ສະຫວັນນະເຂດ ຈັດພິທີປະດິດສະຖານຮູບປັ້ນພໍ່ກະດວດໄວ້ທີ່ອະນຸສາວະລີ

ພາຍຫຼັງສຳເລັດພິທີ່ແຫ່ຮູບປັ້ນຫຼໍ່ພໍ່ກະດວດຈາກນະຄອນຫຼວງວຽງຈັນສູ່ແຂວງສະຫວັນນະເຂດໃນຕອນແລງວັນທີ 2 ມີນາ 2022 ແລະພັກແຮມຢູ່ທີ່ເດີ່ນຫ້ອງວ່າການປົກຄອງແຂວງເປັນເວລາ 1 ຄືນ, ມາໃນຕອນເຊົ້າວັນທີ 3 ມີນາ ກໍ່ໄດ້ຈັດພິທີ່ແຫ່ຮູບປັ້ນພໍ່ກະດວດໄປປະດິດສະຖານໄວ້ທີ່ອະນຸສາວະລີທີ່ວົງວຽນຕໍ່ໜ້າໂຮງໝໍແຂວງສະຫວັນນະເຂດ. ໂດຍມີພຣະເຖຣານຸເຖຣະ,ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີທ່ານເຈົ້າຄອງນະຄອນຫຼວງວຽງຈັນ, ທ່ານເຈົ້າແຂວງສາລະວັນ, ການນຳຈາກສູນກາງ, ອຳນາດການປົກຄອງແຂວງ, ອະດີດການນໍາຂັ້ນສູງກາງ, ຂັ້ນແຂວງ ແລະກ້ອນກໍາລັງຈາກບັນດາເມືອງ, ພະນັກງານຈາກພະແນກການ-ກົມກອງຕ່າງໆ, ກ້ອນກໍາລັງຂອງທະຫານ, ຕໍາຫຼວດ, ນັກຮຽນ-ນັກສຶກສາ, ພ້ອມດ້ວຍມວນຊົນຊາວນະຄອນໄກສອນ ພົມວິຫານ ເຂົ້າຮ່ວມຢ່າງເປັນຂະບວນຟົດຟື້ນ.

 ສຳລັບຂະບວນແຫ່ໄດ້ເລີ່ມຕົ້ນອອກຈາກຫ້ອງວ່າການປົກຄອງແຂວງໃນເວລາ 8:00 ໂມງ ແລະເຄື່ອນອອກສູ່ວົງວຽນອາຊຽນຕາມຖະໜົນໄກສອນ (A1) ມາຫາວົງວຽນກະບອງໃຫຍ່, ໄປຕາມເສັ້ນທາງພໍ່ກະດວດ. ຮອດອະນຸສາວະລີໜ້າໂຮງໝໍແຂວງລວມໄລຍະທາງປະມານ 4 ກິໂລແມັດ,ໃຊ້ເວລາເກືອບ 3 ຊົ່ວໂມງ, ໂດຍໃນເສັ້ນທາງທີ່ຂະບວນແຫ່ຜ່ານໄປ ກໍ່ມີມວນຊົນ ໃຫ້ການຕ້ອນຮັບເພື່ອເຄົາລົບບູຊາ ແລະ ຖວາຍດ້ວຍດອກໄມ້, ທູບທຽນ, ຂັນໝາກເບັງ, ຕົ້ນກາລະພຶກ ແລະ ວັດຖຸປັດໄຈຕ່າງໆ. ນອກນັ້ນ, ຢູ່ຕໍ່ໜ້າງານຍັງໄດ້ມີຂະບວນຟ້ອນ, ຂະບວນແຫ່ຈາກເມືອງ ແລະກຸ່ມບ້ານພາຍໃນເທສະບານ ນະຄອນໄກສອນ ພົມວິຫານອີກດ້ວຍ. ຊຶ່ງພິທີອັງເຊີນຮູບປັ້ນຫຼໍ່ພໍ່ກະດວດ ທີ່ເປັນບັນພະບຸລຸດຂອງຊາດລາວກັບຄືສູ່ມາຕຸພູມຖືເປັນຄວາມພູມໃຈຍິ່ງຂອງຊາວແຂວງສະຫວັນນະເຂດ.

ໃນພິທີຄັ້ງນີ້ທ່ານ ບຸນສະໜອງ ສີຫາລາດ ຫົວໜ້າກົມວິຈິດສິນ ກະຊວງຖະແຫຼງຂ່າວ,ວັດທະນະທຳ ແລະທ່ອງທ່ຽວ, ໄດ້ກ່າວມອບໂຄງການອະນຸສາວະລີຮູບຈຳລອງພໍ່ກະດວດວ່າ: ໂຄງການດັ່ງກ່າວ, ສະແດງອອກເຖິງການຈາລຶກບຸນຄຸນ,ຄຸນງາມຄວາມດີໃນການຕໍ່ສູ້ກັບລັດທິລ່າເມືອງຂຶ້ນຝຣັ່ງ. ໂດຍພໍ່ກະດວດເປັນໜຶ່ງໃນວິລະບູລຸດຜູ້ມີນໍ້າໃຈຮັກຊາດ, ຮັກບ້ານເກີດເມືອງນອງ, ມີນໍ້າໃຈເສຍສະຫຼະຢ່າງສູງສົ່ງ,ບໍ່ຍອມຈຳນົນຕໍ່ສັດຕູ. ແລະ ບໍ່ຍອມຢູ່ໃຕ້ອຳນາດຂອງຝຣັ່ງ. ເມື່ອເຫັນປະເທດຊາດຖືກຮຸກຮານຢ່າງໂຫດຮ້າຍປ່າເຖື່ອນ, ປະຊາຊົນຖືກກົດຂີ້ຂູດຮີດ, ຖືກຈັບກຸມຄຸມຂັງ,ທໍລະມານຢ່າງບໍ່ມີຄວາມເປັນທຳ. ດັ່ງນັ້ນເພິ່ນຈຶ່ງໄດ້ເຕົ້າໂຮມຄວາມສາມັກ, ນຳພາປະຊາຊົນລຸກຮື້ຂຶ້ນຕໍ່ສູ້ກັບພວກລ່າເມືອງຂຶ້ນຝຣັ່ງຢ່າງອົງອາດກ້າຫານ ແລະນັ້ນກໍ່ແມ່ນເຫດການປະຫວັດສາດທີ່ພວກເຮົາຄົນຮຸ່ນຫຼັງຕ້ອງຈາລຶກຄຸນງາມຄວາມດີຂອງເພິ່ນ.

ໂອກາດດຽວກັນນີ້ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ກໍ່ໄດ້ເລົ່າເຖິງມູນເຊື້ອພໍ່ກະດວດວ່າ: ເພິ່ນເປັນຜູ້ມີວິຊາອາຄົມປິ່ນປົວຄົນເຈັບປ່ວຍໄດ້, ເພິ່ນຈິ່ງໄດ້ເດີນທາງໄປຫຼາຍແຫ່ງ, ແຕ່ໄປບ່ອນໃດກໍ່ເຫັນແຕ່ປະຊາຊົນຖືກກົດຂີ່ຂູດຮີດດ້ວຍການເສຍຊ່ວຍ ແລະເປັນຂ້ອຍຂ້າຝຣັ່ງຍິ່ງນັບມື້ໜັກໜ່ວງ. ເພິ່ນຈື່ງຊອກທຸກວິທີທາງເພື່ອປຸກລະດົມປະຊາຊົນລຸກຂຶ້ນຕໍ່ສູ້ຕ້ານການກົດຂີ່ຂູດຮີດໃນສະໄໜລາວຕົກເປັນຫົວເມືອງຂື້ນຂອງສັດຕູຕ່າງດ້າວ. ພໍ່ກະດວດແມ່ນນັກຕໍ່ສູ້ທີ່ພິລາດອາດຫານ, ມີນໍ້າໃຈຮັກຊາດ, ຮັກບ້ານເກີດເມືອງນອນ, ມີນໍ້າໃຈເສຍສະຫຼະສູງສົ່ງບໍ່ຍອມຈໍານົນຕໍ່ສັດຕູ. ນີ້ແມ່ນເຫດການປະຫວັດສາດທີ່ພວກເຮົາຄົນຮຸ່ນຫຼັງຕ້ອງຈາລຶກຄຸນງາມຄວາມດີ ແລະ ວິລະກຳອັນລໍ້າເລີດຂອງເພີ່ນໄວ້. ດັ່ງນັ້ນ, ຈື່ງເກີດມີໂຄງການສ້າງອະນຸສາວະລີຮູບປັ້ນພໍ່ກະດວດຂື້ນ.

ຫຼັງຈາກນັ້ນ, ກໍ່ມີພິທີນໍາຮູບປັ້ນຫຼໍ່ຂອງພໍກະດວດຂຶ້ນປະດິດສະຖານເທິງແຖ່ນຕັ້ງຢ່າງສະຫງ່າຜ່າເຜີຍ, ພ້ອມທັງມີພິທີທາງສາສະໜາເພື່ອເປັນສິລິມຸງຄຸນ ແລະພິທີມອບ-ຮັບ ຢ່າງເປັນທາງການ. 

แชร์