ເປິດກອງປະຊຸມໃຫຍ່ຜູ້ແທນສະມາຊິກພັກ ອົງຄະນະພັກ ກະຊວງເຕັກໂນໂລຊີ ແລະການສື່ສານ ຄັ້ງທີ II

ກະຊວງເຕັກໂນໂລຊີ ແລະການສື່ສານ (ກຕສ) ໄດ້ໄຂກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ II, ຂຶ້ນໃນວັນທີ 4 ເມສາ 2022 ທີ່ຫໍປະຊຸມແຫ່ງຊາດ (ນະຄອນຫຼວງວຽງຈັນ) ພາຍໃຕ້ຄໍາຂວັນ “ຍົກສູງຄວາມຮັບຜິດຊອບຕໍ່ວຽກງານເຕັກໂນໂລຊີ ແລະ ການສື່ສານໃຫ້ກາຍເປັນກໍາລັງແຮງຂັບເຄື່ອນໃນການຫັນເປັນ ດິຈີຕອລ ຕາມທິດຫັນເປັນອຸດສາຫະກໍາ ແລະທັນສະໄໝ”.

ໂດຍການເປັນປະທານຂອງ ສະຫາຍ ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງເຕັກໂນໂລຊີ ແລະການສື່ສານ, ໃຫ້ກຽດເຂົາຮ່ວມໂດຍ ສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປລາວ, ມີຜູ້ຕາງໜ້າຈາກຄະນະກວດກາສູນກາງພັກ, ຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ພະນັກງານອາວຸໂສ-ອະດີດການນໍາຂອງກະຊວງເຕັກໂນໂລຊີ ແລະການສື່ສານ, ແຂກຖືກເຊີນ, ພ້ອມດ້ວຍສະມາຊິກພັກສົມບູນ-ສໍາຮອງເຂົ້າຮ່ວມຢ່າງພ້ອມພຽງ.

ສະຫາຍ ບໍ່ວຽງຄໍາ ວົງດາລາ ໄດ້ລາຍງານຜົນການເຄື່ອນໄຫວຈັດຕັ້ງປະຕິບັດໜ້າທີ່ການເມືອງ ແລະ ການກໍ່ສ້າງປັບປຸງພາຍໃນຂອງທົ່ວອົງຄະນະພັກ, ໂດຍຄົ້ນຄ້ວາກຳແໜ້ນບັນດາສາເຫດຂອງຜົນສຳເລັດ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ພ້ອມກັບຖອດຖອນບົດຮຽນບົນພື້ນຖານການວິເຄາະໄຈ້ແຍກຈຸດພິເສດສະພາບການດ້ານຕ່າງໆ ເພື່ອເປັນພື້ນຖານພິຈາລະນາຕົກລົງທິດທາງວຽກງານຊຸມປີຕໍ່ໜ້າຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ໂດຍສະເພາະໃນຂົງເຂດວຽກງານເຕັກໂນໂລຊີ ແລະການສື່ສານ.

ທັງນີ້, ບັນດາຜູ້ແທນກອງປະຊຸມໃຫຍ່, ຍັງໄດ້ພ້ອມກັນຄົ້ນຄວ້າປະກອບຄຳຄິດ-ຄຳເຫັນ ຕໍ່ຮ່າງບົດລາຍງານການເມືອງຊຶ່ງໄດ້ຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງອົງຄະນະພັກກະຊວງເຕັກໂນໂລຊີ ແລະການສື່ສານ (ແຕ່ປີ 2016-2021) ແລະ ທິດທາງຄາດໝາຍ ແລະວຽກງານຈຸດສຸມໃນ 05 ປີຕໍ່ໜ້າ, ແຜນພັດທະນາຂອງຂະແໜງການເຕັກໂນໂລຊີ ແລະການສື່ສານ ແລະຮ່າງບົດສໍາຫລວດການນຳພາລວມຂອງຄະນະພັກສະໄໝທີ I. 

 ຢ່າງໃດກໍດີ,ໃນໄລຍະທີ່ຜ່ານມາ, ຄະນະພັກກະຊວງໄດ້ນໍາພາການດໍາເນີນຊີວິດການເມືອງບັ້ນປັບປຸງປົວແປງທົ່ວອົງຄະນະພັກ; ຄະນະພັກໄດ້ເອົາໃຈໃສ່ປັບປຸງກົງຈັກການຈັດຕັ້ງ ແລະສັບຊ້ອນພະນັກງານພາຍໃນກະຊວງໃຫ້ສອດຄ່ອງກັບໜ້າທີ່ການເມືອງໃນໄລຍະໃໝ່,ໄດ້ປັບປຸງພາລະບົດບາດຂອງກະຊວງ,ຂອງບັນດາກົມ ແລະທຽບເທົ່າ, ບັນດາບໍລິສັດວິສາຫະກິດທີ່ຂຶ້ນກັບ, ສໍາເລັດການປັບປຸງກົງຈັກການຈັດຕັ້ງຕາມທິດກະທັດຮັດ ແລະສົມເຫດສົມຜົນ ແຕ່ມີປະສິດທິພາບສູງ; ປັບປຸງນະໂຍບາຍແຫ່ງຊາດດ້ານໄອຊີທີ;ສໍາເລັດການສ້າງວິໄສທັດຮອດປີ 2040,ຍຸດທະສາດຮອດປີ 2030, ແຜນພັດທະນາເສດຖະກິດດີຈີຕອລແຫ່ງຊາດ 5 ປີ(2021-2025), ແຜນແມ່ບົດສົ່ງເສີມທຸລະກິດສະຕາຣທ໌ອັພ( Start-Up); ປັບປຸງ, ສ້າງກົດໝາຍ ແລະ ນິຕິກໍາລຸ່ມກົດໝາຍ ທັງໝົດ60 ສະບັບ; ການພັດທະນາ ແລະ ນໍາໃຊ້ໂຄງລ່າງພື້ນຖານເຕັກນິກ ທີ່ມີລັກສະນະຍຸດທະສາດຂອງຊາດ ໄດ້ຮັບການຂະຫຍາຍ ແລະ ຍົກລະດັບພື້ນຖານເຕັກນິກລວມສູນລະບົບສື່ສານຜ່ານປະຕູດຽວ ຢູ່ສູນອິນເຕີຣ໌ເນັດຫ່ງຊາດ; ສ້າງສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີຣ໌ ເພື່ອສະກັດກັ້ນ ແລະ ປ້ອງກັນໄພຄຸກຄາມ ທາງໄຊເບີຣ໌ (Cyber) ແລະ ອິນເຕີຣ໌ເນັດ; ສໍາເລັດການສ້າງແລະ ທົດລອງນໍາໃຊ້ລະບົບອອກຮັບຮອງເອເລັກໂຕຣນິກແຫ່ງຊາດເພື່ອຢັ້ງຢືນ ແລະກວດສອບຄວາມຖືກຕ້ອງຂອງຂໍ້ມູນ ແລະ ເອກະສານເອເລັກໂຕຣນິກເພື່ອຮັບປະກັນການນໍາໃຊ້,ການບໍລິການອອນໄລນ໌ ທີ່ມີມາດຕະຖານເຕັກນິກແກ່ທຸກຂະແໜງການ,ໂດຍສະເພາະຂະແໜງການເງິນ,ການທະນາຄານ, ອຸດສາຫະກໍາ ແລະການຄ້າ; ໄດ້ສໍາເລັດການສ້າງ ແລະ ໃຫ້ບໍລິການສູນຂໍ້ມູນດີຈີຕອລແກ່ພາກລັດ ແລະ ເອກະຊົນ ທີ່ປອດໄພສູງ; ສໍາເລັດການສ້າງລະບົບຫ້ອງການທັນສະໄໝ, ລະບົບອີເມລ ແລະ ກອງປະຊຸມທາງໄກສໍາລັບພາກລັດ; ສ້າງສູນຮຽນຮູ້ ການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ ຈຸດທົດລອງ 3 ສ້າງ ແຂວງໄຊສົມບູນ ເປັນສູນຂໍ້ມູນຕົວແບບ; ສໍາເລັດການສ້າງສະຖານີກວດກາຄື້ນຄວາມຖີ່ວິທະຍຸ ສື່ສານ ແບບບໍ່ມີຄົນປະຈໍາຢູ່ 3 ຈຸດ, ໄດ້ອະນຸຍາດໃຫ້ບັນດາບໍລິສັດໂທລະຄົມທົດລອງນໍາໃຊ້ລະບົບ 5G ເພື່ອກຽມຄວາມພ້ອມແກ່ການຫັນປ່ຽນເສດຖະກິດດີຈີຕອລ ແລະອຸດສາຫະກໍາ 4.0 ຕາມທິດກ້າວໃຫ້ທັນສະໄໝ ແລະສໍາເລັດວຽກງານອື່ນໆ.  ໃນໄລຍະ 5 ປີຂະແໜງການເຕັກໂນໂລຊີ ສ້າງລາຍຮັບທັງແບບທາງກົງແລະທາງອ້ອມ 2016-2020 ປະຕິບັດໄດ້ 18.152 ຕື້ກວ່າກີບ ທຽບໃສ່ 5 ປີຜ່ານມາ ເພີ່ມຂຶ້ນ 50%, ໃນນີ້ມອບພັນທະເຂົ້າງົບປະມານລັດໄດ້ 4.209 ຕື້ກວ່າກີບ ທຽບໃສ່ 5 ປີຜ່ານມາ ເພີ່ມຂຶ້ນ 16%, ໃນນັ້ນລາຍຮັບທາງກົງ 526,75 ຕຶ້ກວ່າກີບ. ພິເສດໄດ້ສ້າງລາຍຮັບການເຮັດທົດລອງທຸລະກໍາຊັບສິນດີຈີຕອລ ຈໍານວນ2.500.000 ໂດລາສະຫະລັດ. 

ສຳລັບທິດທາງ ແລະຄາດໝາຍລວມ ຮອດປີ 2025 ແມ່ນຕ້ອງຮັບປະກັນຄວາມສາມັກຄີ,ຄວາມສະຫງົບພາຍໃນ; ຄະນະພັກທຸກຂັ້ນ,ສະມາຊິກພັກ ແລະພະນັກງານທຸກຄົນ ມີຄວາມເຊື່ອໝັ້ນຕໍ່ແນວທາງນະໂຍບາຍປ່ຽນແປງໃໝ່ຢ່າງມີຫຼັກການຂອງພັກ, ມີຄວາມເຊື່ອໝັ້ນຕໍ່ອຸດົມການສັງຄົມນິຍົມ.  ການກໍ່ສ້າງພັກຕ້ອງໄປຕາມທິດປອດໃສ, ເຂັ້ມແຂງ ແລະ ໜັກແໜ້ນ ທາງດ້ານການເມືອງ, ແນວຄິດ ແລະການຈັດຕັ້ງ; ການພັດທະນາວຽກງານເຕັກໂນໂລຊີ ແລະ ການສື່ສານຕ້ອງຊຸກຍູ້ໃຫ້ທຸກຂະແໜງການ ແລະທຸກພາກສ່ວນຂອງສັງຄົມນໍາໃຊ້ເຕັກໂນໂລຊີກ້າວໜ້າຢ່າງກວ້າງຂວາງ, ມີຄວາມປອດໄພສູງເຂົ້າໃນການພັດທະນາເສດຖະກິດ-ສັງຄົມ ແຕ່ສູນກາງຮອດທ້ອງຖິ່ນ ແລະສາມາດເຊື່ອມໂຍງກັບສາກົນ, ພັດທະນາບຸກຄະລາກອນທາງດ້ານດີຈີຕອລ ໃຫ້ໄດ້ຄຸນນະພາບສູງເຮັດໃຫ້ການຫັນເປັນທັນສະໄໝດ້ວຍລະບົບດີຈີຕອລກາຍເປັນເຄື່ອງມືທີ່ສໍາຄັນ ແລະພື້ນຖານໃນການຂັບເຄື່ອນການພັດທະນາປະເທດຊາດກ້າວເຂົາສູ່ອຸດສາຫະກໍາ 4.0 

แชร์