ປະທານສານປະຊາຊົນສູງສຸດ ເຄື່ອນໄຫວເຮັດວຽກຢູ່ໄຊຍະບູລີ

ເມື່ອລະຫວ່າງວັນທີ 31 ມີນາ-2 ເມສາ 2022, ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ພ້ອມດ້ວຍຄະນະໄດ້ເຄື່ອນໄຫວເຮັດວຽກ ແລະ ພົບປະໂອ້ລົມສະມາຊິກພັກ-ພະນັກງານສານປະຊາຊົນແຂວງໄຊຍະບູລີ, ສານປະຊາຊົນເຂດ 1, ເຂດ 2 ແລະເຂດ 3 ຂອງແຂວງ. ໂດຍທ່ານໄດ້ເນັ້ນໜັກໃຫ້ຄະນະປະທານສານແຕ່ລະຂັ້ນເອົາໃຈໃສ່ໃນວຽກງານວຽກງານສຶກສາອົບຮົມການເມືອງ-ນໍາພາແນວຄິດເປັນສຳຄັນ.

 ໂດຍປະທານສານປະຊາຊົນສູງສຸດໄດ້ກ່າວວ່າເພື່ອກໍ່ສ້າງ ແລະປັບປຸງພະນັກງານສານແຕ່ລະຂັ້ນໃຫ້ນັບມື້ເຕີບໃຫຍ່ເຂັ້ມແຂງຢ່າງມີຄຸນນະພາບ, ຈິ່ງຮຽກຮ້ອງໃຫ້ຄະນະປະທານສານປະຊາຊົນແຂວງໄຊຍະບູລີ, ສານເຂດ 1, 2 ແລະ 3 ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ຜູ້ພິພາກສາ ແລະ ພະນັກງານສາໃຫ້ສາມາດກຳແໜ້ນ ແລະມີຄວາມເຂົ້າໃຈຢ່າງເລິກເຊິ່ງຕໍ່ໜ້າທີ່ການເມືອງທີ່ພັກ-ລັດມອບໝາຍໃຫ້ໃນການປົກປ້ອງແນວທາງນະໂຍບາຍ, ອິດທິພົນ ແລະ ຄວາມໄວ້ເນື້ອເຊື່ອໃຈຂອງປະຊາຊົນ. ປົກປ້ອງສິດຜົນປະໂຫຍດອັນຊອບທໍາຂອງປະຊາຊົນ, ຮັບໃຊ້ປະຊາຊົນ ແລະຮັບປະກັນຄວາມຍຸຕິທຳ; ໃນນີ້,ຕ້ອງມີຄວາມເປັນແບບຢ່າງນຳໜ້າໃນການປະຕິບັດກົດໝາຍ, ການຄົ້ນຄວ້າພິຈາລະນາ ແລະ ແກ້ໄຂຄະດີ ຕ້ອງມີທັດສະນະເບິ່ງບັນຫາຢ່າງຮອບດ້ານ, ຮອບຄອບ, ພາວະວິໄສ ແລະ ເບິ່ງຫຼັກຖານຕົວຈິງ; ຍົກສູງຄຸນນະພາບຂອງການດໍາເນີນຊີວິດການເມືອງ ຕິດພັນກັບການກວດກາ, ຕີລາຄາຄວາມເປັນແບບຢ່າງນໍາໜ້າຂອງແຕ່ລະສະຫາຍໃນຄະນະໜ່ວຍພັກ, ສະມາຊິກພັກເພື່ອເພີ່ມທະວີກໍາລັງແຮງໃນການຕໍ່ສູ້ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນກົງຈັກການຈັດຕັ້ງຂອງສານແຕ່ລະຂັ້ນ.ແນໃສ່ສ້າງພັກໃຫ້ປອດໃສ, ເຂັ້ມແຂງ ແລະໜັກແໜ້ນ; ຕິດຕາມ-ກວດກາການປະຕິບັດໜ້າທີ່ຂອງການຈັດຕັ້ງພັກ, ການກໍ່ສ້າງ ແລະຂະຫຍາຍພັກກໍຄືການປະຕິບັດໜ້າທີ່ຂອງສະມາຊິກພັກ-ພະນັກງານ ຢູ່ສານປະຊາຊົນ ໂດຍສະເພາະຜູ້ທີ່ມີສ່ວນກ່ຽວຂ້ອງກັບການດຳເນີນຄະດີເຊັ່ນ: ຈ່າສານ, ຜູ້ຊ່ວຍຜູ້ພິພາກສາ ແລະ ຜູ້ພິພາກສາ, ຕ້ອງມີມາດຕະການເຂັ້ມງວດ-ເດັດຂາດຕໍ່ສະມາຊິກພັກ-ພະນັກງານທີ່ລະເມີດກົດໝາຍ, ມີການສວຍໃຊ້ໜ້າທີ່ຕໍາແໜ່ງ ແລະ ຄວາມຮັບຜິດຊອບກົດໜ່ວງຖ່ວງດຶງການດຳເນີນຄະດີໃຫ້ຊັກຊ້າ, ສວຍໃຊ້ຊ່ອງຫວ່າງຂອງກົດໝາຍ, ເຊື່ອງອໍາຂໍ້ມູນຫຼັກຖານເພື່ອຊອກຫາຜົນປະໂຫຍດທີ່ບໍ່ຊອບທໍາ, ບໍ່ມີຄວາມໂປ່ງໃສໃນການປະຕິບັດໜ້າທີ່ວຽກງານກໍຄືການຄົ້ນຄວ້າ

ພິຈາລະນາຕັດສິນ ຫຼືພິພາກສາຄະດີ ເພື່ອເຮັດໃຫ້ການສະເໜີຂໍອຸທອນ, ຂໍລົບລ້າງ ຫຼື ຂໍຮື້ຟື້ນຄະດີ ມີອັດຕາສ່ວຫຼຸດລົງ; ເອົາໃຈໃສ່ຄຸ້ມຄອງລາຍຮັບ-ລາຍຈ່າຍງົບປະມານໂດຍສະເພາະລາຍຮັບ-ລາຍຈ່າຍຄ່າບໍລິການວິຊາການ ແລະ ຄ່າທຳນຽມໃຫ້ຖືກຕ້ອງຕາມກົດໝາຍທີ່ໄດ້ກຳນົດ; ຕ້ອງມີຄວາມບຸກບືນສູ້ຊົນຝຶກຝົນຫຼໍ່ຫຼອມຕົນເອງ ແລະອອກແຮງຄົ້ນຄວ້າຮໍ່າຮຽນຍົກລະດັບໃນທຸກດ້ານໂດຍສະເພາະແມ່ນວິຊາສະເພາະທາງດ້ານກົດໝາຍ ແລະມີຄວາມສາມາດໝູນໃຊ້ແນວຄິດທິດສະດີເຂົ້າໃສ່ພາກປະຕິບັດຕົວຈິງ, ສ້າງໃຫ້ມີການຫັນປ່ຽນໃໝ່ໃນການພິຈາລະນາແກ້ໄຂຄະດີ ເພື່ອນຳເອົາຄວາມຍຸຕິທຳມາໃຫ້ສັງຄົມ. ຄຽງຄູ່ດຽວກັນ, ຕ້ອງເພີ່ມທະວີການພົວພັນ, ການປະສານສົມທົບ, ການປະຕິບັດລະບອບການລາຍງານຕາມໜ້າວຽກໃນຂອບເຂດຄວາມຮັບຜິດຊອບຂອງຕົນລະຫວ່າງສາຍຕັ້ງ-ສາຍຂວາງ ໃຫ້ກົມກຽວ, ທັນເວລາ ແລະຖືກຕ້ອງກັບຕົວຈິງ; ໃນນັ້ນ, ໃຫ້ເອົາໃຈໃສ່ຈັດຕັ້ງຜັນຂະຫຍາຍບົດບັນທຶກການຮ່ວມມືລະຫວ່າງ 4 ພາກສ່ວນ ຄື: ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ກະຊວງຍຸຕິທຳ ແລະກະຊວງປ້ອງກັນປະເທດທີ່ໄດ້ເປັນເອກະພາບໃນແຕ່ລະໄລຍະໃຫ້ເຂົ້າສູ່ຕົວຈິງຫຼາຍຂຶ້ນເພື່ອຮັບປະກັນໄດ້ຄວາມໂປ່ງໃສ ແລະເປັນທໍາ.

ພ້ອມນັ້ນ, ປະທານສານປະຊາຊົນສູງສຸດຍັງໄດ້ເດີນທາງໄປຢ້ຽມສະຖານທີ່ທີ່ຈະສ້າງຕັ້ງສານເຂດໃໝ່ທີ່ເມືອງປາກອູ ແຂວງຫຼວງພະບາງ.

แชร์