ຄວາມຕຶງຄຽດຂອງໂລກສົ່ງຜົນກະທົບຕໍ່ຄ່າຄອງຊີບຂອງຄົນເອເຊຍ

ສະຖານະການຕຶງຄຽດລະຫວ່າງຣັສເຊຍ ແລະຢູເຄຣນ, ປະກອບກັບການອ່ອນຄ່າຂອງສະກຸນເງິນທ້ອງຖິ່ນຂອງບັນດາປະເທດໃນທະວີບເອເຊຍໃນຊ່ວງທີ່ສະຫະລັດອະເມຣິກາປັບຂຶ້ນອັດຕາດອກເບ້ຍເຮັດໃຫ້ເສດຖະກິດຂອງເອເຊຍຕົກຢູ່ໃນພາວະຢຸດຈຶ້ງ.

ລາຍງານຂ່າວຕ່າງປະເທດ, ໄດ້ອ້າງຄຳຄິດເຫັນຂອງນັກວິເຄາະດ້ານເສດຖະສາດຊຶ່ງລະບຸວ່າພົນລະເມືອງໃນພູມີພາກເອເຊຍກຳລັງປະສົບບັນຫາຄ່າໃຊ້ຈ່າຍທີ່ສູງຂຶ້ນ,ຊຶ່ງຊໍ້າເຕີມວິກິດເສດຖະກິດຈາກສະພາບລະບາດຂອງພະຍາດໂຄວິດ-19 ທີ່ແກ່ຍາວມາເປັນເວລາ 2 ປີ ແລ້ວ. ອີກທັງບັນຫາຂໍ້ຂັດແຍ່ງລະຫວ່າງຣັສເຊຍ ແລະ ຢູເຄຣນ, ບວກກັບສະພາບຮັດຕົວຂອງລະບົບຕອບສະໜອງການຜະລິດສິນຄ້າທີ່ຕົກຢູ່ໃນພາວະ ”ຄໍຂວດ ຫຼື ຄໍແກ້ວ” ຍິ່ງເມື່ອຄິດໄລ່ໃສ່ປະລິມານຄວາມຕ້ອງການບໍລິໂພກທີ່ເພີ່ມຂຶ້ນຈຶ່ງເຮັດໃຫ້ຕະຫຼາດໂລກເກີດສະພາວະຜັນຜວນ. ລວມໃສ່ລາຄານໍ້າມັນເຊື້ອໄຟ ແລະແກ໊ຊທຳມະຊາດທີ່ດີດຕົວສູງຂຶ້ນ, ຍິ່ງໄປເພີ່ມຕົ້ນທຶນການຜະລິດຈາກຄ່າຂົນສົ່ງ. ປະກອບກັບເງິນເອເຊຍທີ່ກຳລັງອ່ອນຄ່າເມື່ອທຽບກັບເງິນໂດລາສະຫະລັດ, ກໍ່ຍິ່ງຊໍ້າເຕີມຕົ້ນທຶນຂອງພາກທຸລະກິດ ແລະ ກໍ່ແນ່ນອນວ່າ ປະຊາຊົນ ກໍ່ຄືຜູ້ບໍລິໂພກ ຫຼື ຜູ້ຊື້ສິນຄ້າຕ້ອງແບກຮັບພາລະຄ່າໃຊ້ຈ່າຍທີ່ແພງຂຶ້ນຢ່າງຫຼີກເວັ້ນບໍ່ໄດ້.

ທັງນີ້ ທ່ານ ຣິວທາໂຣ ໂຄໂນະ ຫົວໜ້ານັກເສດຖະສາດຈາກ ບີເອັນພີ ພາຣິບາສ໌ ປະເທດຍີ່ປຸ່ນກໍ່ໄດ້ກ່າວວ່າ ”ຕາມປົກກະຕິແລ້ວ, ບັນດາບໍລິສັດຍີ່ປຸ່ນຈະເລືອກເອົາກຳໄລຫຼຸດລົງເພື່ອຊົດເຊີຍຕົ້ນທຶນທີ່ເພີ່ມຂຶ້ນ; ແຕ່ໃນເມື່ອຕົ້ນທຶນການຜະລິດຍັງຄົງເພີ່ມຂຶ້ນຢ່າງຕໍ່ເນື່ອງດັ່ງເຊັ່ນປັດຈຸບັນນີ້.ດັ່ງນັ້ນ, ເພື່ອຄວາມຢູ່ລອດກໍ່ມີຄວາມເປັນໄປໄດ້ທີ່ຜູ້ດຳເນີນທຸລະກິດຈະຕ້ອງຍູ້ດັນພາລະໄປໃຫ້ຜູ້ບໍລິໂພກນຳດ້ວຍ.

ຂະນະທີ່ທ່ານ ກັນ ຄິມ ຢົງ ລັດຖະມົນຕີວ່າການກະຊວງການຄ້າ ແລະອຸດສາຫະກຳຂອງສິງກະໂປຣ໌, ກໍ່ໄດ້ອອກມາເຕືອນວ່າ ”ຊາວສິງກະໂປຣ໌ຈະໄດ້ຮັບຜົນກະທົບຈາກບັນຫາຄ່າໄຟຟ້າແພງຢ່າງຫຼີກເວັ້ນບໍ່ໄດ້”.

ສຳລັບປະເທດເຮົາ, ລາຄາສິນຄ້າທຸກຊະນິດກໍ່ເພີ່ມຂຶ້ນ, ນັບຕັ້ງແຕ່ເກືອ, ໄຂ່ໄກ່  ແລະ ບະໝີ່ເຄິ່ງສຳເລັດຮູບທີ່ເປັນອາຫານຈານດ່ວນລາຄາຕໍ່າກໍຍັງເໜັງຕີງຂຶ້ນເທົ່າຕົວ. ຊຶ່ງຍັງບໍ່ເວົ້າເຖິງສິນຄ້າທີ່ຈຳເປັນໃນຄົວເຮືອນອີກຫຼາກຫຼາຍ. ຊຶ່ງການເໜັງຕີງຂອງລາຄາຊື້ຂາຍບໍ່ແມ່ນເປັນສະເພາະແຕ່ຢູ່ບ້ານເຮົາ, ເພາະວ່າບັນດາປະເທດໃນທະວີບເອເຊຍ.ໂດຍສະເພາະໃນພູມີພາກອາຊຽນລ້ວນປະສົບກັບບັນຫາຕົ້ນທຶນການຜະລິດສິນຄ້າແພງດ້ວຍກັນທັງນັ້ນ.

• 30/03/2022