ໄຕຣມາດທຳອິດ ເສດຖະກິດຫວຽດນາມເຕີບໂຕກວ່າ 5%

ໃນໄຕຣມາດທີ 1 ຫຼືສາມເດືອນທຳອິດຂອງປີ 2022 ນີ້, ຈີດີພີ (ລວມຍອດຜະລິດຕະພັນພາຍໃນ) ຂອງ ສສ.ຫວຽດນາມ ຂະຫຍາຍຕົວທີ່ 5,03% ທຽບກັບໄລຍດຽວກັນຂອງປີ 2021 ຂະຫຍາຍຕົວທີ່ 4,72% ແລະໄລຍະດຽວກັນຂອງປີ 2020 ຂະຫຍາຍຕົວທີ່ 3,66%.

ສຳນັກຂ່າວຕ່າງປະເທດໄດ້ອ້າງການລາຍງານຂອງ vnexpress ສື່ຫວຽດນາມ, ລະບຸຕົວເລກເຕີບໂຕທາງເສດຖະກິດທີ່ເປີດເຜີຍໂດຍສຳນັກງານສະຖິຕິແຫ່ງຊາດ. ຊຶ່ງຊີ້ໃຫ້ເຫັນວ່າໃນສາມເດືອນທຳອິດຂອງປີນີ້, ການຂັບເຄື່ອນເສດຖະກິດຂອງຫວຽດນາມທັງພາກກະສິກຳ, ການປະມົງ ແລະ ປ່າໄມ້ຂະຫຍາຍຕົວສະເລ່ຍທີ່ 2,45%. ສ່ວນພາກອຸດສາຫະກຳ ແລະກໍ່ສ້າງຂະຫຍາຍຕົວທີ່ 6,38%, ທາງດ້ານພາກບໍລິການຂະຫຍາຍຕົວທີ່ 4,58%.

ຂະນະທີ່ການນຳເຂົ້າ ແລະສົ່ງອອກກໍ່ມີການຟື້ນຕົວຂຶ້ນ, ເຖິງແມ່ນວ່າຈະປະສົບບັນຫາຕ່ອງໂສ້ການຕອບສະໜອງທີ່ຢຸດນິ້ງໄປໄລຍະໜຶ່ງຈາກສະພາບລະບາດຂອງພະຍາດໂຄວິດ-19. ຊຶ່ງມູນຄ່າການຄ້າຂອງຫວຽດນາມຢູ່ທີ່ 1,76 ແສນລ້ານໂດລາສະຫະລັດ ເພີ່ມຂຶ້ນ 14,4% ຫາກທຽບໃສ່ໄລຍະດຽວກັນຂອງປີຜ່ານມາທີ່ການສົ່ງອອກຂະຫຍາຍຕົວ 12,9% ແລະ ການນຳເຂົ້າຂະຫຍາຍຕົວ 15,9%.

ຢ່າງໃດກໍຕາມ, ຈາກພາວະຄວາມບໍ່ແນ່ນອນຂອງສະຖານະການໂລກປັດຈຸບັນ, ລວມທັງສະຖານະການເງິນເຟີ້ທົ່ວໂລກ. ຊຶ່ງນັກວິຊາການຂອງຫວຽດນາມ, ກໍ່ກຳລັງຕິດຕາມຜົນກະທົບທາງດ້ານເສດຖະກິດທີ່ອາດຈະເກີດຂຶ້ນໃນໄຕຣມາດ 2. ໂດຍ ຫວຽດນາມ ກໍ່ໄດ້ຕັ້ງເປົ້າການເຕີບໂຕຂອງ ຈີດີພີ ຕະຫຼອດທັງປີ 2022 ທີ່ 6,5% ຂະນະທີ່ການຂັບເຄື່ອນເສດຖະກິດຂອງຫວຽດນາມ ແລະບັນດາປະເທດທົ່ວໂລກກໍ່ເຕັມໄປດ້ວຍບັນຫາທ້າທາຍຫຼາຍປະການ.

แชร์