ຢາສູບຂ້າປະຊາກອນໂລກປີລະ 8 ລ້ານຄົນ

ຢາສູບເປັນສາເຫດທີ່ກໍ່ໃຫ້ເກີດພະຍາດຮ້າຍຫຼາຍຊະນິດ ແລະ ເປັນສາເຫດການເສຍຊີວິດອັນດັບ1ຂອງປະຊາກອນໂລກ,ດ້ວຍຕົວເລກການຕາຍປີລະຫຼາຍກວ່າ8ລ້ານຄົນ.ສະເພາະໃນປະເທດລາວ,ກໍ່ມີລາຍງານການຕາຍເພາະຢາສູບປີລະ7ພັນຄົນ ຫຼື ຕາຍ19ຄົນຕໍ່ວັນ.

ຂໍ້ມູນດັ່ງກ່າວ,ໄດ້ຮັບການເປີດເຜີຍໂດຍ ດຣ.ນາງ ຄັດທະນະພອນ ພັນດວງສີ ຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກ,ໃນວາລະປະຊຸມເຜີຍແຜ່ກົດໝາຍຄວບຄຸມຢາສູບ ສະບັບປັບປຸງ,ແກ່ສື່ມວນຊົນ.ເຂົ້າຮ່ວມໃນກອງປະຊຸມຊຶ່ງຈັດຂຶ້ນເມື່ອວັນທີ29ມີນາ2022 ທີ່ເມືອງວັງວຽງ ແຂວງວຽງຈັນ,ມີທ່ານ ບຸນປອນ ນະຄອນສີ ຮອງຫົວໜ້າກົມສື່ມວນຊົນ ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ,ພ້ອມດ້ວຍພະນັກງານ ວິຊາການທີ່ກ່ຽວຂ້ອງ.

ໂດຍຮອງຫົວໜ້າກົມອະນາໄມ ແລະ ສົ່ງເສີມສຸຂະພາບ ໄດ້ລະບຸວ່າ”ຖ້າຫາກບໍ່ມີມາດຕະການຄວບຄຸມຢ່າງເຂັ້ມງວດ,ຈຳນວນຜູ້ເສຍຊີວິດເພາະຢາສູບພາຍໃນສະຕະວັດນີ້ກໍ່ຈະເພີ່ມຂຶ້ນເປັນສອງເທົ່າ ຫຼື ປະມານ1ຕື້ຄົນ.ຊຶ່ງພະຍາດທີ່ເກີດຈາກຢາສູບກໍ່ມີ ມະເຮັງກວມອັດຕາ22% ໃນນັ້ນ 17%ແມ່ນມະເຮັງປອດ,ພະຍາດຫົວໃຈ-ເສັ້ນເລືອດກວມ10% ແລະ ພະຍາດລະບົບຫາຍໃຈຊຳເຮື້ອ42%.

ທັງນີ້,ກົດໝາຍສະບັບປັບປຸງໃໝ່ ເລກທີ09/ສພຊ,ລົງວັນທີ16ພະຈິກ2021ໄດ້ກຳນົດເຂດປອດຄວັນຢາສູບທັງພາຍໃນ ແລະ ນອກອາຄານໄວ້ຢ່າງຈະແຈ້ງ.ຊຶ່ງໃຫ້ສູບຢາຢູ່ນອກອາຄານເທົ່ານັ້ນ ຫຼື ຕ້ອງສູບຢູ່ຫ່າງຈາກອາຄານຢ່າງໜ້ອຍ10ແມັດ,ສ່ວນບ່ອນທີ່ອະນຸຍາດໃຫ້ສູບຕ້ອງບໍ່ມີຫຼັງຄາ.ພ້ອມນັ້ນກໍ່ຕ້ອງຈັດໃຫ້ມີອຸປະກອນຮອງຮັບຂີ້ກອກຢາ ຫຼື ຈຸດເຂ່ຍຂີ້ກອກຢາ,ສ່ວນຜູ້ລະເມີດສູບຢາໃນເຂດຫ້າມສູບກໍ່ຈະຖືກປັບໄໝເຖິງ4ແສນກີບ.

• 30/03/2022