ລາວ-ຣັສເຊຍ ສຳເລັດການຮ່ວມກວດກູ້ລະເບີດບໍ່ທັນແຕກຕົກຄ້າງ

ວຽກງານກວດ-ກູ້ ແລະ ທຳລາຍລະເບີດບໍ່ທັນແຕກທີ່ຕົກຄ້າງແຕ່ປາງສົງຄາມ, ເປັນໜຶ່ງໃນຄວາມຮ່ວມມືເພື່ອມະນຸດສະທຳ ຂອງສອງພັກ-ສອງລັດ(ລາວ-ຣັສເຊຍ). ປະຕິບັດການຄັ້ງນີ້, ຈັດຕັ້ງປະຕິບັດມາແຕ່ວັນທີ23ພະຈິກ2021ຢູ່ເມືອງນາກາຍ ແຂວງຄຳມ່ວນ.

ຊຶ່ງເມື່ອວັນທີ27ມີນາ2022, ກໍ່ໄດ້ມີພິທີປິດການຈັດຕັ້ງປະຕິບັດແຜນການຮ່ວມມືເພື່ອມະນຸດສະທຳ ໃນວຽກງານກວດ-ກູ້ ແລະ ທຳລາຍລະເບີດບໍ່ທັນແຕກ. ໂດຍການເຂົ້າຮ່ວມຂອງສະຫາຍ ພົອ ຈັນສະໝອນ ຈັນຍາລາດ,ຮອງນາຍົກລັດຖະມົນຕີ,ລັດຖະມົນຕີກະຊວງປ້ອງກັນປະເທດ.ສະຫາຍ ວະລາດີເມຍ ກາລິນິນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສະຫະພັນຣັສເຊຍ ປະຈຳ ສປປລາວ ແລະ ບັນດາຜູ້ຕາງໜ້າຈາກຂະແໜງການກ່ຽວຂ້ອງ.

ທັງນີ້, ສະຫາຍ ພັອ ອັນເດຣ ລີຄາຊ໋ອບ ທີ່ປຶກສາການທູດຝ່າຍທະຫານຣັສເຊຍ ປະຈຳລາວ,ໄດ້ລາຍງານວ່າ:ການປະຕິບັດແຜນຮ່ວມກວດ-ກູ້ ແລະ ທຳລາຍລະເບີດບໍ່ທັນແຕກ, ໂດຍການຮ່ວມມືລະຫວ່າງຄະນະຮັບຜິດຊອບການກວດ-ກູ້ລະເບີດ ກະຊວງປ້ອງກັນປະເທດ ແຫ່ງ ສປປລາວ ກັບ ຄະນະຮັບຜິດຊອບການກວດ-ກູ້ມິນສາກົນ ກະຊວງປ້ອງກັນປະເທດ ແຫ່ງສະຫະພັນຣັສເຊຍ. ໃນເນື້ອທີ່ທັງໝົດ120ເຮັກຕາ,ຜ່ານການປະຕິບັດງານພາກສະໜາມ ແມ່ນສຳເລັດແລ້ວ9ຈຸດ ສາມາດປະຕິບັດໄດ້25ເຮັກຕາ,ທຳລາຍລະເບີດໄດ້91ໜ່ວຍ.ໃນນີ້ເປັນໂບມບີ51ໜ່ວຍ,ໂບມ500ປອນ1ໜ່ວຍ,ກວດ-ກູ້ສະເກັດຕ່າງໆໄດ້ 4.190ຊິ້ນສ່ວນ. ພ້ອມນີ້,ຍັງມີການມອບຄືນພື້ນທີ່ປອດໄພໃຫ້ແກ່ອົງການປົກຄອງເມືອງນຳໃຊ້ຕາມແຜນພັດທະນາເສດຖະກິດ-ສັງຄົມ, ຊຶ່ງຕາງໜ້າຮັບໂດຍ ສະຫາຍນາງ ບົວກາ ແກ້ວມະນີ ເຈົ້າເມືອງນາກາຍ. ສຳລັບພື້ນທີ່ ທີ່ຍັງບໍ່ທັນກວດກູ້, ກໍ່ຈະໄດ້ຮັບຄວາມຊ່ວຍເຫຼືອອີກໃນປີຕໍ່ໄປ.

ໃນໂອກາດນີ້,ລັດຖະມົນຕີກະຊວງ ປ້ອງກັນປະເທດ ແຫ່ງ ສປປ ລາວ,ກໍ່ໄດ້ມອບຫຼຽນໄຊພິລະອາດຫານ ຊັ້ນ3ໃຫ້ແກ່ຊ່ຽວຊານ ຣັສເຊຍ ຈຳນວນ28ສະຫາຍ. ພ້ອມນັ້ນ, ສະຫາຍ ພົຕ ວໍລະສານ ວິລັດດາວົງ,ຄະນະປະຈຳພັກກະຊວງປ້ອງກັນປະເທດ,ຮອງຫົວໜ້າກົມໃຫຍ່ການເມືອງກອງທັບ ກໍ່ໄດ້ມອບຫຼຽນກາມິດຕະພາບ ກອງທັບປະຊາຊົນລາວ ໃຫ້ແກ່ຊ່ຽວຊານຣັສເຊຍ ຈຳນວນ7ສະຫາຍ ແລະ ມອບຫຼຽນໄຊມິດຕະພາບແຫ່ງສະຫະພັນຣັສເຊຍດ້ານການທະຫານ ໃຫ້ແກ່ພະນັກງານນັກຮົບ ກອງທັບປະຊາຊົນລາວ ຈຳນວນ24ສະຫາຍ.

ໃນວາລະສຳຄັນນີ້, ສະຫາຍ ພົອ ຈັນສະໝອນ ຈັນຍາລາດ ກໍ່ໄດ້ສະແດງຄວາມຂອບໃຈໄປຍັງປະເທດຣັສເຊຍ ໂດຍຜ່ານເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງສະຫະພັນຣັສເຊຍປະຈຳ ສປປ ລາວ, ທີ່ໄດ້ໃຫ້ການຊ່ວຍເຫຼືອທາງດ້ານອຸປະກອນ, ຍຸດທະວິທີກອງກຳລັງທະຫານ ໃນການເຄື່ອນໄຫວກວດ-ກູ້ລະເບີດບໍ່ທັນແຕກຕົກຄ້າງຢູ່3ແຂວງຂອງລາວ(ຊຽງຂວາງ,ບໍລິຄຳໄຊ ແລະ ຄຳມ່ວນ). ໂດຍສະເພາະກໍແມ່ນແຂວງຄຳມ່ວນ ທີ່ຈະຕ້ອງໄດ້ເລັ່ງກວດ-ກູ້ຢູ່ບັນດາເມືອງເປົ້າໝາຍ, ຊຶ່ງຍັງຄົງມີລະເບີດມິນທີ່ບໍ່ທັນແຕກຕົກຄ້າງຢູ່ຫຼາຍ.

แชร์