ລາວ-ໄທ ຫາລືປັດໄຈອຳນວຍຄວາມສະດວກດ້ານການຄ້າ

ທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ແຫ່ງ ສປປ ລາວ, ໄດ້ຈັດປະຊຸມປຶກສາຫາລືແບບທາງໄກກັບ ທ່ານ ຈຸລິນ ລັກສະນະວິສິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງພານິດແຫ່ງຣາຊະອານາຈັກໄທ. ໃນບັນຫາທີ່ກ່ຽວກັບການຄ້າໃນໄລຍະຜ່ານມາ ແລະວຽກງານທີ່ຈະຮ່ວມມືກັນໃນຕໍ່ໜ້າ.

ໃນກອງປະຊຸມຊຶ່ງຈັດຂຶ້ນເມື່ອບໍ່ດົນມານີ້, ໄດ້ມີການສະເໜີ 4 ບັນຫາຄື: ຊຸກຍູ້ການເປີດດ່ານເພື່ອການຂົນສົ່ງສິນຄ້າລະຫວ່າງປະເທດ: ຊຶ່ງຂໍໃຫ້ ສປປ ລາວ ເປີດດ່ານທີ່ປິດໄປຕາມມາດຕະການຄວບຄຸມໂຄວິດ-19 ໃຫ້ສາມາດຂົນສົ່ງສິນຄ້າລະຫວ່າງກັນໄດ້ເພື່ອບັນລຸເປົ້າໝາຍເພີ່ມມູນຄ່າການຄ້າ11.000 ລ້ານໂດລາສະຫະລັດ ໃນປີ 2025; ອໍານວຍຄວາມສະດວກທາງດ້ານການຄ້າບໍລິເວນດ່ານຊາຍແດນ: ຂໍໃຫ້ ສປປ ລາວ ອຳນວຍຄວາມສະດວກເລື່ອງການຜ່ານພິທີການກົມພາສີປະຈຳດ່ານຊາຍແດນ ເຊັ່ນ: ສາມາດອະນຸມັດເອກະສານຮັບຮອງແຫຼ່ງກຳເນີດສິນຄ້າ ຫຼື ຟອຣ໌ມ ດີ (Form D) ໄດ້ໂດຍບໍ່ຕ້ອງຜ່ານກົມພາສີທີ່ນະຄອນຫຼວງວຽງຈັນ ຊຶ່ງ ເຮັດໃຫ້ຊັກຊ້າ ແລະຖ້າ ສປປ ລາວ ສາມາດເຊື່ອມຕໍ່ລະບົບຮັບ-ສົ່ງເອກະສານແບບອິເລັກໂທຣນິຄ (e-form D) ໄດ້ຕາມທີ່ຕົກລົງກັນໄວ້ກັບອາຊຽນ ASEAN Single Window ກໍຈະຊ່ວຍແກ້ໄຂບັນຫາດັ່ງກ່າວນີ້ໄດ້ເຊັ່ນກັນ; ການແກ້ໄຂບັນຫາຈຸດປ່ອຍລົດຂົນສົ່ງສິນຄ້າຜ່ານແດນຊັກຊ້າ ບໍລິເວນດ່ານບໍ່ເຕັນ-ບໍ່ຫານ; ລົດໄຟລາວ-ຈີນ: ຊ່ວຍອຳນວຍຄວາມສະດວກໃນການຂົນສົ່ງສິນຄ້າໂດຍສະເພາະໝາກໄມ້ຂອງໄທໄປຍັງ ສປ ຈີນ ໂດຍໃຊ້ເສັ້ນທາງລົດໄຟ ໄທ-ລາວ-ຈີນ.

ພ້ອມນີ້, ຍັງສົນທະນາແລກປ່ຽນ ແລະຂໍການແກ້ໄຂຈາກຝ່າຍໄທເປັນຕົ້ນແມ່ນການສົ່ງອອກສາລີຊຶ່ງໄດ້ຮັບຜົນກະທົບຈາກມາດຕະການທີ່ບໍ່ແມ່ນພາສີຈາກຝ່າຍໄທນັບແຕ່ປີ 2010 ເປັນຕົ້ນມາ. ຊຶ່ງໄດ້ຖືກຈໍາກັດລະດູການໃນການນໍາເຂົ້າສາລີຈາກ ສປປ ລາວ ໂດຍກໍານົດການນຳເຂົ້າສາລີພຽງແຕ່ 7 ເດືອນຕໍ່ປີ ໂດຍເລີ່ມແຕ່ວັນທີ 1 ກຸມພາ ຫາ ວັນທີ 31 ສິງຫາ ຈິ່ງເປັນອຸປະສັກ ແລະ ເພີ່ມຕົ້ນທຶນໃຫ້ແກ່ຜູ້ປະກອບການ ແລະໃນທີ່ສຸດຜູ້ປະກອບການກໍ່ຫັນຈາກການປູກສາລີໄປປູກພືດອື່ນທີ່ມີລາຍຮັບດີກວ່າ ແລະເຮັດໃຫ້ຜົນຜະລິດສາລີໜ້ອຍລົງ. ອີງຕາມສະຖິຕິການສົ່ງອອກສາລີໄປໄທໃນປີ2013 ບັນລຸເຖິງ 126.903 ໂຕນ ເທົ່າກັບ 40.581.009 ໂດລາສະຫະລັດ, ປັດຈຸບັນເຫຼືອພຽງ 22.030 ໂຕນ ເທົ່າກັບ 2.670.900 ໂດລາ ແລະສະເໜີຝ່າຍໄທພິຈາລະນາຄືນເລື່ອງຍົກເລີກການນຳໃຊ້ມາດຕະການດັ່ງກ່າວ ໂດຍໃຫ້ສອດຄ່ອງກັບເງື່ອນໄຂຂອງສັນຍາການຄ້າສິນຄ້າຂອງອາຊຽນ; ການນໍາເຂົ້າກາເຟເມັດດິບ ແລະກາເຟຂົ້ວຈາກລາວໄປໄທເຫັນວ່າມີກຳແພງທີ່ບໍ່ແມ່ນອັດຕາພາສີໂດຍສະເພາະແມ່ນການຈຳກັດປະລິມານທາງອ້ອມ, ດ້ວຍການແບ່ງປັນໂກຕ້ານໍາເຂົ້າໃຫ້ຜູ້ປະກອບການທີ່ມີເງື່ອນໄຂຊຶ່ງເຫັນວ່າບໍ່ທັນສອດຄ່ອງກັບເງື່ອນໄຂສັນຍາການຄ້າດ້ານສິນຄ້າອາຊຽນ,ຈິ່ງສະເໜີຝ່າຍໄທພິຈາລະນາ ແລະແກ້ໄຂຕາມທາງຄວນ; ສະເໜີຝ່າຍໄທຊ່ວຍແກ້ໄຂບັນຫາການນຳເຂົ້ານໍ້າມັນປາລ໌ມ ຈາກປະເທດມາເລເຊຍ ມາຜ່ານຊາຍແດນໄທເພື່ອນຳເຂົ້າ ສປປ ລາວ ໂດຍບໍ່ຈຳກັດປະລິມານ ແລະດ່ານທີ່ຈະນຳເຂົ້າ ແລະສົ່ງຕໍ່ມາ ສປປ ລາວ ເພື່ອເປັນການປະຢັດເວລາ ແລະປະຢັດຕົ້ນທຶນໃນການຂົນສົ່ງໃຫ້ພາກທຸລະກິດ.

ໃນໂອກາດດຽວກັນນີ້, ທ່ານ ຈຸລິນ ລັກສະນະວິສິດ ກໍໄດ້ສະເໜີຫາລືກ່ຽວກັບການເປີດດ່ານເພື່ອອໍານວຍຄວາມສະດວກໃນການຂົນສົ່ງສິນຄ້າອີກ 9 ດ່ານປະເພນີ ຫຼື ດ່ານທ້ອງຖິ່ນທີ່ໄດ້ປິດລົງເນື່ອງຈາກສະພາບການລະບາດພະຍາດໂຄວິດ-19; ການແກ້ໄຂບັນຫາຈຸດປ່ອຍລົດຂົນສົ່ງສິນຄ້າຜ່ານແດນຊັກຊ້າບໍລິເວນດ່ານບໍ່ເຕ່ນ-ບໍ່ຫານ ທີ່ມີການປ່ຽນຖ່າຍຫົວລາກລົດກ່ອນຜ່ານໄປຈີນຊຶ່ງຝ່າຍລາວມີຫົວລາກລົດໜ້ອຍຈິ່ງບໍ່ພຽງພໍກັບຄວາມຕ້ອງການຂອງບໍລິສັດໄທ.

ຢ່າງໃດກໍດີ, ທັງສອງຝ່າຍກໍຈະນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ໄປນໍາສະເໜີຕໍ່ຄະນະລັດຖະບານຂອງຕົນເພື່ອພິຈາລະນາແກ້ໄຂໃນຂັ້ນຕໍ່ໄປ.

 

แชร์