ປີນີ້ ແລະ ປີໜ້າ ຄາດວ່າເສດຖະກິດລາວຂະຫຍາຍຕໍ່າກວ່າ 4,5%

ບົດລາຍງານຮ່ວມລະຫວ່າງທະນາຄານພັດທະນາເອເຊຍ (ADB) ກັບ ສະພາການຄ້າ ແລະອຸດສາຫະກຳແຫ່ງຊາດລາວ, ລະບຸວ່າ: ການເຕີບໂຕດ້ານເສດຖະກິດຂອງ ສປປ ລາວ ຄາດວ່າຈະຕໍ່າກວ່າ 4,5% ໃນປີ 2022 ແລະ 2023, ເມື່ອທຽບກັບການຂະຫຍາຍຕົວສະເລ່ຍປະຈໍາປີ 7% ໃນສອງທົດສະວັດທີ່ຜ່ານມາ. ບົດລາຍງານດັ່ງກ່າວຍັງລະບຸວ່າ: ການປະຕິຮູບຂອງລັດຖະບານເມື່ອປີ2018 ໄດ້ຫຼຸດຜ່ອນຄ່າໃຊ້ຈ່າຍ ແລະ ເວລາການຂໍຂຶ້ນທະບຽນວິສາຫະກິດລົງເຖິງໜຶ່ງສ່ວນສາມ. ແຕ່ການສຳຫຼວດໃນຄັ້ງນີ້ພົບວ່າ: ມີການປະຕິບັດທີ່ບໍ່ໄປຕາມລະບຽບຢ່າງຫຼວງຫຼາຍ, ລວມທັງຄ່າໃຊ້ຈ່າຍທີ່ບໍ່ເປັນທາງການໃຫ້ເຈົ້າໜ້າທີ່ລັດ, ການລາຍງານລາຍຮັບຂອງວິສາຫະກິດທີ່ເຊື່ອງອໍາ ແລະຄວາມຫຍຸ້ງຍາກໃນການເຂົ້າເຖິງຂໍ້ມູນຂ່າວສານທາງການ. ພ້ອມນີ້, ລະບຽບການທີ່ມີຄວາມຫຍຸ້ງຍາກ ແລະສັບຊ້ອນສະແດງໃຫ້ເຫັນວ່າລັດຖະບານພວມສູນເສຍລາຍຮັບຈາກການເກັບອາກອນຢ່າງຫຼວງຫຼາຍ, ຊຶ່ງຈໍາເປັນຕໍ່ການໃຊ້ຈ່າຍເຂົ້າໃນການບໍລິການພາກລັດທີ່ສຳຄັນຕ່າງໆ.

ບົດລາຍງານຮ່ວມສະບັບນີ້ເຜີຍແຜ່ເມື່ອວັນທີ 31 ມີນາ 2022 ຊີ້ໃຫ້ເຫັນວ່າ: ສະພາບແວດລ້ອມຂອງລະບຽບການຕໍ່ການພັດທະນາທຸລະກິດໄດ້ຮັບການປັບປຸງໃນທົ່ວທຸກແຂວງຂອງ ສປປ ລາວ, ແຕ່ຍັງມີຫຼາຍຢ່າງທີ່ຈະຕ້ອງໄດ້ເຮັດເພື່ອເຮັດໃຫ້ປະເທດຟື້ນຕົວຈາກການລະບາດພະຍາດໂຄວິດ-19. ບົດລາຍງານຮ່ວມນີ້, ຊີ້ໃຫ້ເຫັນ 6 ຂົງເຂດບຸລິມະສິດເຊັ່ນ: ຄວາມງ່າຍຂອງການເລີ່ມຕົ້ນທຸລະກິດ, ຄວາມໂປ່ງໃສ ແລະການເຂົ້າເຖິງຂໍ້ມູນຂ່າວສານ, ພາລະທາງດ້ານລະບຽບການ, ຄ່າໃຊ້ຈ່າຍທີ່ບໍ່ເປັນທາງການ, ຄວາມສອດຄ່ອງຂອງການຈັດຕັ້ງປະຕິບັດນະໂຍບາຍ ແລະຄວາມເປັນມິດຂອງອົງການປົກຄອງແຂວງຕໍ່ພາກທຸລະກິດ.

ໂດຍທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈໍາ ສປປ ລາວ, ໃຫ້ຮູ້ວ່າ: ການປະຕິຮູບນັບແຕ່ປີ 2018 ເປັນຕົ້ນມາ, ໄດ້ຊ່ວຍໃຫ້ລັດຖະບານຂັ້ນທ້ອງຖິ່ນກໍາຈັດສິ່ງກີດຂວາງຕໍ່ການພັດທະນາທຸລະກິດ ແລະ ຍັງຊຸກຍູ້ຄວາມຫຼາກຫຼາຍຂອງເສດຖະກິດ. ສ່ວນການປະຕິຮູບຕໍ່ໄປຂ້າງໜ້າ, ແມ່ນການຈັດຕັ້ງປະຕິບັດງານດ້ວຍຄວາມສັດຊື່ ແລະມີປະສິດທິພາບຖືເປັນຄວາມຈຳເປັນເພື່ອກະຕຸ້ນໃຫ້ເກີດໂອກາດທາງທຸລະກິດໃໝ່ໆ ແລະສ້າງວຽກເຮັດງານທຳທີ່ຊ່ວຍໃຫ້ ສປປ ລາວ ສ້າງເສດຖະກິດຢ່າງມີປະສິດທິຜົນ ແລະສາມາດແຂ່ງຂັນໄດ້ຫຼາຍຂຶ້ນກວ່າເກົ່າພາຍຫຼັງວິກິດການລະບາດພະຍາດໂຄວິດ-19.

ທາງດ້ານ ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກຳແຫ່ງຊາດລາວ, ກໍ່ໄດ້ກ່າວວ່າ “ການຜ່ານຜ່າສິ່ງທ້າທາຍຈາກພະຍາດລະບາດທີ່ບໍ່ເຄີຍມີມາກ່ອນ, ມັນຮຽກຮ້ອງໃຫ້ລັດຖະບານທັງລະດັບສູນກາງ ແລະ ທ້ອງຖິ່ນຮ່ວມມືກັບພາກເອກະຊົນຢ່າງໃກ້ຊິດເພື່ອດຶງດູດການລົງທຶນໃໝ່ທັງຈາກພາຍໃນ ແລະ ຕ່າງ ປະເທດ, ບົດລາຍງານການສ້າງສີ່ງອຳນວຍຄວາມສະດວກທາງດ້ານການຄ້າ ແລະການລົງທຶນຂັ້ນແຂວງໄດ້ສະໜອງຂໍ້ມູນການວິເຄາະລະອຽດກ່ຽວກັບຈຸດແຂງ ແລະ ຈຸດອ່ອນຂອງຂັ້ນຕອນສະພາບແວດລ້ອມທຸລະກິດ ແລະ ການຈັດຕັ້ງປະຕິບັດໃນລະດັບທ້ອງຖິ່ນ; ໃນຂະນະທີ່ເສດຖະກິດ ແລະ ຊຸມຊົນທຸລະກິດຂອງ ສປປ ລາວ ໄດ້ຮັບຜົນກະທົບຢ່າງໜັກໜ່ວງຈາກການລະບາດຂອງພະຍາດໂຄວິດ-19”.

แชร์