ຕິດຕາມອາການໂຄວິດຫຼັງຕິດເຊື້ອ

ເມື່ອຕິດເຊື້ອໂຄວິດ-19, ອາການຂອງພະຍາດດັ່ງກ່າວຈະແຜງລິດໃຫ້ເຫັນເປັນເວລາ 3-4 ວັນ. ຊຶ່ງອາການທີ່ມັກພົບປະຈຳກໍຄືໄຂ້, ໄອແຫ້ງ ແລະ ເມື່ອຍ.

ນອກນັ້ນຍັງມີອາການຮ່ວມເຊັ່ນ: ລີ້ນບໍ່ຮັບຮູ້ລົດຊາດ, ດັງບໍ່ສາມາດໄດ້ກິ່ນ, ເຈັບຄໍ, ເຈັບຫົວ, ປວດຕາມຕົນຕົວ ຫຼືປວດກ້າມຊີ້ນ, ວິນວຽນ ແລະປວດຮາກ.

ສຳລັບອາການທີ່ຖືເປັນສັນຍານເຕືອນອັນຕະລາຍ, ໃນຜູ້ໃຫຍ່ຈະເລີ່ມຮູ້ສຶກໜັກຫົວ, ຫາຍໃຈຝືດ, ຫາຍໃຈຍາກ, ເຈັບໜ້າເອິກ ຮ່ວມດ້ວຍອາການຂາດນໍ້າ. ສ່ວນເດັກກາງຈະເກີດອາການມຶນງົງກະທັນຫັນ, ເບື່ອອາຫານ, ຮີມສົບ ແລະໃບໜ້າຈະປ່ຽນເປັນສີຟ້າເຂັ້ມ. ສຳລັບແອນ້ອຍຈະບໍ່ສາມາດດູດນົມໄດ້, ຫາກເກີດມີອາການທີ່ຍົກມານີ້ໃຫ້ຂໍຄວາມຊ່ວຍເຫຼືອຈາກຄະນະສະເພາະກິດທັນທີ.

ເມື່ອທ່ານມີອາການຕ້ອງສົງໃສ ແລະໄດ້ກວດດ້ວຍເຄື່ອງກວດໄວ (RDT), ຫາກຜົນອອກມາເປັນບວກໃຫ້ແຈ້ງຕໍ່ອຳນາດການປົກຄອງບ້ານ ແລະຮີບກັກຕົວ(ແຍກປ່ຽວ) ຢູ່ພາຍໃນຫ້ອງແລ້ວໂທຫາສາຍດ່ວນ 163 ແລະ 164 ເພື່ອຂໍຄຳແນະນຳດ້ານການປິ່ນປົວຕົນເອງຢູ່ເຮືອນ. ນອກນັ້ນ, ທ່ານຍັງສາມາດລົງທະບຽນທາງອອນໄລນ໌ ໂດຍການກົດເຂົ້າໄປໃນລິ້ງ https://forms.gle/wNJ7uTWH1i22onPm7 ຫຼັງຈາກນັ້ນເຈົ້າໜ້າທີ່ຈະສົ່ງຂໍ້ຄວາມ ຫຼືໂທກັບຫາທ່ານເພື່ອເອົາລະຫັດຄົນເຈັບໃຫ້ ແລະເພື່ອຕິດຕາມອາການຂອງທ່ານ.

ທັງນີ້, ອົງການອະນາໄມໂລກໄດ້ໃຫ້ຮູ້ວ່າກຸ່ມຄົນທີ່ສາມາດປິ່ນປົວຕົນເອງຢູ່ເຮືອນຕ້ອງແມ່ນກຸ່ມຄົນທີ່ບໍ່ໄດ້ຢູ່ໃນກຸ່ມສ່ຽງ (ບໍ່ແມ່ນຜູ້ອາຍຸສູງ ແລະ ບໍ່ມີພະຍາດປະຈຳຕົວ), ການປິ່ນປົວຕົນເອງຢູ່ເຮືອນເປັນສ່ວນໜຶ່ງຂອງແຜນໄລຍະຍາວຂອງລັດຖະບານເພື່ອຮັບມືກັບພະຍາດໂຄວິດ-19, ທັງເປັນການປົກປ້ອງ ແລະ ຫຼຸດຜ່ອນຄວາມກົດດັນຂອງລະບົບສາທາລະນະສຸກ. ການປິ່ນປົວຕົນເອງຢູ່ເຮືອນຢ່າງປອດໄພຈະຕ້ອງໄດ້ປະຕິບັດຕາມຄຳແນະນຳຂອງຄະນະສະເພາະກິດ ແລະມີສະຕິຕິດຕາມສະພາບພາຍໃນຂອງຕົນ, ຫາກຮ່າງກາຍສະແດງອາການໜັກໃຫ້ຮີບໂທລະສັບຂໍຄວາມຊ່ວຍເຫຼືອຈາກຄະນະສະເພາະກິດທັນທີ.

แชร์