຮັດໃຫ້ເກີດການປັບປຸງຄຸນນະພາບອາກາດດີຂຶ້ນໃນຊ່ວງເວລານັ້ນໆ; ແຕ່ຫາກວ່າມົນລະພິດທາງອາກາດກໍ່ຍັງຄົງເປັນບັນຫາຍາກທີ່ຈະສາມາດແກ້ໄຂໄດ້.

ໂດຍ ມາເຣຍ ເນຍ໌ຣາ ໄດ້ກ່າວຢໍ້າວ່າ “ເປັນເລື່ອງໜ້າເສຍດາຍຢ່າງຍິ່ງທີ່ຜູ້ຄົນພາກັນພະຍາຍາມຫາທາງເອົາຊີວິດລອດຈາກໂຣກລະບາດຄັ້ງໃຫຍ່; ແຕ່ກໍຕ້ອງມາເສຍຊີວິດລົງກວ່າ 7 ລ້ານຄົນຈາກມົນລະພິດທາງອາກາດ, ທັງທີ່ສາມາດປ້ອງກັນໄດ້ ແລະຍັງບໍ່ລວມເຖິງຄົນທີ່ແຂງແຮງ”.

ຂໍ້ມູນຈາກດາວທຽມ ແລະແບບຈຳລອງທາງຄະນິດສາດຂອງອົງການອະນາໄມໂລກ, ຊີ້ໃຫ່ເຫັນວ່າ: ຄຸນນະພາບອາກາດຕໍ່າທີ່ສຸດພົບໃນພູມີພາກ ເມດິເຕີຣ໌ເຣນຽນຕາເວັນອອກ, ເອເຊຍຕາເວັນອອກສຽງໃຕ້ ຫຼືອາຊຽນ ແລະແອຟຣິກາ.

ສະພາບອາກາດເປັນພິດຕາມມາດຕະຖານຂອງອົງການອະນາໄມໂລກ, ຄືອາກາດທີ່ມີຄວາມເຂັ້ມຂຸ້ນຂອງອະນຸພາກອັນຕະລາຍຊຶ່ງມີເສັ້ນຜ່າສູນກາງນ້ອຍກວ່າ 2.5 ໄມຄຣອນ (PM 2.5) ລວມໄປເຖິງສານພິດເຊັ່ນ: ຊັລເຟຕ ແລະ ຄວັນດຳຈາກການເຜົາໄໝ້, ຊຶ່ງກໍ່ໃຫ້ເກີດຄວາມສ່ຽງຫຼາຍທີ່ສຸດ. ເນື່ອງຈາກມັນສາມາດເຈາະເລິກເຂົ້າໄປໃນປອດ ແລະລະບົບຫົວໃຈ-ຫຼອດເລືອດ, ອີກທັງ ໄນໂຕຣເຈນໄດອ໊ອກໄຊດ໌ ຊຶ່ງຈະສົ່ງຜົນຕໍ່ທາງເດີນຫາຍໃຈ ແລະເປັນສາເຫດຂອງພະຍາດຫອບຫືດ.

แชร์