ມາດຕະການປ້ອງກັນໂຄວິດ ແຕ່ 31 ມີນາ ເປັນຕົ້ນໄປ

ການລະບາດຂອງພະຍາດໂຄວິດ-19 ຍັງມີລັກສະນະຕິດເຊື້ອເພີ່ມຂຶ້ນໃນແຕ່ລະວັນ, ທັງແພ່ລາມໃນຊຸມຊົນວົງກວ້າງຢູ່ເກືອບທຸກແຂວງ, ສ່ວນໃຫຍ່ຕິດພັນກັບການເຄື່ອນໄຫວ ແລະ ການດຳລົງຊີວິດປະຈຳວັນຂອງບຸກຄົນ ແລະສັງຄົມ, ຄວາມບໍ່ເຂັ້ມງວດໃນການປະຕິບັດມາດຕະການປ້ອງກັນຂັ້ນພື້ນຖານ, ທີ່ໜ້າກັງວົນກໍຄືໃນສອງອາທິດຂ້າງໜ້າບຸນສົງການປີໃໝ່ລາວກໍຈະໝູນວຽນມາເຖິງ. ຊຶ່ງໃນເງື່ອນໄຂທີ່ມີການລະບາດພະຍາດ, ໂດຍລັດຖະບານກໍ່ໄດ້ຄົ້ນຄວ້າ ແລະຊີ້ນໍາການສະຫຼອງປີໃໝ່ລາວ ພສ 2565 ໂດຍໄດ້ມອບໃຫ້ຄະນະສະເພາະກິດກໍານົດມາດຕະການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການລະບາດຂອງພະຍາດໂຄວິດ-19.

ໂດຍທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງຫົວໜ້າຄະນະສະເພາະກິດ, ຜູ້ປະຈຳການ, ຫົວໜ້າກອງເລຂາໄດ້ຖະແຫຼງເມື່ອວັນທີ 31 ມີນາ 2022 ວ່າ: ຄະນະສະເພາະກິດ ໄດ້ຄົ້ນຄວ້າ ແລະ ອອກແຈ້ງການສະບັບເລກທີ 370, ລົງວັນທີ 31 ມີນາ 2022 ຊຶ່ງໄດ້ກຳນົດມາດຕະການສໍາລັບໄລຍະແຕ່ວັນທີ 31 ມີນາ 2022 ເປັນຕົ້ນໄປ. ໃນນັ້ນ, ໃຫ້ຄະນະສະເພາະກິດກະຊວງ, ອົງການ, ບັນດາແຂວງແລະ ນະຄອນຫຼວງວຽງຈັນ ຊີ້ນຳໃນການກຳນົດຮູບແບບການສະເຫຼີມສະຫຼອງບຸນປີໃໝ່ລາວຊຶ່ງອະນຸຍາດໃຫ້ຈັດສະເພາະກິດຈະກຳຕາມປະເພນີເຊັ່ນ: ການສັກກະລະບູຊາ, ສົງນໍ້າພຣະ ແລະບາສີສູ່ຂວັນພາຍໃນຄອບຄົວບົນຈິດໃຈປະຢັດມັດທະຍັດ, ບໍ່ຊຸມນຸມແອອັດ ແລະ ບໍ່ເຮັດໃຫ້ເກີດການລະບາດເປັນວົງກວ້າງຢ່າງເດັດຂາດ. ພ້ອມນັ້ນ, ຕ້ອງປະຕິບັດມາດຕະການປ້ອງກັນຂັ້ນພື້ນຖານຄື: ການຮັກສາໄລຍະຫ່າງ, ໃສ່ຜ້າອັດປາກ-ດັງ, ໝັ່ນລ້າງມືດ້ວຍນໍ້າສະອາດໃສ່ສະບູ ຫຼືເຈລລ້າງມື.

ສຳລັບການຈັດປະຊຸມ, ຄະນະຮັບຜີດຊອບຕ້ອງມີມາດຕະການຮອງຮັບເຊັ່ນ: ທຸກຄົນທີ່ເຂົ້າມາຮ່ວມຕ້ອງສັກວັຄຊິນຄົບລວມທັງເຂັມກະຕຸ້ນເມື່ອຮອດກຳນົດ, ທຸກຄົນຕ້ອງມີຜົນກວດແບບໄວ(ATK) 24 ຊົ່ວໂມງກ່ອນປະຊຸມເປັນຜົນລົບ ສໍາລັບກອງປະຊຸມທີ່ມີຜູ້ເຂົ້າຮ່ວມຫຼາຍກວ່າ 100 ທ່ານ, ຕ້ອງຕິດຕັ້ງເຄື່ອງວັດແທກອຸນຫະພຸມ ແລະ ປະຕິບັດມາດຕະການປ້ອງກັນພະຍາດຢ່າງເຄັ່ງຄັດ; ໃຫ້ຄະນະສະເພາະກິດກະຊວງ, ອົງການ, ບັນດາແຂວງ ແລະນະຄອນຫຼວງວຽງຈັນ ຕີລາຄາສະພາບການລະບາດຂອງພະຍາດແລ້ວພິຈາລະນາມາດຕະການກ່ຽວກັບການມາເຮັດວຽກຕາມສະພາບຄວາມເປັນຈິງຂອງແຕ່ລະບ່ອນ; ໃຫ້ສືບຕໍ່ການຮຽນການສອນແບບເຊິ່ງໜ້າຂອງທຸກຊັ້ນ, ທຸກສາຍໃນສະຖານການສຶກສາ ແຕ່ຕ້ອງຮັບປະກັນການປະຕິບັດມາດຕະການປ້ອງກັນ ແລະຄວບຄຸມການຕິດເຊື້ອ, ແຕ່ໃຫ້ໂຈະສະເພາະໂຮງຮຽນທີ່ບໍ່ສາມາດປະຕິບັດຕາມເງື່ອນໄຂ ແລະມາດຕະການທີ່ຄະນະສະເພາະກິດໄດ້ວາງອອກ ແລະໃຫ້ຄະນະສະເພາະກິດແຕ່ລະຂັ້ນຕິດຕາມແນະນຳບັນດາໂຮງຮຽນຢ່າງໃກ້ຊິດ. ພ້ອມກັນນີ້, ກໍ່ໃຫ້ປຸກລະດົມນັກຮຽນ-ນັກສຶກສາຕາມເກນອາຍຸທີ່ກະຊວງສາທາລະນະສຸກກຳນົດໃຫ້ໄປຮັບວັຄຊີນກັນໂຄວິດ-19 ຕາມແຜນການ.

ໃຫ້ຄະນະສະເພາະກິດທຸກພາກສ່ວນກວດກາຕົວເລກການສັກວັຄຊິນຂອງພາກສ່ວນຕົນ ແລະມາດຕະການຊຸກຍູ້ໃນຂັ້ນຕໍ່ໄປເພື່ອຮັບປະກັນໃຫ້ທຸກຄົນໄດ້ເຂົ້າເຖິງການສັກວັຄຊິນ,ແນໃສ່ການສ້າງພູມຄຸ້ມກັນໃຫ້ບຸກຄົນ ແລະສັງຄົມ;ໃຫ້ຄະນະສະເພາະກິດທຸກພາກສ່ວນຊີ້ນຳການກວດກາບັດສັກວັຄຊິນ ຫຼື QR Code Vaccine ID ຜ່ານແອພ LaoKYC ຂອງບຸກຄົນ ກ່ອນເຂົ້າສະຖານທີ່ເຮັດວຽກຂອງລັດ ແລະ ເອກະຊົນ ລວມທັງໂຮງຈັກໂຮງງານ; ໃຫ້ຄະນະສະເພາະກິດກະຊວງອຸດສາຫະກຳ ແລະການຄ້າສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫຼວງ ຊີ້ນຳການລົງຕິດຕາມ, ກວດກາຮ້ານອາຫານ ແລະ ຮ້ານຄ້າຕ່າງໆ ໃຫ້ເຂັ້ມງວດໃນການກວດກາບັດສັກວັຄຊິນ ຫຼື QR Code Vaccine ID ຜ່ານແອພ LaoKYC ກ່ອນການເຂົ້າໃຊ້ບໍລິການ,ຖ້າພົບເຫັນຜູ້ປະກອບການໃດມີການລະເມີດຕ້ອງ ດຳເນີນການຕັກເຕືອນ ແລະ ປັບໃໝຕາມລະບຽບການ.

ໃຫ້ຄະນະສະເພາະກິດກະຊວງໂຍທາທິການ ແລະຂົນສົ່ງຊີ້ນໍາພາກສ່ວນກ່ຽວຂ້ອງຂອງຕົນເອົາໃຈໃສ່ຕິດຕາມການຂົນສົ່ງ (ເຮືອບິນ, ເຮືອໂດຍສານ, ລົດໄຟ ແລະ ລົດໂດຍສານ) ໃຫ້ຜູ້ປະກອບການມີມາດຕະການປ້ອງກັນຜູ້ໂດຍສານ,ສະໜອງສະບູ ຫຼືເຈລລ້າງມື ແລະມີຄວາມເຂັ້ມງວດໃນການກວດກາບັດສັກວັຄຊິນ ຫຼື QR Code Vaccine ID ຜ່ານແອພ LaoKYC ກ່ອນການເຂົ້າໃຊ້ບໍລິການ, ຖ້າພົບເຫັນຜູ້ປະກອບການໃດລະເມີດຕ້ອງດຳເນີນການຕັກເຕືອນ ແລະ ປັບໃໝຕາມລະບຽບການ; ໃຫ້ຄະນະສະເພາະກິດກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບປະສານສົມທົບກັບຄະນະສະເພາະກິດຂັ້ນແຂວງ ແລະ ນະຄອນຫຼວງວຽງຈັນສືບຕໍ່ເພີ່ມທະວີການຕິດຕາມກວດກາການເຂົ້າ-ອອກຕາມດ່ານຊາຍແດນເພື່ອຮັບປະກັນບໍ່ໃຫ້ມີການເຂົ້າ-ອອກແບບຊະຊາຍ ຫຼືມີການລັກລອບເຂົ້າ-ອອກບໍ່ຜ່ານດ່ານຊາຍແດນ.

แชร์