IMF ເຕືອນການ ”ຂວ້ຳບາດຣັສເຊຍ” ສ່ຽງກະທົບຖານະສະກຸນເງິນຫຼັກຂອງໂດລາສະຫະລັດ

ກອງທຶນການເງິນລະຫວ່າງປະເທດ ຫຼື ໄອເອັມເອຟ (IMF) ອອກມາເຕືອນວ່າ ”ມາດຕະການຂວໍ້າບາດທາງການເງິນຕໍ່ຣັສເຊຍ, ອາດເຮັດໃຫ້ສັດສ່ວນການຖືຄອງ ”ໂດລາສະຫະລັດ” ໃນຖານະທຶນສຳຮອງລະຫວ່າງປະເທດຫຼຸດລົງ ແລະສົ່ງຜົນໃຫ້ລະບົບທຶນສຳຮອງນານາຊາດມີການແຕກແຍກອອກໄປສູ່ສະກຸນເງິນອື່ນໆເພີ່ມຂຶ້ນ.

ສຳນັກຂ່າວຕ່າງປະເທດຊຶ່ງລາຍງານໃນວັນທີ 31 ມີນາ 2022, ລະບຸຄຳກ່າວຂອງ ຄີຕາ ໂຄປິນາທ (Gita Gopinath) ຮອງກຳມະການຜູ້ຈັດການ ໄອເອັມເອຟ, ໄດ້ກ່າວຕໍ່ສື່ວ່າ ”ແນ່ນອນວ່າໂດລາສະຫະລັດ ຈະຍັງຄົງເປັນສະກຸນເງິນຫຼັກຂອງໂລກຕໍ່ໄປ, ແຕ່ການແຕກຍ່ອຍຂອງທຶນສຳຮອງໃນລະດັບນ້ອຍໆກໍ່ມີຄວາມເປັນໄປໄດ້”.

ຂະນະນີ້, ມີບາງປະເທດເລີ່ມເຈລະຈາເພື່ອຂໍປ່ຽນແປງສະກຸນເງິນສຳລັບການຊຳລະຄ່າສິນຄ້າ, ຊຶ່ງ ໂຄປິນາທ ໃຫ້ຄວາມເຫັນກ່ຽວກັບເລື່ອງນີ້ວ່າ ”ສົງຄາມໃນຢູເຄຣນຈະກະຕຸ້ນໃຫ້ການເງິນດິຈິຕອລມາແຮງຫຼາຍຂຶ້ນ. ບໍ່ວ່າຈະເປັນ ຄຣິບໂຕເຄຣ໌ເຣນຊີ, ຫຼຽນ stablecoin ລວມໄປເຖິງເງິນດິຈິຕອລ ທີ່ອອກໂດຍທະນາຄານກາງຂອງປະເທດຕ່າງໆ ແລະເມື່ອເງິນສະກຸນອື່ນໆ ຖືກໃຊ້ເປັນຕົວກາງໃນການຄ້າລະດັບໂລກຫຼາຍຂຶ້ນ, ທຶນສຳຮອງທີ່ທະນາຄານກາງແຕ່ລະປະເທດຖືຄອງຢູ່ກໍ່ອາດມີຮູບແບບທີ່ຫຼາກຫຼາຍຕາມໄປດ້ວຍ.

ຢ່າງໃດກໍຕາມ, ຮອງກຳມະການຜູ້ຈັດການກອງທຶນການເງິນລະຫວ່າງປະເທດກໍ່ເຄີຍອອກມາປະເມີນວ່າ ”ການຂວໍ້າບາດຕໍ່ຣັສເຊຍຄົງບໍ່ແມ່ນ ”ຈຸດຈົບ” ຂອງໂດລະສະຫະລັດໃນການເປັນທຶນສຳຮອງເງິນຕາຕ່າງປະເທດ, ຂະນະທີ່ສະພາບຄວາມຕຶງຄຽດລະຫວ່າງຢູເຄຣນ ກັບ ຣັສເຊຍ ກໍ່ມີສ່ວນສຳຄັນທີ່ເຮັດໃຫ້ການຂະຫຍາຍຕົວຂອງເສດຖະກິດໂລກຊ້າລົງ, ແຕ່ກໍ່ຈະບໍ່ເຖິງຂັ້ນນຳໄປສູ່ພາວະເສດຖະກິດໂລກຫຼຸດຖອຍຄັ້ງໃຫຍ່.

• 31/03/2022