4 ເມສາ ວັນສາກົນໂຄສະນາ ເພື່ອຕ້ານລະເບີດບໍ່ທັນແຕກ

ວັນທີ 4 ເມສາ ເປັນວັນສາກົນໂຄສະນາເພື່ອຕ້ານລະເບີດບໍ່ທັນແຕກ ແລະການຊ່ວຍເຫຼືອເພື່ອແກ້ໄຂບັນຫາລະເບີດບໍ່ທັນແຕກ, ວັນດັ່ງກ່າວຖືກປະກາດໂດຍອົງການສະຫະປະຊາຊາດ ໃນປີ 2005 ຊຶ່ງນັບມາຮອດປີນີ້ກໍຖືວ່າຄົບຮອບ 17 ປີ. ວັນສາກົນໂຄສະນາເພື່ອຕ້ານລະເບີດບໍ່ທັນແຕກມີເປົ້າໝາຍປູກຈິດສຳນຶກກ່ຽວກັບອັນຕະລາຍຂອງລະເບີດບໍ່ທັນແຕກ ແລະລະດົມທຶນເຂົ້າໃນການແກ້ໄຂບັນຫາດັ່ງກ່າວໃນທົ່ວໂລກໂດຍສະເພາະປະເທດທີ່ໄດ້ຮັບຜົນກະທົບຈາກລະເບີດບໍ່ທັນແຕກ.

ສປປ ລາວ ເປັນປະເທດທີ່ໄດ້ຮັບຜົນກະທົບຈາກລະເບີດບໍ່ທັນແຕກ (ລບຕ) ໜັກໜ່ວງກວ່າໝູ່ໃນໂລກ, ທຽບໃສ່ຫົວຄົນ. ຕະຫຼອດ 9 ປີ (1964 - 1973) ຂອງການຖີ້ມລະເບີດ, ທຸກໆ 8 ນາທີ ມີຍົນຫຼາຍກວ່າ 580,000 ຖ້ຽວບັນທຸກລະເບີດມາຖີ້ມໃສ່ຜືນແຜ່ນດີນລາວ ເຊິ່ງມີປະມານ 3 ລ້ານໂຕນ. ໃນນັ້ນ ມີລະເບີດລູກຫວ່ານປະມານ 270 ລ້ານໜ່ວຍ ຄາດວ່າ 30 ສ່ວນຮ້ອຍຂອງລະເບີດດັ່ງກ່າວແມ່ນບໍ່ທັນແຕກ, ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ເຮັດໃຫ້ປະຊາຊົນລາວບັນດາເຜົ່າທີ່ດຳລົງຊີວິດ ແລະທຳມາຫາກິນ ໄດ້ຮັບອັນຕະລາຍເຖິງຂັ້ນເສຍຊີວິດ ແລະຖືກບາດເຈັບເປັນຈຳນວນຫຼວງຫຼາຍ. ແຕ່ປີ 2009 ເຖິງປະຈຸບັນມີຜູ້ໄດ້ຮັບບາດເຈັບ ແລະເສຍຊີວິດ ຈາກ ລບຕ ປະມານ 50 ຄົນຕໍ່ປີ.

 ການຈັດຕັ້ງປະຕິບັດວຽກງານແກ້ໄຂບັນຫາ ລບຕ ໄດ້ຈັດຕັ້ງປະຕິບັດໃນຊຸມປີ 1990 ຈົນເຖິງປະຈຸບັນໄດ້ດຳເນີນວຽກງານໂຄສະນາສຶກສາຄວາມສ່ຽງໄພຈາກ ລບຕ, ວຽກງານຊ່ວຍເຫຼືອຜູ້ຖືກເຄາະຮ້າຍຈາກ ລບຕ ແລະວຽກການການສຳຫຼວດ-ກວດກູ້ ລບຕ. ສຳລັບປີ 2021, ໄດ້ປະຕິບັດວຽກງານໂຄສະນາສຶກສາຄວາມສ່ຽງໄພຈາກ ລບຕ ຢູ່ 683 ເທື່ອບ້ານ, ຊ່ວຍເຫຼືອຜູ້ຖືກເຄາະຮ້າຍຈາກ ລບຕ ໄດ້ທັງໝົດ 45 ຄົນ, ສຳຫຼວດບໍ່ແມ່ນວິຊາການເພື່ອຊອກຫາຈຸດຫຼັກຖານ ລບຕ ໄດ້ 274 ບ້ານ, ສຳຫຼວດວິຊການ ກຳນົດພື້ນທີຢືນຢັງວ່າມີ ລບຕ ໄດ້ 221.86 ເຮັກຕາ, ກວດກູ້ ລບຕ ອອກຈາກພື້ນທີ່ໄດ້ທັງໝົດ 45.56 ເຮັກຕາ ແລະທຳລາຍ ລບຕ ໄດ້ທັງໝົດ 81,646 ໜ່ວຍ. ທັງໝົດນີ້ແມ່ນການປະກອບສ່ວນອັນສຳຄັນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ກໍ່ຄືເປົ້າໝາຍການພັດທະນາແບບຍືນຍົງ ໂດຍສະເພາະເປົ້າໝາຍການພັດທະນາແບບຍືນຍົງທີ 18.   

ຢ່າງໃດກໍ່ຕາມ, ພາລະການແກ້ໄຂບັນຫາ ລບຕ ໃນ ສປປ ລາວ ຍັງຖືກເປັນສິ່ງທີ່ໜັກໜ່ວງ ແລະ ສປປ ລາວ ກໍໄດ້ປະເຊີນໜ້າກັບສິ່ງທ້າທາຍຫຼາຍດ້ານທີ່ເກິດຈາກຜົນກະທົບຈາກເສດລະເບີດໃນປາງສົງຄາມ. ສປປ ລາວ ໂດຍແມ່ນຄະນະກຳມະການຄຸ້ມຄອງແຫ່ງຊາດເພື່ອແກ້ໄຂບັນຫາ ລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໄດ້ປະສານສົມທົບກັບບັນດາຂະແໜງການກ່ຽວຂ້ອງຂັ້ນສູນກາງ ແລະທ້ອງຖິ່ນໂດຍໄດ້ຮັບການສະໜັບສະໜູນຈາກອົງການຈັດຕັ້ງສາກົນສ້າງແຜນຍຸດທະສາດແຫ່ງຊາດ ວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ “ເສັ້ນທາງກ້າວສູ່ຄວາມປອດໄພ” ແລະມາຮອດປະຈຸບັນຍຸດທະສາດສະບັບທີ 3 ໄລຍະປີ 2021-2030 ແມ່ນໄດ້ຖືກຮັບຮອງໂດຍພື້ນຖານຈາກລັດຖະບານແລ້ວເຊີ່ງຍຸດທະສາດສະບັບດັ່ງກ່າວ ແມ່ນສອດຄ່ອງກັບແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ແຕ່ປີ 2021-2025 ແລະ ເປົ້າໝາຍການພັດທະນາແບບຍືນຍົງປີ 2030 ໂດຍສະເພາະແມ່ນເປົ້າໝາຍທີ 18 ເຊິ່ງເປັນເປົ້າໝາຍທີ່ຕິດພັນກັບບັນດາ 17 ເປົ້າໝາຍ.

 ພ້ອມດຽວກັນນີ້, ກໍໄດ້ສ້າງຮ່າງດໍາລັດວ່າດ້ວຍການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງເຊີ່ງມາຮອດປະຈຸບັນຮ່າງດໍາລັດສະບັບດັ່ງກ່າວກໍໄດ້ສໍາເລັດໂດຍພື້ນຖານແລ້ວ ແລະຈະໄດ້ນໍາສະເໜີລັດຖະບານເພື່ອພິຈາລະນາຮັບຮອງໃນເວລາອັນໃກ້ນີ້. ລັດຖະບານແຫ່ງ ສປປ ລາວ ແລະອົງການສະຫະປະຊາຊາດຈະສືບຕໍ່ການຮ່ວມມືໃນຂະແໜງການແກ້ໄຂບັນຫາ ລບຕ ໂຄງການໃໝ່ໃນໄລຍະປີ 2022-2026 ເພື່ອເປັນການສະໜັບສະໜູນການຈັດຕັ້ງປະຕິບັດວຽກງານການແກ້ໄຂບັນຫາ ລບຕ ໃຫ້ສຳເລັດຕາມຈຸດປະສົງຄາດໝາຍ.

ຂອບໃຈຂໍ້ມູນຈາກ: ຂ່າວສານ ຮສສ

แชร์