ການນຳກະຊວງ ປກສ ອວຍພອນ ສະຫາຍເລຂາທິການໃຫຍ່ ປະທານປະເທດ ເນື່ອງໃນວັນສ້າງຕັ້ງກໍາລັງ ຄົບຮອບ 61 ປີ

ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ຄົບຮອບ 61 ປີ (5 ເມສາ 1961-5 ເມສາ 2022), ການນຳຂັ້ນສູງກະຊວງປ້ອງກັນຄວາມສະຫງົບ ນໍາໂດຍ ສະຫາຍ ພົອ ວິໄລ ຫຼ້າຄຳຟອງ ກຳມະການກົມການເມືອງສູນກາງພັກ, ລັດຖະມົນຕີກະຊວງ ປກສ ພ້ອມດ້ວຍຄະນະ, ໄດ້ເຂົ້າອວຍພອນ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ.

ທັງນີ້, ລັດຖະມົນຕີກະຊວງ ປກສ ກໍໄດ້ລາຍງານກ່ຽວກັບການເຄື່ອນໄຫວຊີ້ນຳ-ນໍາພາກຳລັງປ້ອງກັນຄວາມສະຫງົບ, ໂດຍໄດ້ຮັບການນຳພາ-ຊີ້ນຳເດັດຂາດ, ໂດຍກົງ ແລະ ຮອບດ້ານຈາກພັກ-ລັດຖະບານ, ໄດ້ຮັບການອຸ້ມຊູຊ່ວຍເຫຼືອກໍ່ສ້າງຈາກການຈັດຕັ້ງຂັ້ນເທິງ ໃນການກໍ່ສ້າງກໍາລັງປ້ອງກັນຄວາມສະຫງົບ ໄລຍະທີ່ຜ່ານມາ, ເຮັດໃຫ້ກໍາລັງປ້ອງກັນຄວາມສະຫງົບປະຊາຊົນ ມີຄວາມເຕີບໃຫຍ່ເຂັ້ມແຂງ, ສາມາດຮັບປະກັນໄດ້ສະຖຽນລະພາບທາງດ້ານການເມືອງ, ປະເທດຊາດມີຄວາມໝັ້ນຄົງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ປະຊາຊົນມີຄວາມເຊື່ອໝັ້ນ ແລະ ໃຫ້ການຮ່ວມມື ອູ້ມຊູຊ່ວຍເຫຼືອກຳລັງປ້ອງກັນຄວາມສະຫງົບ ດ້ວຍດີຕະຫຼອດມາ. ພ້ອມນັ້ນ, ສະຫາຍ ພົອ ວິໄລ ຫຼ້າຄໍາຟອງ ຍັງໄດ້ລາຍງານຂະບວນການສະເຫຼີມສະຫຼອງວັນສ້າງຕັ້ງກໍາ ລັງປ້ອງກັນຄວາມສະຫງົບຄົບຮອບ 61 ປີ ຊຶ່ງມີຫຼາຍກິດຈະກຳທີ່ສຳຄັນ ເປັນຕົ້ນແມ່ນ ຈັດຕັ້ງເຜີຍແຜ່ເອກະສານ, ປາຖະກະຖາເລົ່າຄືນມູນເຊື້ອກຳລັງ ປກສ ໃຫ້ແກ່ນາຍ ແລະ ພົນຕຳຫຼວດໃນຂອບເຂດທົ່ວປະເທດ, ຂະບວນການແຂ່ງຂັນກີລາມິດຕະພາບ, ພົບປະຢ້ຽມຢາມຄອບຄົວອະດີດການນຳກະຊວງ ປກສ, ລວມທັງນາຍ ແລະ ພົນຕຳຫຼວດທີ່ເຈັບປ່ວຍນອນປິ່ນປົ່ວຢູ່ໂຮງໝໍ ແລະ ກິດຈະກຳອື່ນໆໂດຍຜ່ານສື່ມວນຊົນ. ນອກນັ້ນ, ຍັງໄດ້ລາຍງານການເຄື່ອນໄຫວຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຊຶ່ງມີຜົນສຳເລັດຫຼາຍດ້ານ, ສະແດງອອກນັບແຕ່ມື້ຈັດຕັ້ງປະຕິບັດມາເຖິງປັດຈຸບັນ ສາມາດແກ້ໄຂຄະດີໄດ້ເປັນຈໍານວນຫຼາຍ ເຮັດໃຫ້ຄະດີຢາເສບຕິດມີທ່າອ່ຽງຫຼຸດລົງ.

ໂດຍສະຫາຍເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ, ກໍໄດ້ສະແດງຄວາມຊົມເຊີຍຕໍ່ການນໍາຂັ້ນສູງກະຊວງ ປກສ ກໍຄື ນາຍ ແລະ ພົນຕຳຫຼວດ ໃນທົ່ວກຳລັງປ້ອງກັນຄວາມສະຫງົບ, ທີ່ເວລາໃດກໍ່ເຮັດຫຼ້ອນໜ້າທີ່ ທີ່ໄດ້ຮັບມອບໝາຍ ສົມເປັນກຳລັງປະກອບອາວຸດປະຕິວັດອັນແຫຼມຄົມຂອງພັກ. ໃນວາລະສຳຄັນນີ້, ສະຫາຍ ທອງລຸນ ສີສຸລິດ ກໍໄດ້ໂອ້ລົມໃຫ້ທິດຊີ້ນໍາຕໍ່ຄະນະພັກ-ຄະນະນໍາຂັ້ນສູງກະຊວງ ປກສ ເພື່ອນຳໄປຈັດຕັ້ງປະຕິບັດເຮັດໃຫ້ກຳລັງປ້ອງກັນຄວາມສະຫງົບເປັນກຳລັງປະກອບອາວຸດທີ່ເຂັ້ມແຂງຂອງພັກ, ເປັນກໍາລັງທີ່ມີຄວາມທັນສະໄໝຮອບດ້ານເທື່ອລະກ້າວໂດຍການປັບປຸງແບບແຜນວິທີຄົ້ນຄິດ, ວິທີເຮັດວຽກຂອງຖັນແຖວພະນັກງານໃນຂົງເຂດ ປກສ ໃຫ້ໄປທ່ວງທັນກັບສະພາບການເລັ່ງທວງໃນປັດຈຸບັນ, ວິໄຈບັນຫາໃຫ້ຖືກຕ້ອງ ແລະ ວາງແຜນຢ່າງຮັດກຸມ, ຈັດລຽງບຸລິມະສິດຂອງສະພາບທີ່ເກີດຂຶ້ນ ແລະມີຢູ່ໃນປັດຈຸບັນຂອງປະເທດເຮົາເພື່ອວາງແຜນຈັດຕັ້ງປະຕິບັດ ແລະສຳເລັດຜົນເປັນຮູບປະທຳ, ສືບຕໍ່ກໍ່ສ້າງຮາກຖານຢູ່ທ້ອງຖິ່ນໃຫ້ມີຕາໜ່າງປ້ອງກັນຄວາມສະຫງົບທີ່ໜັກແໜ້ນເຂັ້ມແຂງ ແລະດຶງເອົາປະຊາຊົນເຂົ້າຮ່ວມດ້ວຍຄວາມຕື່ນຕົວ ແລະຈິງໃຈ, ປົກປ້ອງຊັບສິນ, ຜົນປະໂຫຍດລວມຂອງລັດ ແລະຂອງປະຊາຊົນດ້ວຍຄວາມຮັບຜິດຊອບສູງ ແລະເປັນທໍາແທ້. ເອົາໃຈໃສ່ຈັດຕັ້ງປະຕິບັດສອງວາລະແຫ່ງຊາດ, ໂດຍສະເພາະແມ່ນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ມີຜົນສໍາເລັດຕາມກໍານົດເວລາທີ່ໄດ້ກຳນົດໄວ້ ແລະພ້ອມກັນເອົາໃຈໃສ່ສ້າງພະລາກັບທີ່ເພື່ອແກ້ໄຂຊີວິດການເປັນຢູ່ຂອງນາຍ ແລະພົນຕໍາຫຼວດຕາມທິດເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ.

ຂອບໃຈຂໍ້ມູນຈາກເພຈ: ຄວາມສະຫງົບ

แชร์