ໂຄວິດ ”ສະເຕລທ໌” ແຜງລິດຄຸກຄາມໂລກ

ບໍ່ພຽງແຕ່ໄພເງິນເຟີ້ທີ່ກຳລັງສ້າງບັນຫາຕໍ່ຄ່າໃຊ້ຈ່າຍຂອງປະຊາກອນໂລກ, ຊຶ່ງຕ້ອງແບກຫາບສະພາບຜັນຜວນຂອງເສດຖະກິດ. ໃນຂະນະດຽວກັນເຊື້ອໄວຣັສໂຄວິດ-19 ກາຍພັນ ສາຍພັນໂອໄມຄຣອນ ຊະນິດ BA.2 ຫຼື ສະເຕລທ໌ ກໍ່ພວມແຜງລິດລະບາດຢູ່ທົ່ວໂລກ, ເຮັດໃຫ້ຕົວເລກຜູ້ຕິດເຊື້ອໃໝ່ໃນທຸກປະເທດດີດຕົວສູງຂຶ້ນຢ່າງຕໍ່ເນື່ອງ.

ສາເຫດທີ່ນັກວິທະຍາສາດຕັ້ງສາຍານາມໃຫ້ເຊື້ອ BA.2 ວ່າ”ສະເຕລທ໌”ຊຶ່ງແປວ່າ ລ່ອງຫົນ ຫຼືຫາຍຕົວ, ເນື່ອງຈາກວ່າເຊື້ອຊະນິດນີ້ກວດພົບໄດ້ຍາກກວ່າເຊື້ອໂອໄມຄຣອນສາຍພັນດັ່ງເດີມ. ຊຶ່ງ”ສະເຕລທ໌”ບໍ່ສາມາດກວດພົບໄດ້ດ້ວຍວິທີ PCR ແຕ່ຈະກວດພົບໄດ້ດ້ວຍຂະບວນການວິເຄາະລຳດັບ”ນິວຄລີໂອໄທດ໌”ຂອງສານພັນທຸກຳ ຊຶ່ງວິທີນີ້ບໍ່ຖືກນຳໃຊ້ຫຼາຍເທົ່າການກວດແບບ PCR.

ໂດຍອົງການອະນາໄມໂລກ (WHO) ໄດ້ລະບຸວ່າເຊື້ອໂຄວິດກາຍພັນໂອໄມຄຣອນ BA.2 (ສະເຕລທ໌) ຫຼື ໂອໄມຄຣອນລ່ອງຫົນ, ກວມສັດສ່ວນເຖິງ 86% ຂອງຈຳນວນຜູ້ຕິດເຊື້ອໃໝ່. ເຖິງແມ່ນຈະຍັງບໍ່ມີຫຼັກຖານກໍ່ອາການຮຸນແຮງ; ແຕ່ເຊື້ອໂຄວິດກາຍພັນ”ສະເຕລທ໌”ກໍ່ມີຄວາມສາມາດໃນການກະຈາຍ ແລະຕິດຕໍ່ໃສ່ຄົນອື່ນໄດ້ໄວ ແລະງ່າຍກວ່າໂອໄມຄຣອນສາຍພັນດັ່ງເດີມ (BA.1 ແລະ BA.1.1) ຊຶ່ງຂະນະນີ້ປະຊາກອນໃນຫຼາຍປະເທດຂອງທະວີບເອເຊຍ ແລະ ຢຸໂຣປ ກຳລັງປະສົບກັບການລະບາດໃຫຍ່ອີກຄັ້ງ.

ປັດຈຸບັນ, ເຊື້ອໄວຣັສກາຍພັນໂອໄມຄຣອນຊະນິດ BA.2 ຖືກສັນນິຖານວ່າເປັນສາເຫດຫຼັກຂອງການລະບາດຢ່າງຕໍ່ເນື່ອງໃນ ສປ ຈີນ ແລະ ອີກຫຼາຍປະເທດໃນຢຸໂຣປ ເຊັ່ນ ເຢຍຣະມັນ ແລະສະຫະຣາຊອານາຈັກ ຫຼືອັງກິດ, ຊຶ່ງສັງເກດຈາກຕົວເລກຜູ້ຕິດເຊື້ອໃໝ່ທີ່ເພີ່ມສູງຂຶ້ນ.

ໜຶ່ງໃນຂໍ້ກັງວົນກໍ່ຄື BA.2 ມີຄວາມອາດສາມາດໃນການຕິດເຊື້ອຊ້ຳໃນບຸກຄົນທີ່ເຄີຍຕິດເຊື້ອໂອໄມຄຣອນດັ່ງເດີມມາແລ້ວ,ຫຼັງຈາກທີ່ຫຼາຍປະເທດພົບປາກົດການຕິດເຊື້ອສອງຄັ້ງຊ້ອນ ແລະເຊື້ອໂອໄມຄຣອນດັ່ງເດີມ ກັບ ໂອໄມຄຣອນສະເຕລທ໌ ກໍ່ມີອັດຕາການລະບາດໃກ້ຄຽງກັນ.

ບໍ່ວ່າສາເຫດຂອງການລະບາດຈະເກີດມາຈາກສາເຫດໃດ? ແຕ່ການມາເຖິງຂອງ BA.2 ກໍ່ສະທ້ອນໃຫ້ເຫັນວ່າໄວຣັສກໍ່ໂຣກໂຄວິດ-19 ຍັງຄົງມີອັນຕະລາຍ ແລະຍິ່ງຈະເພີ່ມຄວາມຮຸນແຮງຂຶ່ນໃນກຸ່ມຄົນທີ່ບໍ່ໄດ້ສັກວັຄຊີນ ຫຼືຄົນທີ່ສັກວັຄຊີນບໍ່ທັນຄົບໂດສ.ລວມເຖິງກຸ່ມສ່ຽງເຊັ່ນຜູ້ອາຍຸສູງ ແລະຜູ້ມີພະຍາດປະຈຳຕົວ, ຊຶ່ງນີ້ກໍ່ຊີ້ໃຫ້ເຫັນວ່າ ບັ້ນຮົບສາທາລະນະສຸກ ກັບ ໂຄວິດ-19 ຈະບໍ່ຈົບສິ້ນໄປງ່າຍໆ ແລະນັ້ນກໍ່ໝາຍຄວາມວ່າຊາວໂລກຍັງຄົງຜະເຊີນໜ້າກັບບັນຫາສຸຂະພາບ. ຊຶ່ງມີພຽງການໃຊ້ສະຕິລະວັງຕົວ ແລະປະຕິບັດມາດຕະການປ້ອງກັນພະຍາດຢ່າງຕໍ່ເນື່ອງ, ຈຶ່ງຈະເຮັດໃຫ້ຕົນເອງ ແລະ ຄົນທີ່ຕົນຮັກສາມາດຢູ່ລອດປອດໄພໃນທ່າມກາງສິ່ງທ້າທາຍນານັບປະການ.

แชร์